ބޮއިންގ ކުންފުންޏަށް ރަޝިޔާއިން ޓައިޓޭނިއަމް ވިއްކުން ހުއްޓާލަފާނެ!
ޑްރީމްލައިނަރގެ އެއަރފްރޭމްގެ 14 އިންސައްތަ އެކުލެވިގެންވަނީ ޓައިޓޭނިއަމްގެ މައްޗަށް
ޓައިޓޭނިއަމް އަކީ ބޮއިންގ ކުންފުނީގެ މަތިންދާބޯޓުތައް އުފެއްދުމަށް މުހިއްމު މައުދަނެއް
މަތިންދާބޯޓު އުފައްދާ ދުނިޔޭގެ އެންމެ ބޮޑު އެއް ކުންފުނި، އެމެރިކާގެ ބޮއިންގ އަށް ޓައިޓޭނިއަމް ވިއްކުން ހުއްޓާލަން ޖެހިދާނެކަމުގެ އިންޒާރު ރަޝިޔާއިން ދީފިއެވެ.
ރަޝިޔާގެ ޤާނޫނު ހަދާ މަޖިލީހުން މިފިޔަވަޅު އެޅުމާއިމެދު ދަނީ މަޝްވަރާކުރަމުންނެވެ. ބޮއިންގ ކުންފުންޏަށް ޓައިޓޭނިއަމް ވިއްކުން ހުއްޓާލާނެކަމުގެ އިންޒާރު ރަޝިޔާއިން މިދިނީ އެމެރިކާއިން ރަޝިޔާއާއި ދެކޮޅަށް އަޅަމުންދާ ފިޔަވަޅުތަކަށް ރައްދު ދިނުމުގެ ގޮތުންނެވެ.
ޓައިޓޭނިއަމް އަކީ ބޮއިންގ ކުންފުނިން އުފައްދާ މަތިންދާބޯޓުތަކުގައި ބޭނުންކުރާ މައުދަނެކެވެ. އެކުންފުނިން މިހާރު އެންމެ ކާމިޔާބުކަމާއިއެކު ވިއްކާ އެއް މަތިންދާބޯޓުކަމަށްވާ ޑްރީމްލައިނަރގެ އެއަރފްރޭމްގެ 14 އިންސައްތަ އެކުލެވިގެންވަނީ ޓައިޓޭނިއަމްގެ މައްޗަށެވެ. ގިނަ އަދަދެއްގެ އެއަރލައިންތަކުން ޑްރީމްލައިނަރތަކަށް އޯޑަރުކުރަމުންދާއިރު، އަދި މިހާރުވެސް ބޮއިންގ އިން ގިނަ އަދަދެއްގެ އޯޑަރު ނަގާފައިވާއިރު، ރަޝިޔާއިން ޓައިޓޭނިއަމް ސަޕްލައިކުރުން ހުއްޓިއްޖެނަމަ ޑްރީމްލައިނަރގެ އަގު ބޮޑުވެދާނެކަމުގެ ބިރު އެބައޮތެވެ.
ދުނިޔޭގައި ޓައިޓޭނިއަމް އުފައްދާ އެންމެ ބޮޑު ކުންފުނިކަމަށްވާ ވީ.އެސް.އެމް.ޕީީ.އޯ-އެވިސްމާ އާއި ބޮއިންގ ކުންފުނި ގުޅިގެން ރަޝިޔާގެ ޔޫރަލްސްގައި މިހާރުވެސް ޓައިޓޭނިއަމް އުފައްދާ މަރުކަޒެއް އޮޕަރޭޓްކުރެއެވެ.
