16 އަހަރުގެ ފިރިހެން ކުއްޖަކު 71 އަހަރުގެ އަންހެނަކާ އިންޑޮނީޝިއާގައި ކައިވެނި ކޮށްފި

އިންޑޮނީޝިއާގައި އުމުރުން 16 އަހަރުގެ ފިރިހެން ކުއްޖަކު 71 އަހަރުގެ އަންހެނަކާ ކައިވެނި ކޮށްފިއެވެ. ކައިވެނި ކުރީ އާއިލާއާއި އަދި އެ ދެމީހުން ނިސްވަތްވާ އަވަށުގެ މީހުންގެ ނުރުހުމުގައި ކަމަށް ވެއެވެ.

ދެ މީހުންނަކީވެސް އަދައިގެ ފަންތިއަކަށް ނިސްބަތްވާ ދެމީހުން ކަމަށް މީޑިއާގައި ރިޕޯޓު ކޮށްފައި ވެއެވެ.

ސޯޅަ އަހަރުގެ ފިރިހެން ކުއްޖާގެ ނަމަކީ ސެލާމަތް ރިޔާދީ އެވެ. އަންހެން މީހާގެ ނަމަކީ ރޮހާޔާ ކަމަށްވެސް ރިޕޯޓުތަކުގައި ވެއެވެ.

ދެ މީހުން ނިސްބަތްވަނީ ސުމަތުރާގެ ދެކުނުގެ އަވަށެއް ކަމަށްވާ ކަރަންގެންޑާ އަށެވެ.

އަންހެން މީހާ މީގެ ކުރިން ދެ ކައިވެންޏެއް ކޮށް ކައިވެނި ކުރި ދެ މީހުންވެސް ވަނީ މަރުވެފައެވެ.

ދެ މީހުންނާ ހަވާލާދީ ޚަބަރުތަކުގައިވާ ގޮތުން ކައިވެނި ކުރީ އެކަކު އަނެކަކު ދެކެ އިންތިހާއަށް ލޯބިވާތީއެވެ. އަދި ކައިވެންޏަށް ހުރަސް އެޅި ނަމަ ދެމީހުން ތިބީ އެކުގައި ދުނިޔެއަޅާ ދިއުމަށް ތައްޔާރަށް ކަމަށެވެ. ކައިވެނި ނުކޮށްދީފިނަމަ ދެ މީހުންވެސް މަރުވާނެ ކަމަށް ބުނުން އެއީ މިކައިވެނި ކޮށްދިން އެއް ސަބަބު ކަމަށް ޚަބަރުތަކުގައި ވެއެވެ.

އިންޑޮނީޝިއާގައި ކައިވެނި ކުރެވޭ ރަސްމީ އުމުރަކީ 19 އަހަރު ކަމަށް ވިޔަސް، މި ފިރިހެން ކުއްޖާގެ ކައިވެނި ކޮށްދިން އިރު އޭނާ ކައިވެނި ކުރާ އުމުރު ހަމަ ނުވާކަން ފާހަގަ ކުރެވެއެވެ. އިންޑޮނީޝިއާގެ އަވަށް ތަކުގައި ކުރެވޭ މިފަދަ ބައެއް ކައިވެނި ތަކަކީ އަވަށު ފެންވަރުގައި ބަލައިގަންނަ ކައިވެނި ތައް ކަމަށްވެއެވެ.

ކައިވެނި ކުރުމަށް ދެމީހުން ބޭނުންވެގެން އަވަށުގެ ވެރިމީހާއަށް ހުށަހެޅީ ރޯދަ މަހުގެ ކުރިން ކައިވެނި ކުރުން ކަމަށާއި ނަމަވެސް ކައިވެނި ކުރުމަށް އޭރު ހުއްދަ ނުދިން ކަމަށެވެ.

ކައިވެނީގެ ރަނުގެ ގޮތުގައި ދެއްކީ އިންޑޮނީޝިއާގެ 200،000 (ދެލައްކަ) ރުޕީސް އެވެ. އެއީ ގާތްގަނޑަކަށް ފަނަރަ ވަރަކަށް ޑޮލަރަށް ޖެހޭ މިންވަރެވެ.

މި ކައިވެނީގެ ފޮޓޯތަކާއި ވީޑިއޯ އިންޑޮންޑޮނީޝިއާގެ ސޯޝަލް މީޑިއާގައި ދައުރުވުމުން ގިނަ މީހުން ބުނީ މިއީ ގަބޫލު ކުރަން ދަތި ކަމެއް ކަމަށެވެ.