ރައީސް ޔާމީންގެ ވެރިކަން ނިމުމަކަށް ގެނެވޭނެ، ޕާޓީތަކުގެ ކެނޑިޑޭޓުން ބައިވެރިވާ އިންތިޚާބެއް ބާއްވާނަން: ރައީސް ނަޝީދު
ރައީސް ޔާމީން އަމިއްލަފުޅު މަޖިލިސް މެންބަރުންގެ ވައިބަރ ޕޭޖުން އައުޓް ވެއްޖެ
ރައީސް ނަޝީދު: މިސަރުކާރު ނިމުމަކަށް ގެންނާނެ ކަމަށް ވިދާޅުވި
ރައީސް ޔާމީންގެ ވެރިކަން ނިމުމަކަށް ގެނެސް، ޕާޓީތަކުން ކަނޑައަޅާ ކެނޑިޑޭޓުން ބައިވެރިވާ މިނިވަން އިންސާފުވެރި އިންތިޚާބެއް އަނެއްކާވެސް ރާއްޖޭގައި ބާއްވަވާނެ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އެމްޑީޕީގެ 12 ވަނަ އަހަރީ ދުވަސް ފާހަގަ ކުރުމަށް ބުރާސްފަތި ދުވަހުގެރޭ އެޕާޓީގެ ހަރުގޭގައި ކުރިއަށްގެންދާ ޚާއްޞަ ހަފްލާގެ ތެރެއިން ކޮޅުނބުގައި ހުންނަވައިގެން ދެއްވި ތަޤްރީރުގައެވެ.
ރައީސް ނަޝީދު ވިދާޅުވީ "މިރޭ އަޅުގަނޑުމެން މިހުށަހަޅައިދެނީ މުޅިން އާ ޕޭޖެއް" ކަމަށާއި "ރައީސް ޔާމީން އެބޭފުޅާގެ އަމިއްލަފުޅު މަޖިލިސް މެންބަރުންގެ ވައިބަރ ޕޭޖުން އައުޓްވެއްޖެ" ކަމަށެވެ. ރައީސް ޔާމީންގެ ސަރުކާރު މިދަނީ ރޫޅެމުން ކަމަށާއި ދިވެހިރައްޔިތުންގެ ޑިމޮކްރެޓިކް ޕާޓީއަށް ދޮޅަސް އަހަރު ފުރޭއިރު އެރަސްމިއްޔާތު ފާހަގަކުރާ ރޭ ފާހަގަކުރަމުންދަނީ އަދި ވަކިން މާބޮޑު އުފަލެއްގެ އުފާވެރިކަން ކަމަށެވެ.
ރައީސް ނަޝީދު ވިދާޅުވީ އެހެން ސިޔާސީ ޕާޓީތަކާ ގުޅިގެން ޕީޕީއެމްގެ ރައީސް އަލްއުސްތާޛް މައުމޫން ޢަބްދުލް ޤައްޔޫމާއި ޖުމްހޫރީ ޕާޓީގެ ރައީސް ޤާސިމް އިބްރާހީމާއި އަދާލަތު ޕާޓީގެ ރައީސް ޝައިޚް އިމްރާން ޢަބްދުﷲ އާއި ގުޅިގެން އެމްޑީޕީން ކުރަމުން އައި ބުރަ މަސައްކަތުގެ ކާމިޔާބީގެ ކުލަވަރު މިރޭ އަޅުގަނޑުމެންނަށް ފެންނަ ކަމަށާއި އެކާމިޔާބީގެ މަންޒަރު އެބަ ފެންނަ ކަމަށެވެ.
"ދިވެހިނަށް ހެޔޮވެރިކަމެއް ކޮށްދެވޭނެ. ދިވެހިރާއްޖޭގެ ޑިމޮކްރަސީ އަލުން އަނބުރާ ގެނެވޭނެ. ބޭނުމަކީ ރާއްޖޭގެ ޑިމޮކްރެޓިކް ނިޒާމް އަލުން އިޔާދަ ކުރުން. މުސްތަގިއްލު މުއައްސަސާތައް މުސަތްގިއްލު ކުރުން، ފަނޑިޔާރުގޭގެ ނިންމުންތަކަށް ސަރުކާރުން ވަނަ ނުދިނުން. ފުލުހުންނާ ސިފައިންގެ މަސައްކަތުގައި ސިޔާސީ ކުލަ ޖެހުނަ ނުދިނުން. ލާމަރުކަޒީ ނިޒާމް އަލުން އަނބުރާ ގެނައުން. އިންޑިއާ ކަނޑުގެ ސަލާމަތާ ރައްކާތެރިކަމަށް ބުރޫއަރާފަދަ ކަންކަން ރާއްޖޭގައި ކުރިއަނުދިނުން. މީހުން މެރުމާއި މަރުގެ އިންޒާރުދީ، ވައްކަމާއި، ފޭރުމާއި ޓެކުމުގެ ނުރައްކަލުން ރާއްޖޭގެ ރައްޔިތުން ސަލާމްތަކުރުން، ބޭނުމަކީ ރާއްޖޭގެ ރައްޔިތުންނަށް ހާސްކަމެއްނެތި ތަނަވަސް ދިރިއުޅުމެއް އުޅެވޭނެ މަގުތައް ކޮށައިދިނުން. ދިވެހިނަށް ހައްޤު މިންވަރު ދިވެހިނަށް ހޯދައިދިނުން. ގުޅިގެން އަޅުގަނޑުމެން ކުރާ މަސައްކަތް އިރާދަ ކުރެއްވިއްޔާ ކާމިޔާބު ކުރެވޭނެ. ރައީސް ޔާމީންގެ ވެރިކަން ނިމުމަކަށް ގެނެވޭނެ ޕާޓީތަކުން ޚިޔާރުކުރާ ކެނޑިޑޭޓުން ބައިވެރިވާ މިނިވަން އިންތިޚާބެއް އަނެއްކާވެސް ބޭއްވޭނެ." ރައީސް ނަޝީދު ވިދާޅުވިއެވެ.
