އޭވީސީ ސެންޓްރަލް ޒޯން މުބާރާތަށް ތައްޔާރުވުމަށް ގައުމީ ވޮލީ ޓީމު ތައިލެންޑަށް

ބަންގްލަދޭޝްގައި އޮންނަ އޭޝިއަން ވޮލީބޯލް ކޮންފެޑެރޭޝަން (އޭވީސީ) ގެ ސެންޓްރަލް ޒޯން ސީނިއާ މެންސް ވޮލީބޯލް މުބާރާތުގައި ވާދަކުރުމުގެ ކުރިން ޓްރެއިނިން ކޭމްޕަކަށް ގައުމީ ފިރިހެން ވޮލީ ޓީމު ފުރައިފިއެވެ.

ގައުމީ ވޮލީ ޓީމު ތައިލެންޑަށް ފުރާފައިވާއިރު ސެންޓްރަލް ޒޯން މުބާރާތް ކުރިޔަށްދާނީ މި މަހުގެ 19 އިން ފެށިގެން 26 އަށެވެ. މިފަހަރުގެ ވޮލީ ޓީމުގެ ކެޕްޓަނަކަށް އަހުމަދު އަބްދުލް ކަރީމް (ލޯންގޭ) ހަމަޖެއްސިއިރު ވައިސް ކެޕްޓަނެއްގެ ގޮތުގައި ހަމަޖައްސާފައި ވަނީ އަލީ ހުޒާމް (ހުޒަންޓޭ) އެވެ. ޓީމުގެ ކެޕްޓަނެއްގެ ގޮތުގައި ހަމަޖައްސާފައިވާ ލޯންގޭ އަންނަނީ 2004 ވަނަ އަހަރުން ފެށިގެން މެދުނުކެނޑި ގައުމީ ޓީމަށް ކުޅެމުންނެވެ.

ލޯންގޭ އަދި ހުޒަންޓޭގެ އިތުރުން މިފަހަރުގެ ސްކޮޑަށް ދެން ނަގާފައިވާ ކުޅުންތެރިންނަކީ ހުސައިން ވިޝާމް (ބުޅިކެ)، އަލީ މައުރޫފް (މާއްޓެ)، އާދަމް ނަސީމް (އެޑަމް)، އަހުމަދު ޝިމާއު، ޝުއައިބު އަބްދުލް ލަތީފް، މުހައްމަދު މިމްރާހް، އާދަމް ފައިރޫޒް، ހަސަން ނިލާމް (ޕާޓޭ)، މުހައްމަދު މިމްރާހް ހަސަން، މުހައްމަދު ނައީމް އަދި ޖަވާމް އަލީގެ އިތުރުން އަހުމަދު އަނިލްއެވެ. މި ކުޅުންތެރިންގެ ތެރެއިން ޝުއައިބު، މިމްރާހު، އަދި ޝިމާއުގެ އިތުރުން ނައީމް މިއީ ޓީމުގައި ހިމެނުނު ފުރަތަމަ ފަހަރެވެ.

މިފަހަރުގެ ސްކޮޑުން ޖާގަ ނުލިބުނު ތަޖުރިބާކާރު ކުޅުންތެރިންގެ ތެރޭގައި އިޝާން އިބްރާހިމް (ބަޓިސް)، އަޝްފާގް އާދަމް (އައްކަޅޭ) އަދި އަހުމަދު އަހުސަންގެ އިތުރުން މުހައްމަދު ޝާއިން ހިމެނެއެވެ. ބަޓިސް މިފަހަރު ފެނިގެން ނުދާނީ އޭނާ ގައުމީ ޓީމުން ރިޓަޔާކޮށްފައިވުމާ އެކުއެވެ.

ގައުމީ ޓީމުގެ ކޯޗެއްގެ ގޮތުގައި މިފަހަރު ހަރަކާތްތެރިވާނީ މުހައްމަދު ސާޖިދު (ކާއްޓޭ) އެވެ.