ސެންޓްރަލް ޒޯން ވޮލީ މުބާރާތުގެ ފުރަތަމަ މެޗު ކިރިގިސްތާނަށް

ހަތަރު ގައުމު ވާދަކުރާ އޭޝިއަން މެންސް ސެންޓްރަލް ޒޯން ވޮލީބޯލް ޗެމްޕިއަންޝިޕުގެ ކުޅުން ބުދަ ދުވަހު ފެށިއިރު، ފުރަތަމަ މެޗު ކިރިގިސްތާނުން ކާމިޔާބުކޮށްފި އެވެ.

ޒުވާނުންގެ މަރުކަޒު އެތެރޭ ކޯޓުގައި ކުރިއަށްދާ މި މުބާރާތުގެ ފުރަތަމަ މެޗު ކިރިގިސްތާނުން ކާމިޔާބުކުރީ ރާއްޖެއާ ބައްދަލުކޮށް ވާދަވެރި ކުޅުމަކަށްފަހު ސީދާ ތިން ސެޓުންނެވެ.

މި މެޗުގައި ދެޓީމުގެ ފަރާތުން ވެސް މޮޅު ކުޅުމެއް ފެނިގެންދިޔަ އިރު، މެޗުގެ ފުރަތަމަ ސެޓުގައި ލީޑު ނަގައިގެން ކުޅެމުންދިޔައީ ވެސް ރާއްޖެއިންނެވެ.

އެގޮތުން 20 ވަނަ ޕޮއިންޓާ ހަމައަށް ރާއްޖެއިން ލީޑު ހިފަހައްޓަމުން އައި އިރު، ކިރިގިސްތާނުން ވަނީ 20-20 އިން އެއްވަރުކޮށް 22-25 އިން މި ސެޓު ކާމިޔާބުކޮށްފަ އެވެ. މި ސެޓުގައި ރާއްޖޭގެ ޒުވާން އެޓޭކަރު ހަސަން ނިލާމްގެ ފަރާތުން ވަނީ ބާރު ހަމަލާތަކެއް ފެނިގެން ގޮސްފަ އެވެ.

މެޗުގައި ދެވަނަ ސެޓުގައި ވެސް ރާއްޖެއިން މޮޅު ކުޅުމެއް ދެއްކި އިރު، މި ސެޓުގައި ރާއްޖެއަށް ވަނީ ސެޓު ނިންމަން ގިނަ ފުރުސަތުތަކެއް ލިބިފަ އެވެ. އެހެން ނަމަވެސް ކިރިގިސްތާނުން ކުރަމުންދިޔަ އެޓޭކްތައް ބްލޮކް ނުކުރެވި މިސެޓު ދިޔައީ ކޮޅަކަށް ޕޮއިންޓެއް ލިބި އިތުރަށް ފޯރިގަދަ ވަމުންނެވެ. މި ސެޓުގައި 24-24 އިން އެއްވަރު ވަމުންގޮސް ކިރިގިސްތާނުން ވަނީ 31-33 އިން ސެޓު ކާމިޔާބުކޮށްފަ އެވެ.

މި ސެޓުގައި ރާއްޖޭގެ އިތުބާރު ޖެހުންތެރިޔާ އިސްމާއިލް ސާޖިދާއި އަލީ ހުޒާމް ވަނީ މުހިންމު ޕޮއިންޓްތަކެއް ޓީމަށް ހޯދައިދީފަ އެވެ.

ސެޓުގެ ފައިދާއާއެކު ކިރިގިސްތާނުން ތިންވަނަ ސެޓާ ކުރިމަތިލި އިރު މެޗުގެ ނަތީޖާ ފަރަގު ކުރުމަށް ރާއްޖެއަށް ލިބުނު އެންމެ ފަހު ފުރުސަތުގައި ޓީމުގެ ފަރާތުން ފެނުނީ ދަށް ކުޅުމެކެވެ.

އެގޮތުން މި ސެޓު ކިރިގިސްތާނުން ލީޑު ނަގަމުން އައިސްފައިވާ އިރު، މި ސެޓު އެޓީމުން ކާމިޔާބުކުރީ 20-25 އިންނެވެ.

މި މުބާރާތުގައި ބުރާސްފަތި ދުވަހު ކުޅޭ މެޗުގައި ބައްދަލުކުރާނީ ނޭޕާލާއި ތުރުކުމެނިސްތާނެވެ. މި މެޗު ފަށާނީ ރާއްޖެ ގަޑިން 16:00 ގަ އެވެ.

މުބާރާތުގައި ރާއްޖެ ދެން ބައްދަލުކުރާނީ ނޭޕާލާ އެވެ. މި މެޗު ކުޅުމަށް ހަމަޖެހިފައި ވަނީ ހުކުރު ދުވަހު ހަވީރު އެވެ.