މިދިޔަ އަހަރަކީ ކުންފުންޏަށް ރަނގަޅު ކާމިޔާބީތަކެއް ލިބުނު އަހަރެއް: މޯލްޑިވްސް ސްޓޮކް އެކްސްޗޭންޖް
ކުންފުންޏަށް 10 އަހަރު ފުރިފައިވަނީ މިއަދު
މޯލްޑިވްސް ސްޓޮކް އެކްސްޗޭންޖް އަދި އަދި މޯލްޑިވްސް ސެކިއުރިޓީޒް ޑިޕޮސިޓަރީ ކުންފުނި
މިދިޔަ އަހަރަކީ މޯލްޑިވްސް ސްޓޮކް އެކްސްޗޭންޖް ކުންފުންޏަށް ކާމިޔާބު އަހަރެއް ކަމަށް އެ ކުންފުނިން ބުނެފިއެވެ.
މޯލްޑިވްސް ސްޓޮކް އެކްސްޗޭންޖް ކުންފުނި އަދި މޯލްޑިވްސް ސެކިއުރިޓީޒް ޑިޕޮސިޓަރީ ކުންފުންޏަށް 10 އަހަރުފުރުމާއި ގުޅިގެން މިއަދު ނެރުނު ބަޔާނުގައި މޯލްޑިވްސް ސްޓޮކް އެކްސްޗޭންޖް ކުންފުނީގެ ޗީފް އެގްޒެކެޓިވް އޮފިސަރ އައުޝަން ލަތީފް ވިދާޅުވީ މިދިޔަ އަހަރު އެ ކުންފުންޏަށް އެކަށީގެންވާ ރަނގަޅު ކާމިޔާބީއެއް ލިބިފައިވާކަން އުފަލާއެކީ ފާހަގަކުރައްވާ ކަމަށެވެ.
އެގޮތުން މިދިޔަ އަހަރު "އިންފިނިޓީ" ގެ ނަމުގައި ސެކިއުރިޓީޒް އަށް ސަބްސްކްރައިބް ކުރުމަށް އޮންލައިން ޕޯޓަލްއެއް ތައާރަފުކޮށްފައިވާ ކަމަށާއި އުރީދޫ ޕަބްލިކް ކުންފުންޏެއްގެ ގޮތުގައި ސްޓޮކް އެކްސްޗޭންޖުގައި ލިސްޓުކުރުން ހިމެނޭ ކަމަށް ވެސް އައުޝަން ވިދާޅުވިއެވެ. އަދި އެޗް.ޑީ.އެފް.ސީ ގެ ފަރާތުން ސުކޫކެއް އާންމުކޮށް ވިއްކާފައިވާ ކަމަށް ވެސް އޭނާ ފާހަގަކުރެއްވިއެވެ.
އައުޝަން އިތުރަށް ވިދާޅުވީ ސްޓޮކް އެކްސްޗޭންޖްގައި މިހާތަނަށް ނުވަ ކުންފުންޏަކުން ލިސްޓް ކޮށްފައިވާ ކަމަށާއި އެ ކުންފުނީގެ ތަފާސް ހިސާބުތައް ދައްކާ ގޮތުން ކުންފުނީގެ މާކެޓް ކެޕިޓަލައިޒޭޝަން 15 ބިލިއަން ރުފިޔާ އަށް އަރާ ކަމަށެވެ.
ކުންފުންޏަށް ދިހަ އަހަރު ފުރިފައިވާއިރު ކުންފުނި ކުރިއެރުވުމަށްޓަކައި އެހީތެރިވެދެއްވި ކުންފުނީގެ ބޯޑު މެމްބަރުންނަށާއި މުވައްޒަފުންގެ ޓީމަށާއި ކެޕިޓަލް މާރކެޓް ޑިވަލޮޕްމަންޓް އޮތޯރިޓީ އަދި އެހެނިހެން ފަރާތްތަކަށްވެސް އެ ކުންފުނިން ވަނީ ޝުކުރު އަދާކޮށްފައެވެ.
އެމް.ޓީ.ސީ.ސީ އިން ހިންގާފައިވާ ރައިޓްސް އިޝޫ އަކީ މިއަހަރުގެ ތެރޭގައި ސެކިއުރިޓީޒްގެ ބާޒާރުގައި ކާމިޔާބުކަމާއެކު ކުރިއަށް ގެންގޮސްފައިވާ ހަރަކާތެއްކަން އެ ކުންފުނިން ވަނީ ފާހަގަކޮށްފައެވެ.
ކުރިއަށް އޮތްތާނގައި ކުންފުނީގެ ހިދުމަތްތައް އިތުރަށް ހަރުދަނާ ވެގެންދާނެ ކަމަށްވެސް އެ ކުންފުނިން ބުންޏެވެ.
