ގުޅިފައިވާ ސިޔާސީ ޕާޓީތަކުގެ އިސްބޭފުޅުންނާއި ރައީސް ނަޝީދު ބައްދަލުކުރައްވައިފި

ގުޅިފައިވާ ސިޔާސީ ޕާޓީތަކުގެ އިސްބޭފުޅުންނާއި ކުރީގެ ރައީސުލްޖުމްހޫރިއްޔާ މުހައްމަދު ނަޝީދު، ޖަރުމަނުވިލާތުގައި ބައްދަލުކުރައްވައިފިއެވެ.

ދިވެހިރާއްޖޭގެ ހީނަރުވަމުން އަންނަ ސިޔާސީ މަޝްރަޙާ ގުޅޭ ގޮތުން ޖަރުމަނު ވިލާތުގެ ސަރުކާރުގެ އިސްފަރާތްތަކާއި، ޤާނޫނު ހަދާ މަޖިލިހުގެ މެމްބަރުންނާއި މަދަނީ ޖަމްޢިއްޔާތަކާއި ބައްދަލުކުރެއްވުމަށް ގުޅިފައިވާ ސިޔާސީ ޕާޓީތަކުގެ އިސް ބޭފުޅުންގެ ވަފުދެއް އަންގާރަ ދުވަހު ވަނީ ޖަރުމަނުވިލާތަށް ވަޑައިގަންނަވާފަ އެވެ. އެ ވަފުދުގެ ބޭފުޅުންނާއި ރައީސް މުހައްމަދު ނަޝީދު ބައްދަލުކުރައްވާފައިވަނީ މިއަދުގެ ވަގުތެއްގަ އެވެ.

މި ވަފްދުގައި ހިމެނިވަޑައިގަންނަވަނީ ރައީސް މުޙައްމަދު ނަޝީދާއި، ރައްޔިތުންގެ މަޖިލިހުގެ ހެންވެއިރު އުތުރު ދާއިރާގެ މެމްބަރު ޢަބްދުﷲ ޝާހިދު، ދިވެހިރައްޔިތުންގެ ޑިމޮކްރަޓިކް ޕާޓީގެ ގައުމީ މަޖިލިހުގެ މެމްބަރު އުމަރު އަބްދުލް ރައްޒާޤް، ޕްރޮގްރެސިވް ޕާޓީ އޮފް ދަ މޯލްޑިވްސްގެ ކައުންސިލް މެމްބަރ އާމިނަތު ނާދިރާ, ޖުމްހޫރީ ޕާޓީގެ ނައިބު ލީޑަރު އަމީން އިބްރާހީމް އަދި ޑރ. އާސިމް އަޙްމަދާއި، ކާނަލް ރިޓަޔާޑް މުޙައްމަދު ނާޒިމްގެ ޢާއިލާގެ ފަރާތުން އާދަމް އާޒިމެވެ.

މި ވަފުދުގެ ބޭފުޅުން ޖަރުމަން ވިލާތުގެ ވެރިކަން ކުރާ ބާލިންގައި ޖަރުމަނުވިލާތުގެ ޗާންސެލާގެ އޮފީހާއި އެ އޮފީހުގެ އިސް ފަރާތްތަކާއި، ޚާރިޖީ އަދި އިޤްތިޞާދާ ބެހޭ ވުޒާރާގެ އިސް އޮފިޝަލުންނާ ބައްދަލުކުރައްވާނެކަމަށް ވަނީ މައުލޫމާތު ލިބިފައެވެ.

މި ވަފުދުން އެގައުމުގެ ސަރުކާރުގެ ވުޒާރާތަކުގެ އިތުރުން ސިޔާސީ ޕާޓީތަކާ ބައްދަލުކުރެއްވުމަށް ވަނީ ހަމަޖެހިފައެވެ. ޖަރުމަނު ވިލާތުގެ ޤާނޫނު ހަދާ މަޖިލިހުގެ މެމްބަރުންނާއި، އެ މަޖިލިހުގެ އެކިއެކި ކޮމިޓީތަކާ ސިޔާސީ ގްރޫޕްތަކާވެސް ބައްދަލުކުރައްވާނެކަމަށް ގުޅިފައިވާ ޕާޓީތަކުން ބުނެއެވެ.

ގުޅިފައިވާ ސިޔާސީ ޕާޓީތަކުން ޖަރުމަނު ވިލާތަށް ކުރައްވާ މި ދަތުރުފުޅުގައި ޖަރުމަނުގެ މަދަނީ ޖަމްޢިއްޔާތަކާ ވެސް ބައްދަލުކުރާގޮތަށް ވަނީ ހަމަޖެހިފައެވެ.