ސިޔާސީ ޕާޓީތަކުގެ މަޝްވަރާ ކުރިއަށް ގެންދެވޭނީ އދ. ގެ ބައިވެރިވުމާއެކު: އިދިކޮޅު ޕާޓީތައް
ޕީޕީއެމްގެ ރައީސަކީ ރައީސް މައުމޫން، އެހެންކަމުން ޕީޕީއެމުން މަންދޫބު ކަނޑައަޅާނީ ރައީސް މައުމޫން
އދ.ގެ ރެސިޑެންޓް ކޯޑިނޭޓަރާއެކު އިދިކޮޅު ސިޔާސީ ޕާޓީތަކުގެ ލީޑަރުން ބައްދަލު ކުރައްވަނީ
ސިޔާސީ ޕާޓީތަކުގެ މެދުގައި މަޝްވަރާ ކުރެވޭނީ އދ. ގެ ބައިވެރިވުމެއް އޮވެގެންކަމަށާއި އަދި އެ މަޝްވަރާތަކުގައި ޕީޕީއެމްގެ ފަރާތުން މަންދޫބުން ކަނޑައަންޖެހޭނީ ކުރީގެ ރައީސް އަދި ޕީޕީއެމްގެ ރައީސް މައުމޫން އަބްދލްގައްޔޫމް ކަމަށް ގުޅިފައިވާ އިދިކޮޅު ސިޔާސީ ޕާޓީތަކުން ބުނެފި އެވެ.
ގުޅިފައިވާ އިދިކޮޅު ސިޔާސީ ޕާޓީތަކުގެ ލީޑަރުން, ރާއްޖޭގައި ހުންނަވާ އދ. ރެސިޑެންޓް ކޯޑިނޭޓަރ ޝޮކޮ ނޮޑާ އާ އަންގާރަ ދުވަހު ބައްދަލުކުރެއްވުމަށްފަހު ނިކުމެވަޑައިގެން ނޫސްވެރިންނަށް މައުލޫމާތު ދެއްވަމުން ޖުމްހޫރީ ޕާޓީގެ ލީޑަރ ގާސިމް އިބްރާހީމް ވިދާޅުވީ ކުޅިވަރަކަށް ނުވަތަ މަޖަލަކަށް ހަދައިގެން ސިޔާސީ ޕާޓީތަކުގެ މަޝްވަރާތަކުގައ ބައިވެރިވުމަށް ޖުމްހޫރީ ޕާޓީން ބޭނުންނުވާ ކަމަށެވެ.
ގާސިމް ވިދާޅުވީ އދ. ރެސިޑެންޓް ކޯޑިނޭޓަރާއެކު ބޭއްވި ބައްދަލުވުމުގައި ރާއްޖޭގެ ސިޔާސީ، އިގްތިޞާދީ އަދި އިޖުތިމާއީ ހާލަތާ މެދު މަޝްވަރާ ކުރައްވާފައިވާ ކަމަށާއި ރާއްޖޭގެ ހަމަޖެހުމަށާއި އަމަންއަމާންކަން ގާއިމުކުރުމަށް ސިޔާސީ ޕާޓީތައް ވާހަކަ ދައްކައިގެން ހައްލު ކުރެވެން އޮތް ނަމަ އެކަން ކުރަން ތައްޔާރަށް ތިއްބެވި ކަމަށެވެ.
ނަމަވެސް ގާސިމް ވިދާޅުވީ ސިޔާސީ ޕާޓީތަކުގެ މަޝްވަރާއަށް ދާނީ ސަރުކާރުން ވެސް މިއީ ސީރިއަސް ކަމެއްގެ ގޮތުގައި ދެކި، އދ. ގެ ބައިވެރިވުން އޮވެގެން ބާއްވާ މަޝްވަރާތަކެއް ކަމުގައި ވާނަމަ ކަމަށެވެ. މީގެ އިތުރުން ޕީޕީއެމްގެ ރައީސަކީ ރައީސް މައުމޫން ކަމަށާޢި ސިޔާސީ ޕާޓީތަކުގެ މަޝްވަރާއަށް ޕީޕީއެމުން މަންދޫބުން ކަނޑައަޅަންޖެހޭނީ ރައީސް މައުމޫން ކަމަށް ވެސް ގާސިމް ވިދާޅުވިއެވެ. އެނޫން ގޮތަކަށް ސިޔާސީ ޕާޓީތަކުގެ މަޝްވަރާގައި ބައިވެރިވެވަޑައި ނުގަންނަވާނެ ކަމަށް ވެސް ގާސިމް ވިދާޅުވި އެވެ.
އދ. ގެ ރެސިޑެންޓް ކޯޑިނޭޓަރާއެކު ގުޅިފައިވާ އިދިކޮޅު ސިޔާސީ ޕާޓީތަކުގެ ލީޑަރުންގެ ގޮތުގައި ބައިވެރިވެވަޑައިގެންނެވީ ގާސިމްގެ އިތުރުން އެމްޑީޕީގެ ޕާލަމެންޓްރީ ގްރޫޕްގެ ލީޑަރު އިބްރާހީމް މުހައްމަދު ސޯލިހް (އިބޫ) އާއި ޕީޕީއެމްގެ ރައީސް މައުމޫން ފެކްޝަނުގެ އަދި ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު ފާރިސް މައުމޫން އާއި އަދާލަތު ޕާޓީގެ ނައިބު ރައީސް އަލީ ޒާހިރުގެ އިތުރުން ޖުމްހޫރީ ޕާޓީގެ ނާއިބު ލީޑަރު އަބްދުﷲ ރިޔާޒު އެވެ.
އެމްޑީޕީއަކީ އަބަދުވެސް މަޝްވަރާއަށް މަރުހަބާ ކިޔާ ޕާޓީއެއް ކަމަށާއި އަދި މަޝްވަރާތައް ސީރިއަސް އަދި ނަތީޖާ ނެރެވޭނެ ފަދަ މަޝްވަރާތަކަކަށް ވާންޖެހޭނެ ކަމަށްވެސް އިބޫ ވިދާޅުވި އެވެ. ނަމަވެސް އިބޫ ވިދާޅުވީ ކަންތައްތައް ކުރިއަށް ގޮސްފައިވާގޮތާއި އަދި މިހާރު ވެސް ކުރިއަށްދާ ގޮތުން، ގުޅިފައިވާ އިދިކޮޅު ސިޔާސީ ލީޑަރުންގެ އިތުރުން ދިވެހި ރައްޔިތުންގެ މެދުގައި ވެސް ސުވާލު ސަރުކާރުގެ އިހުލާސްތެރިކަމާ މެދު އުފެދޭ ކަމަށެވެ.
ފާރިސް ވިދާޅުވީ ކަންކަން އިސްލާހުކޮށް ރަނގަޅު ކުރުމަށް މަޝްވަރާ ކުރުމަށް ތައްޔާރަށް ހުންނެވި ކަމަށެވެ. ނަމަވެސް ފާރިސް ވެސް ވިދާޅުވީ ސަރުކާރުން ސިޔާސީ ޕާޓީތަކަށް ޝަރުތަތަކެއް ކަނޑައަޅައި، މަޝްވަރާތަކުގައި ސިޔާސީ ޕާޓީތަކުން ބައިވެރިވާނެ މަންދުބޫން ކަނޑައަޅާނެ ގޮތާއި މަންދޫބުން ކަނޑައެޅުމަކީ ސަރުކާރުން ކުރަންޖެހޭ ކަމެއް ނޫންކަމަށާއި އެއީ ސިޔާސީ ޕާޓީތަކުން ކުރަންޖެހޭ ކަމެއް ކަމަށެވެ.
އަލީ ޒާހިރު ވިދާޅުވީ އދ. ރެސިޑެންޓް ކޯޑިނޭޓަރާއެކު ބޭއްވި ބައްދަލުވުމުގައި ހަމައެކަނި ދެކެވުނީ ސިޔާސީ ޕާޓީތަކުގެ މަޝްވަރާ ބައްދަލުވުމުގެ ވާހަކަތައް އެކަނި ނޫން ކަމަށާއި ރާއްޖޭގެ ސިޔާސީ ހަލަތާއި ސިޔާސީ ލީޑަރުންނަށް ސަރުކާރުން ކުރިމަތި ކުރުވާ ގޮންޖެހުންތަކުގެ މައުމޫމާތު ހިއްސާ ކޮށްފައިވާނެ ކަމަށެވެ. އަދި ކުރިއަށް އޮތް ދުވަސްތަކުގައި ރާއްޖޭގައި ހުރި ބޭރުގެ ހައިކޮމިޝަންތަކާއި އެމްބަސީތަކުގެ އިތުރުން ރާއްޖޭން ބޭރުގައި ހުރި އެމްބަސީތަކަށް ޒިޔާރަތްކޮށް ރާއްޖޭގެ ސިޔާސީ ހާލަތު ހިއްސާކުރަމުންދާނެ ކަމަށެވެ.
