އުރީދޫ މޯލްޑިވްސްގެ ހިއްސާ ވިއްކުން ހުއްޓާލައިފިއެވެ.

އުރީދޫއިން ނެރުނު ބަޔާނެއްގައި ބުނެފައިވަނީ އެޕްރީލްމަހުގެ 30 ވަނަ ދުވަހު ހުޅުވައިލި އުރީދޫ މޯލްޑިވްސްގެ އައިޕީއޯ ނިމި، ހިއްސާ ގަތުމުގެ ފުރުސަތު މިހާރު ބަންދުކޮށްފައިވާ ކަމަށެވެ.

އެގޮތުން  ހިއްސާ ގަތުމުގެ މުއްދަތު ހުޅުވާލެވުނީ 30 އޭޕްރިލް އިން ފެށިގެން 29 މެއިގެ ނިޔަލަށް، ރަސްމީ ބަންދު ނޫން 20 ދުވަހަށްކަމަށް ބަޔާނުގައި ބުނެފައި ވެއެވެ. 

އުރީދޫއިން ބުނީ އެ ކުންފުނީގެ ހިއްސާ ގަނެފައިވާ އެންމެހާ ފަރާތްތަކުގެ އެހީގައި އުރީދޫ މޯލްޑިވްސް އައިޕީއޯ ވެގެންދިޔައީ ވިކިފައިވާ ހިއްސާގެ މިންވަރަށް ބަލާއިރު ރާއްޖޭގައި މިހާތަނަށް ކުރިއަށްގެންގޮސްފައިވާ އެންމެ ބޮޑު އައިޕީއޯ އަށް ކަމަށެވެ.  

"މިފަދަ ތަރުޙީބެއް ލިބުމަކީ އަޅުގަނޑުމެންނަށް ލިބިގެންދިޔަ ފަޚުރެއް. މިގޮތުން، ޑިޖިޓަލް ޚިދުމަތްތައް މެދުވެރިކޮށް ދިވެހި ރައްޔިތުން ބާރުވެރިކުރުމަށް އުރީދޫ ކުރަމުންދާ މަސައްކަތަށް އިންވެސްޓްކުރެއްވި ކަމަށްޓަކައި، ޙިއްޞާ ބައްލަވައިގަތް އެންމެހާ ބޭފުޅުންނަށް ޝުކުރު އަދާކުރަން. އަޅުގަނޑުމެންގެ އައު ޙިއްޞާދާރުންނަށް މަރުޙަބާ ކިޔައި، އުރީދޫގެ ކާމިޔާބީގައި ބައިވެރިކުރުމަށް އަޅުގަނޑުމެން މިތިބީ އުފަލާއެކު ތައްޔާރަށް." އުރީދޫގެ ސީއީއޯ، ނަޖީބް ޙާން ވިދާޅުވިއެވެ.

އުރީދޫއިން ވަނީ ހިއްސާ ގަންނަން ހުށަހަޅާފައިވާ ފަރާތްތަކަށް މުޙިއްމު ތާރީޚުތައް އާންމު ކޮށްފައެވެ. އެގޮތުން ހިއްސާ އެކަށައެޅޭނެ ކަމަށް ލަފާ ކުރެވޭ ތާރީޚަކީ ޖޫން 15 ކަމަށާއި ވިއްކުމަށް ހުށައަޅާފައިވާ އަދަދަށްވުރެ އިތުރަށް ގަންނަން ހުށައަޅާފައިވާ ހާލަތެއްގައި ފައިސާ އަނބުރާ ރައްދުކުރެވޭނެ ކަމަށް ލަފާކުރެވޭ ތާރީޚަކީ ޖުލައި 12 ކަމަށް އުރީދޫއިން ބުނެއެވެ. ވިއްކުމަށް ހުށަހެޅިފައިވާ ޙިއްޞާ ޑިޕޮސިޓް ކުރެވޭނެ ކަމަށް ލަފާކުރެވޭ ތާރީޚަކީ  ޖުލައި 17ކަމަށާއި ހިއްސާ ގަނެވިއްކަން ފެއްޓޭނެ ކަމަށް ލަފާކުރެވޭ ތާރީޚަކީ މި އަހަރުގެ އޮގަސްޓް 7 ކަމަށް އުރީދޫއިން އާންމުކޮށްފައިވާ ނޫސް ބަޔާނުގައި ބުނެފައި ވެއެވެ.