"މާބަނޑު" ފިރިހެން ކުއްޖަކު އުފަން ވެއްޖެ!
މިހާތަނަށް މިފަދަ ހާދިސާ ރެކޯޑް ކުރެވިފައިވަނީ 200 ފަހަރު
ބަނޑުގައި އޮތް ކުއްޖާ އޮޕަރޭޝަން ކޮށްގެން ވަނީ ނަގާފައި
"މާބަނޑު" ފިރިހެން ކުއްޖެއް އިންޑިއާގެ މުމްބްރާގެ 19 އަހަރުގެ އަންހެނަކަށް ލިބިއްޖެއެވެ.
ވަރަށް މަދުން ނޫނީ ދިމާނުވާ މި އާދަޔާ ޚިލާފް ހާދިސާ އާ ބެހޭ ގޮތުން ޑޮކްޓަރުން ބުނީ ކުއްޖާ އުފަންވި އިރު އޭނާގެ ބަނޑުގައި އޮތީ، އޭނާ އާ އެއް މާބަނޑު އަނެއް ކުއްޖާގެ ހަށިގަނޑު ކަމަށެވެ.
މި ކުއްޖާ އުފަންވި އިރު ބަނޑުގައި އޮތް އަނެއް ކުއްޖާގެ ހަށިގަނޑު މުޅިން ރަނގަޅަށް އުފެދިފައި ނުވާ ކަމަށް ވެސް ޑޮކްޓަރުން ބުނެފައިވެއެވެ.
ބަނޑުގައި އޮތް ކުއްޖާ ނެގުމަށް ޑޮކްޓަރުންނަށް ޖެހުނީ އޮޕަރޭޝަން ކުރާށެވެ. އޮފަރޭޝަން ކޮށްފައި ނެގި ކުއްޖާގެ ހަށިގަނޑުގައި ހުރީ ހަތް ސެންޓި މީޓަރު ކަމަށްވެސް ޑޮކްޓަރުން ހާމަކޮށްފައި ވެއެވެ. ޑޮކްޓަރުން ބުނި ގޮތުގައި ކުއްޖާގެ ބަނޑުން ނެގި ކުއްޖާގެ ބޮލުގެ ނާށިގަނޑު ރަނގަޅަށް އުފެދިފައި ނެތް ނަމަވެސް ސިކުނޑި އާއި އަތްފައި ވަނީ އުފެދިފައެވެ.
ކުއްޖާގެ ބަނޑުގައި އިތުރު ކުއްޖެއް އޮތް ކަން ފާހަގަވީ އާދައިގެ މަތިން ސްކޭން ކުރުމުގެ ތެރޭގައި ރޭޑިއޮލޮޖިސްޓަށެވެ.
އޮޕަރޭޝަނަށް ފަހު ކުއްޖާގެ ހާލު ރަނގަޅު ކަމަށް ޑޮކްޓަރުން ބުނެއެވެ.
އުފަންވީ އިރު ބަނޑުގައި އިތުރު ކުއްޖެއް އޮތް ކަމަށް މިހާތަނަށް ރެކޯޑް ކުރެވިފައިވަނީ 200 ފަހަރު ކަމަށް މި ޚަބަރުގައި ވެއެވެ.
އުފަންވާ އިރު ބަނޑުގައި އެހެން ކުއްޖަކު އުފެދިފައި އޮތްކަން ނޭގި ކިތަންމެ އަހަރެއްވެސް ފާއިތުވެ ދިޔުން އެކަށީގެންވާ ކަމެއް ކަމަށްވެސް ޑޮކްޓަރުން ބުނެއެވެ.
