އިލެކްޝަންސް ކޮމިޝަނުން މަސައްކަތް ކުރަމުން ދަނީ އެކޮމިޝަނަށް ލިބިދީފައިވާ ޤާނޫނީ އިމުގެ ބޭރުން ކަމަށާއި އިލެކްޝަންސް ކޮމިޝަނުން އެނގި ކަމުގައިވީ ނަމަވެސް ޕާޓީތަކުގެ އެތެރޭގެ މައުލޫމާތުތައް ފޯރުކޮށްދެވެން ނޯންނާނެ ކަމަށް ގުޅިފައިވާ ޕާޓީތަކުން ބުނެފިއެވެ.
ގުޅިފައިވާ ޕާޓީތަކުން މ. ކުނޫޒްގައި އަންގާރަ ދުވަހު ބޭއްވި ޕްރެސްކޮންފަރެންސެއްގައި ޖުމްހޫރީ ޕާޓީގެ ސެކްރެޓަރީ ޖެނެރަލް އަހްމަދު ސަމީރު ވިދާޅުވީ ރިޔާސީ އިންތިޚާބާ ގުޅޭ ގޮތުން މަޝްވަރާ ކުރުމަށް އިލެކްޝަންސް ކޮމިޝަނުން ސިޔާސީ ޕާޓީތަކަށް ދައުވަތު ދީފައިވާނޭ ކަމަށް ބުނާ ބުނުމަކީ ކަނޑައެޅިގެން ދޮގެއް ކަމަށެވެ. އަދި ސަމީރު ވަނީ އެކަން ކަށަވަރުކޮށްދެއްވުމުގެ ގޮތުން ނޫސްވެރިން މެދުވެރިކޮށް އިލެކްޝަންސް ކޮމިޝަނުން ފޮނުވި ސިޓީ މީޑިއާގައި އާންމުކުރައްވާފައެވެ.
ސަމީރު ވިދާޅުވީ އެސިޓީގައި ރިޔާސީ އިންތިޚާބާ ބެހޭ އެއްވެސް ވާހަކައެއް ނެތް ކަމަށެވެ.
"މި ސިޓީގައި ބުނެފައެއް ނެތް ރިޔާސީ އިންތިޚާބާ ބެހޭ އެއްވެސް ވާހަކައެއް. އަނެއް ސިޓީގައި ބުނެފައި ވަނީ އިލެކްޝަންސް ކޮމިޝަނަށް ނުލިބޭ ބާރެއްގެ ދަށުން ސިޔާސީ ޕާޓީތަކާ ބެހޭ ޤާނޫނާ ވެސް ޚިލާފަށް ބައެއް މައުލޫމާތުތައް ހޯދުމަށް،" ސަމީރު ވިދާޅުވިއެވެ.
ސަމީރު ވިދާޅުވީ އެކޮމިޝަންގެ ސައްޙަ ކަމާ މެދު ސުވާލު އުފެދިފައިވަނިކޮށް އެކޮމިޝަންގެ ސެކްރެޓަރީ ޖެނެރަލެއް ވެސް ނެތި ޑިއު ޕްރޮސެސްއާ ޚިލާފަށް އެކޮމިޝަންގެ ރައީސުންގެ ގޮތުގައި ތިއްބެވި ބޭފުޅުން ވިދާޅުވާހާ އެއްޗަކަށް ޕާޓީތަކުން ތަބާ ނުވާނެ ކަމަށެވެ.
ސަމީރު ވިދާޅުވީ އިލެކްޝަންސް އިން ބާއްވަން އުޅުނު ބައްދަލުވުމުގައި ބައިވެރި ނުވާނެ ކަމަށް ޕާޓީތަކުން އަންގާރަ ދުވަހު އަންގާފައިވާނޭ ކަމަށެވެ.
ސަމީރު ވިދާޅުވީ މިއަދުވެސް ގޮވާލާނީ އިލެކްޝަންސް ކޮމިޝަނުން ޤާނޫނީ އިމުގެ ތެރެއަށް ވެންނެވުމަށާއި ހަމަހަމަކަމާ އެކު މަސްއޫލިއްޔަތުތައް އަދާ ކުރުމަށް ކަމަށެވެ. ހަމަހަމަކަމާ އެކު ސިޔާސީ ހަރަކާތް ހިންގުމުގެ ޖާގަ ދިނުމަށް ޕާޓީތަކުން އެތައް ފަހަރަކު އެދިފައިވާނޭ ކަމަށާއި މިއަދާ ހަމައަށް އައިއިރު ވެސް އެކަންކަން އިލެކްޝަންސް ކޮމިޝަނުން ކޮށްދީފައި ނުވާ ކަމަށް ސަމީރު ވިދާޅުވިއެވެ.
މީގެ އިތުރުން ސަމީރު ވިދާޅުވީ ކޮންމެ އަހަރެއްގެ މާރޗްމަސް ނިމުމުގެ ކުރިން ސިޔާސީ ޕާޓީތަކަށް ދައުލަތުން ދޭން ޖެހޭ ފައިސާ އަދިވެސް ދީފައި ނުވާ ކަމަށާއި އެކަންކަން ނުކޮށް ޤާނޫނީ އިމުގެ ތެރެއިން އިލެކްޝަންސް ކޮމިޝަނަށް ކުރެވޭނެ ކަމެއް ނޯންނާނެ ކަމަށެވެ.
