އުތުރު ކޮރެއާގެ ލީޑަރ ކިމް ޖޮންގް-އުންގެ އެއްބަފާ ބޭބެ މެލޭޝިޔާގައި އަވަހާރަ ކޮށްލައިފިއެވެ.
އުމުރުފުޅުން 45 އަހަރުގެ ކިމް ޖޮންގް-ނަމް އަވަހާރަ ކޮށްލާފައިވަނީ ކުއާލަލަމްޕޫރު އިންޓަރނޭޝަނަލް އެއާޕޯޓްގައި އުޅުއްވަނިކޮށް ޒަހަރު ލާފައިވާ ތިނޯސްތަކެއް އޭނާގެ ގައިކޮޅަށް ހަރައިގެން ކަމަށް ދެކުނު ކޮރެއާގެ މީޑިއާ ރިޕޯޓްތައް ބުނެފިއެވެ.
ބައެއް ރިޕޯޓްތައް ބުނާގޮތުން ނަމް އަވަހާރަކޮށްލާފައިވަނީ އުތުރު ކޮރެއާއަށް ނިސްބަތްވާ ދެ އަންހެނަކުވެގެންނެވެ.
މެލޭޝިޔާ ފުލުހުންނާ ހާވަލާދީ ރިޕޯޓްތައް ބުނާ ގޮތުން އެެއާޕޯޓުގައި ހުއްޓާ ނަމްގެ ގައިކޮޅަށް ވިހަ ތިނޯސްތައް ހަރާލުމަށްފަހު ހަމަލާ ދިން ދެ އަންހެނުން ޓެކްސީއަކަށް އަރައިގެން ވަނީ ފިލާފައެވެ.
ފުލުހުން ބުނީ އޭނާ އަވަހާރަވީ ހޮސްޕީޓަލަށް ގެންދެވުނު މަގުމަތީގައި އެމްބިއުލާންސްގައިކަމަށެވެ.
އޭނާގެ ހަށިގަނޑު ޕްޓްރަޖާޔާ ހޮސްޕިޓަލްގައި އޭނާގެ އޮޓޮޕްސީ ހަދާފައިވާއިރު ފުލުހުން އިންތިޒާރުކުރަމުންދަނީ އެ ރިޕޯޓަށެވެ.
ކިމް ޖޮންގް-ނަން އަވަހާރަ ކޮށްލަން އުތުރު ކޮރެއާގެ އޭޖެންޓުން މީގެ ކުރިންވެސް އެތައް ފަހަރަކު މަސައްކަތް ކުރިކަމަށް މީޑިއާ ރިޕޯޓްތައް ބުނެއެވެ.
އުތުރު ކޮރެއާގެ ކުރީގެ ލީޑަރު ކިމް ޖޮންގް-އިލްއަށްފަހު ވެރިކަމަށް ވަޑައިގަންނަވާނެ ކަމަށް އެންމެ ބޮޑަށް ހީކުރެވުނީ ކިމް ޖޮންގް-ނަމްއެވެ. ނަމަވެސް ވަގު ޕާސްޕޯޓެއްގައި އޭނާ 2001 ވަނަ އަހަރު ޖަޕާނަށް އެތެރެވާން އުޅެނިކޮށް ފަޅާއަރައި، އެކަމާހެދި ކިމް ޖޮންގް-ނަންގެ މަގްބޫލްކަންކުޑަވި އެވެ.
އޭގެފަހުން އޭނާ ދިރިއުޅުއްވަމުން ގެންދެވީ ގައުމުން ބޭރުގައެވެ. ސިންގަޕޫރު، އިންޑޮނޭޝިޔާ، މެލޭޝިޔާ އަދި ފްރާންސްގައެވެ. ގިނައިން ދިރިއުޅުއްވަމުން ގެންދެވީ ޗައިނާގެ ސަރަހައްދެއް ކަމަށްވާ މަކާއުގައެވެ.
