ކޭޓް އަށް ފިރިހެން ދަރިކަލަކު ލިބިވަޑައިގެންފި

އިނގިރޭސި ޝާހީ އާއިލާގެ ޕްރިންސް ވިލިއަމްގެ އަނބިކަނބަލުން، ކޭޓް މިޑިލްޓަން ރައްކައުވެވަޑައިގެންފިއެވެ.

ޝާހީ ބޭފުޅުން ދިރިއުޅުއްވާ ގަނޑުވަރު، ކެންސިންގްޓަން ޕެލަސް އިން ކޮށްފައިވާ ޓްވީޓެއްގައި ބުނެފައި ވަނީ ލަންޑަންގެ ސެއިންޓް މޭރީސް ހޮސްޕިޓަލުގައި ހޯމަދުވަހުގެ ހެނދުނު އެޑްމިޓވްވެ ވަޑައިގެން އޭގެ ވަގުތުތަކެއް ފަހުން ކޭޓް ރައްކައުވެވަޑައިގެންފައިވާ ކަމަށާއި ލިބިވަޑައިގެންނެވީ ފިރިހެން ބޭކަލެއް ކަމަށެވެ. ބަރުދަނުގައި ހުރީ އަށް ޕައުންޑް ކަމަށާއި ދެމައިންގެ ހާލު ރަނގަޅު ކަމަށް ވެސް ބުނެފައި ވެއެވެ.

މިމަހުގެ ކުރީކޮޅުގައި ޚަބަރުތައް ފެތުރިފައިވާ ގޮތުގައި ކޭޓް ރައްކައުވާންދެން އޭނާ ހުންނެވީ މަންމާފުޅު ކެރޯލް މިޑިލްޓަންގެ ގޭގައެވެ.

ލަންޑަންގެ ސެއިންޓް މޭރީސް ހޮސްޕިޓަލު ލީޑޯ ވިންގްގެ ބޭރުގައި ހޯމަ ދުވަހުގައި ހަރުކޮށްފައިވާ ނޯޓިސްއެއްގައި ބުނެފައި ވަނީ މިމަހުގެ 9 އިން ފެށިގެން 30 އާ ހަމައަށް އެ ހޮސްޕިޓަލްގެ ބޭރުފައި ޕާކް ކުރުމާއި މަޑުކުރުން ވަގުތީ ގޮތުން މަނާކޮށްފައިވާ ކަމަށެވެ.

ސެއިންޓް މޭރީސް ހޮސްޕިޓަލަކީ ކޭޓްގެ ދަރިކަލުން ޕްރިންސް ޖޯޖް އާއި ދަރިކަނބަލުން ޕްރިންސެސް ޝާލޮޓް ވެސް އުފަންވި ހޮސްޕިޓަލެވެ.

ކޭޓް އާލާސްވެ އިންނެވީ އެއްމާބަނޑު ދެބޭފުޅުންނަަށް ކަމަށް ބައެއް ނޫސްތަކުން ވަނީ ރިޕޯޓްކޮށްފައެވެ. އެމެރިކާގެ މަޖައްލާއެއް ކަމަށްވާ ލައިފް އެންޑް ސްޓައިލް ވީކްލީއިން މީގެ ކުރިން ރިޕޯޓު ކޮށްފައިވާ ގޮތުގައި ކޭޓް އާލާސްވެއިންނެވީ އެއް ޖިންސުގެ އެއްމާބަނޑު ދެ ބޭފުޅުންނަށެވެ. ލައިފް އެންޑް ސްޓައިލް ވީކްލީ މަޖައްލާއިން މި ހަބަރުގައި އެމައުލޫމާތު ހިމެނިއިރު ހަވާލާދީފައި ވަނީ ކޭޓްގެ މަންމާފުޅާއި ބައްޕާފުޅަށެވެ. ނަމަވެސް ލިބިވަޑައިގެންނެވީ ފިރިހެން ދަރިކަލެއް އެކަންޏެވެ.

ކޭޓްއާއި ޕްރިންސް ވިލިއަމްގެ ކައިވެންޏަށް ހަތް އަހަރު ފުރޭނީ މިމަހުގެ 29 ގައެވެ.