ރައީސް މައުމޫން ހައްޔަރުކުރީ އަނެއްކާ ވެސް މައުމޫނާ ޤާސިމްގެ ތާއީދު ޔާމިނަށް ހޯދުމަށް: ސައުދު
ރައީސް މައުމޫން މިއަދު ހުރަގޭގައި ބަންދުކޮށްފައި ވަނީ ޤާނޫނު އަސާސީ އާއި ޤާނޫނުތަކާއި ޚިލާފަށް
ސައުދު ހުސައިން
ކުރީގެ ރައީސް މައުމޫން ޢަބްދުލް ޤައްޔޫމް ހައްޔަރުކޮށް ޖަލުގައި ބަހައްޓާފައި ވަނީ ކުރިއަށް އޮތް ރިޔާސީ އިންތިޚާބުގައި ރައީސް މައުމޫނާއި ޤާސިމް އިބްރާހީމްގެ ތާއީދު އަނެއްކާ ވެސް ހޯދުމަށް ކަމަށް ރައްޔިތުންގެ މަޖިލީހުގެ ވިލިނގިލީ ދާއިރާގެ މެންބަރު ސައުދު ހުސައިން ވިދާޅުވެއްޖެއެވެ.
"ނުހައްގު އަނިޔާގައި ރައީސް މައުމޫން" މިނަމުގައި މ. ކުނޫޒްގައި ބޭއްވި ޕެނަލް ޑިސްކަޝަންގައި ވާހަކަ ދައްކަވަމުން ސައުދު ވިދާޅުވީ ރައީސް މައުމޫން މިއަދު ހުރަގޭގައި ބަންދުކޮށްފައި ވަނީ ޤާނޫނު އަސާސީ އާއި ޤާނޫނުތަކާ ޚިލާފަށް ކަމަށާއި އެއީ މުޅި ދިވެހިރާއްޖެ ކަންބޮޑުވާ ކަމެއް ކަމަށެވެ. އެމަނިކުފާނު ހުރަގޭގައި ބަންދުކޮށްފައި ބެހެއްޓީ މާލޭގެ މަގުމައްޗަށް ނުކުމެ މީހުން ކަތިލައި، މީހުންނަށް އަނިޔާކޮށް، މަސްތުވާތަކެތި ބޭނުންކޮށް މަސްތުވާތަކެތީގެ ވިޔަފާރިކޮށް، މީހުންގެ ގެދޮރަށް ގެއްލުންދީ ވައްކަން ކުރާތީއެއް ވެސް ނޫން ކަމަށާއި އެމަނިކުފާނު ކުރެއްވި މަސައްކަތެއް ކުރެއްވީ ޕާޓީ ތެރެއިން ފެއްޓެވި އިސްލާހީ މަސައްކަތެއް ކަމަށެވެ. އަދި އެމަސައްކަތް ފެއްޓެވީ ފާޅުކަނަ ބޮޑު ގޮތެއްގައި ޓީވީތަކުގެ ކުރިމަތީގައި ކަމަށާއި އެއީ ޤާނޫނު އަސާސީގެ ތެރެއިން ފެއްޓެވި ޤާނޫނީ މަސައްކަތެއް ކަމަށް ސައުދު ވިދާޅުވިއެވެ.
ރައީސް މައުމޫނަށް ތާއީދު ކުރައްވާ އިސްލާހީ މަސައްކަތާ ގުޅިވަޑައިގެންނެވުމާ އެކު އިލެކްޝަންސް ކޮމިޝަނުން ގޮނޑި ގެއްލިފައި ވާކަމަށް ކަނޑައެޅި ސައުދު ވިދާޅުވީ ޓެރަރަރިޒަމްގެ ދައުވާކޮށް ރައީސް މައުމޫން ޖަލަށްލާފައިވާއިރު ދިވެހިރައްޔިތުންނާއި ޚުދު ރައީސް ޔާމީންގެ އަރިހުގައި ތިބި ފަރާތްތައް ވެސް އެމަނިކުފާނު އެފަދަ ކަމެއް ނުކުރައްވާނެކަން ޤަބޫލް ކުރައްވާ ކަމަށެވެ.
ސައުދު ވިދާޅުވީ ރައީސް މައުމޫނު ހައްޔަރުކުރީ މުޅިން އެހެން ބޭނުމެއްގައި ކަމަށާއި އެމަނިކުފާނު ހައްޔަރުކުރައްވާފައި އެވަނީ އެމަނިކުފާނު ކުރައްވާ އިސްލާހީ މަސައްކަތް ހުއްޓަވާލައްވާ ރައީސް ޔާމީނަށް އަލުން ތާއީދު ކުރެއްވުމަށް މަޖްބޫރު ކުރެއްވުމަށް ކަމަށެވެ. އަދި ރައީސް މައުމޫން ވިދާޅުވެގެން ޤާސިމް އިބްރާހީމްގެ ތާއީދު ވެސް ރައީސް ޔާމީނަށް ހޯއްދެވުން ކަމަށާއި އެހެންނަމަވެސް އެކަމެއް ދެން ރައީސް މައުމޫން ނުކުރައްވާނެ ކަމަށް ސައުދު ވިދާޅުވިއެވެ.
"ރައީސް މައުމޫން ހައްޔަރުކޮށްގެން ރައީސް ޔާމީން ހީފުޅު ކުރެއްވީ ރައީސް މައުމޫނާއި ރައީސް މައުމޫން ޢާއިލާ ރައީސް ޔާމީން ހއަރިހަށް އާދޭސް ދަންނަވައި ކުރުނީސްކޮށް އިސްލާހީ މަސައްކަތުން އެކަހެރިވެ، 2018 ގެ ރިޔާސީ އިންތިޚާބުގައި ރައީސް ޔާމީން ވާދަކުރައްވާ ކަމަށް ވަންޏާ ރައީސް މައުމޫނުގެ އެހީތެރިކަން ލިބިދާނެއޭ ދެން ރައީސް މައުމޫންގެ އެދިވަޑައިގަތުމަކަށް ޤާސިމް އިބްރާހީމްގެ އެހީތެރިކަން ވެސް ލިބިދާނެ ކަމަށް. ހަނދާން ނައްތާލަން ޖެހޭނީ ރައީސް ޔާމީން،" ސައުދު ވިދާޅުވިއެވެ.
