ކޭޓް މިޑިލްޓަން ރައްކައުވާން ކައިރިވުމުން ހޮސްޕިޓަލްގެ ސެކިއުރިޓީ ވަރުގަދަ ކޮށްފި

އިނގިރޭސި ޝާހީ އާއިލާގެ ޕްރިންސް ވިލިއަމްގެ އަނބިކަނބަލުން، ކޭޓް މިޑިލްޓަން ތިންވަނަ ވަނަ ބޭފުޅަކަށް އާލާސްވެ އިންނެވި ކަމަށް އިނގިރޭސި ޝާހީ އާއިލާއިން ބުނެފައިވަނީ މިދިޔަ އަހަރުގެ ސެޕްޓެމްބަރު މަހުއެވެ.

ކޭޓް އާއި ވިލިއަމަށް ވަނީ ދެ ދަރިކަލުން ލިބިވަޑައިގެންފައެވެ. އެއީ ޕްރިންސް ޖޯޖްއާއި ޕްރިންސެސް ޗާލޮޓްއެވެ.

ކޭޓް ރައްކައުވުމަށް ހަމަޖެހިފައިވާ ލަންޑަންގެ ސެއިންޓް މޭރީސް ހޮސްޕިޓަލު ލީޑޯ ވިންގްގެ ބޭރުގައި ހޯމަ ދުވަހުގައި ހަރުކޮށްފައިވާ ނޯޓިސްއެއްގައި ބުނެފައިވަނީ މިމަހުގެ 9 އިން ފެށިގެން 30 އާއި ހަމައަށް އެ ހޮސްޕިޓަލްގެ ބޭރުފައި ޕާކް ކުރުމާއި މަޑުކުރުން ވަގުތީގޮތުން މަނާކޮށްފައިވާ ކަމަށެވެ. ބައެއް މީޑިއާތަކުގައި ބުނެފައިވަނީ ހޮސްޕިޓަލްގެ ސެކިއުރިޓީ ވަރުގަދަ ކުރި ކަމުގައިވިއަސް ކޭޓް ރައްކައުވާން އަދި ދުވަސްކޮޅެއް އެބައޮތް ކަމަށެވެ. އެގޮތުން ކޭޓް ރައްކައުވުމަށް އަދި ގާތްގަނޑަކަށް ހަފްތާއެއްހާ ދުވަސް އެބައޮތްކަމަށް ރިޕޯޓްތައް ބުނެއެވެ.

ސެއިންޓް މޭރީސް ހޮސްޕިޓަލަކީ ކޭޓްގެ ދެދަރިންކަމަށްވާ ޕްރިންސް ޖޯޖްއާއި ޕްރިންސެސް ޗާލޮޓްއާއިގެންވެސް އެކަމަނާ ރައްކައުވި ހޮސްޕިޓަލެވެ.

ކޭޓްއަށާއި ވިލިއަމަށް މިފަހަރު ލިބިވަޑައިގަންނަވަނީ ކޮން ޖިންސެއްގެ ބޭފުޅެއްކަން ޝާހީ އާއިލާއިން ހާމަ ކޮށްފައެއް ނުވެއެވެ. ކޭޓް އާލާސްވެ އިންނެވީ އެއްމާބަނޑު ދެބޭފުޅުންނަަށް ކަމަށް ބައެއް ނޫސްތަކުން ވަނީ ރިޕޯޓްކޮށްފައެވެ. އެމެރިކާގެ މަޖައްލާއެއް ކަމަށްވާ ލައިފް އެންޑް ސްޓައިލް ވީކްލީއިން މީގެ ކުރިން ރިޕޯޓު ކޮށްފައިވާ ގޮތުގައި ކޭޓް އާލާސްވެއިންނެވީ އެއް ޖިންސުގެ އެއްމާބަނޑު ދެ ބޭފުޅުންނަށެވެ. ލައިފް އެންޑް ސްޓައިލް ވީކްލީ މަޖައްލާއިން މި ހަބަރުގައި އެމައުލޫމާތު ހިމެނިއިރު ހަވާލާދީފައިވަނީ ކޭޓްގެ މަންމާފުޅާއި ބައްޕާފުޅަށެވެ.

ކޭޓް ރައްކައުވުމުން ޝާހީ އާއިލާއިން ސޯޝަލް މިޑިއާ އާއި ޕްރެސް ރިލީޒްއެއް މެދުވެރިކޮށް އެކަން ހާމަކުރާނެއެވެ. މީގެ ކުރިން ޕްރިންސް ޖޯޖްއާއި ޕްރިންސެސް ޗާލޮޓް އުފަންވެވަޑައިގަތުމުންވެސް ކަންކަން ކުރައްވާފައިވަނީ އެހެންނެވެ.