އުތުރު ކޮރެއާއެކު މަތީ ފަންތީގެ މަޝްވަރާތައް ކުރިއަށްދޭ: ޓްރަމްޕް

އުތުރު ކޮރެއާގެ ލީޑަރ ކިމް ޖޮން އުން އާއި އެމެރިކާގެ ރައީސް ޑޮނަލްޑް ޓްރަމްޕް ބޭއްވުމަށް ހަމަޖެހިފައިވާ ބައްދަލުކުރެއްވުމުގެ ކުރިން ކުރަން ޖެހޭ މަޝްވަރާތައް ދެޤައުމުގެ މެދުގައި މަތީ ފަންތީގައި ކުރިއަށްދާކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ޖަޕާނުގެ ބޮޑުވަޒީރު ޝިންޒޯ އަބޭ އާއިއެކު ޓްރަމްޕްގެ އަމިއްލަފުޅު ރިސޯޓްކަމަށްވާ ފްލޮރިޑާގެ މާރަލާގޯގައި ބައްދަލު ކުރައްވައި ވާހަކަ ދައްކަވަމުން ޓްރަމްޕް ވިދާޅުވީ ކިމް އާއި ބައްދަލު ކުރެއްވުމަށް 5 ތަނެއް ކަނޑައަޅައި މަޝްވަރާ ކުރަމުންދާ ކަމަށެވެ. އަދި މިމަޝްވަރާތަކުން ބައްދަލުކުރެއްވުން އޮންނާނެ ފައިނަލް މަންޒިލެއް ކަނޑައެޅޭނެ ކަމަށެވެ. މަޝްވަރާތަކުގެ ވާހަކަ ދެކެވުނުއިރު، ގިނަ މުހައްލިލުން ބުނަމުން އައީ ވާހަކަތައް ބޭއްވުން އެންމެ ގާތް އެއްތަނަކީ ދެކޮރެއާ ގުޅޭ ސަރަހައްދީ އިމުގައި އޮންނަ ޕަންމުންޖޮމް ގައެވެ. އެސަރަހައްދަކީ އެމެރިކާ ސިފައިން ހަރަކާތްތެރިވާ، އދގެ ބާރުގެ ދަށުގައި އޮންނަ ސަރަހައްދެކެވެ.

އެމެރިކާގެ ވެރިކަމުގައި ހުންނެވި ރައީސަކު މީގެ ކުރިން އުތުރު ކޮރެއާގެ ވެރިޔަކާއި ބައްދަލުކުރައްވާފައި ނުވާއިރު، ކިމް ޖޮން އުން އާއި ބައްދަލު ކުރެއްވުމަށް މިދިޔަ މަހު ޑޮނަލްޑް ޓްރަމްޕް އެއްބަސްވެވަޑައިގަތުމުން މުޅި ދުނިޔެއަށް ސިހުން ލިބިގެންދިޔައެވެ. ނިއުކްލިއަރ ޕްރޮގްރާމާއި އިންސާނީ ހައްޤުތަކުގެ މައްސަލައިގައި ދުނިޔެއާއި އެއްކޮށް އެކަހެރިވެފައިވާ އުތުރު ކޮރެއާ އިން އެމެރިކާ އާއިއެކު މަޝްވަރާތަކަށް ދިޔުމަށް އެއްބަސްވީ ދާދި ފަހުން ދެކުނު ކޮރެއާގެ ޕިޔޮންގްޗެންގައި ނިމިގެން ދިޔަ ފިނި މޫސުމުގެ އޮލިމްޕިކްސްގައި އުތުރު ކޮރެއާއިން ބައިވެރިވުމާއި ގުޅޭ ގޮތުން ދެކުނު ކޮރެއާ އާއި އުތުރު ކޮރެއާ އާއި ދެމެދު ކުރެވުނު މަޝްވަރާތަކުގެ ތެރެއިންނެވެ.

ޓްރަމްޕް ވިދާޅުވީ ކިމް އާއިއެކު އޮންނަ ބައްދަލުވުން ކުރިއަށް ދާނީ އަންނަ ޖޫން މަހުގެ ކުރީކޮޅު، ނުވަތަ "އެއަށްވުރެ ވެސް ތަންކޮޅެއް އަވަހަށް" ކަމަށެވެ.

ޖަޕާނުގެ ބޮޑުވަޒީރާއެކު ބޭއްވި ބައްދަލުވުމެއްގައި އުތުރު ކޮރެއާގެ ވާހަކަ ޓްރަމްޕް ދެއްކެވިއިރު، އެމެރިކާ އާއި އުތުރު ކޮރެއާގެ ދެމެދުގައި މަޝްވަރާތައް ފެށިއްޖެނަމަ އުތުރު ކޮރެއާގެ މައްސަލައިން 'ބާކީ'ވެދާނެކަމުގެ ބިރުވެރިކަން ޝިންޒޯ އަބޭއަށް އޮތްކަމަށް މުރާސިލުން ފާހަގަކުރެއެވެ. އެހެން ނަމަވެސް އަބޭ އަކީ އިރުމަތީ ޤައުމުތަކުގެ ވެރިންގެ ތެރެއިން ޓްރަމްޕްއާއި އެންމެ އަރިސް އެއް ބޭފުޅާއެވެ. މިއީ މާރަލާގޯގައި އަބޭއާއި ޓްރަމްޕް ބައްދަލުކުރައްވާ ދެވަނަ ފަހަރެވެ.

އުތުރު ކޮރެއާގެ މައްސަލައިގައިވެސް ޖަޕާނާއި އެމެރިކާގެ ވިސްނުން އެއްގޮތްކަމަށް ޓްރަމްޕް ވަނީ ފާހަގަކުރައްވާފައެވެ.

އުތުރު ކޮރެއާއިން އެމެރިކާ އާއި ހަމަޔަށް ފޯރާވަރުގެ މިސައިލްތައް ޓެސްޓްކޮށްފައިވާއިރު، މިހާތަނަށް ނިއުކްލިއަރ 6 ޓެސްޓެއް ކޮށްފައިވެއެވެ.