ރައީސް އަބްދުﷲ ޔާމީންގެ ސަރުކާރުން ނުހައްގުން އަނިޔާ ލިބޭ ކޮންމެ މީހެއްގެ ޙައްގުގައި އަޑުއުފުލާނަން ކަމަށާއި، ގުޅިފައިވާ ސިޔާސީ ޕާޓީތަކަށް "މީހާއަށް ވުރެ" މުހިންމީ ބޭއިންސާފުން ލިބެމުންދާ އަނިޔާ ހުއްޓުވުން ކަމަށް އެމްޑީޕީގެ ޗެއާޕާސަންގެ ނައިބް މާލީ އަހުމަދު އަބްދުﷲ ވިދާޅުވެއްޖެއެވެ.
ގުޅިފައިވާ ސިޔާސީ ޕާޓީތަކުން ހުކުރު ދުވަހުގެ ރޭ އިހަވަންދޫގައި ބޭއްވި ޖަލްސާގާއި ވާހަކަ ދައްކަވަމުން ރައްޔިތުންގެ މަޖިލީހުގެ ކުރީގެ މެމްބަރު އަހުމަދު އަބްދުﷲ ވިދާޅުވީ އަނިޔާވެރިކަން ހައްދު ފަހަނައަޅާފައިވާ މިންވަރު މިހާރު ޖަލުގެ ތޭރިތަކުގެ ފުރަގަހުގައި އަނިޔާލިބެމުންދާ ފުލުހުންނާމެދު ވިސްނާލުމުން ހާމަވާނެ ކަމަށެވެ. މިހާރު ހައްޔަރުކޮށްފައިވާ ފުލުހުންނަކީ، މީގެ ކުރިން ސަރުކާރުން އަންގާ އެންގުންތަކަށް ތަބާވެ، ގާނޫނީ ތަންފީޒުކުރުމަށް މަސައްކަތްކުރި ފުލުހުން ކަން ފާހަގަކުރަމުން އަހުމަދު އަބްދުﷲ ވިދާޅުވީ "ކޮންމެ މީހަކަށް ނުޙައްގުން" އަނިޔާ ލިބުނު ކަމުގައި ވިއަސް އެމީހެއްގެ ޙައްގުގައި މަސައްކަތްކޮށް އަޑުއުފުލާނެ ކަމަށެވެ.
"އަޅުގަނޑުމެންނަން މުހިންމީ މީހާއެއް ނޫނޭ، އަޅުގަނޑުމެންނަން މުހިންމީ އަނިޔާ ހުއްޓުވުން، އެއީ އެސްއޯ ފުލުހަކަށްވި އަސް، އެއީ ފަނޑިޔާރަކަށް ވިއަސް، އެއީ ސިޔާސީ މީހަކަށް ވިއަސް، އެއީ އާންމު ރައްޔިތަކަށް ވިއަސް، އަނިޔާއާއި ދެކޮޅަށް އަޅުގަނޑުމެން އަޑުއުފުލާނަން، މި ސަރުކާރުގެ އަނިޔާވެރިކަން މާތް ﷲގެ ވާގިފުޅާއި އެކު ހުއްޓުވާނަން" އަހުމަދު އަބްދުﷲ ވިދާޅުވިއެވެ.
އަހުމަދު އަބްދުﷲ ވިދާޅުވީ ރައީސް އަބްދުﷲ ޔާމީންނާއި ވެރިކަން ދިވެހި ރައްޔިތުންނާއި ހަވާލުކުރީ، އެމަނިކުފާނާއި ދެކޮޅަށް އަޑުއުފުލާ ކޮންމެ މީހާކު ހައްޔަރުކޮށް ޖަލުގައި އަނިޔާ ދިނުމަށް ނޫން ކަމަށާއި، ރައްޔިތުންގެ ބާރުވެރިކަމާއެކު އެކަން ހުއްޓުވާނެ ކަމަށެވެ. ގާނޫނު އަސާސީގައި ވަރަށް ސާފުކޮށް، ވެރިކަން ބަދަލުކުރެވޭނެ ގޮތް، ބަޔާން ކޮށްފައިވާއިރު، ރައްޔިތުންގެ މަޖިލީހުގެ ތެރެއިން ނުވަތަ އެނޫން ވެސް ގޮތަށް ވެރިކަން ބަދަލުކުރާ ވާހަކަ ދައްކާ ކޮންމެ މީހަކީ ކޮންވެރިއެއްކަމަށް ސަރުކާރުން ކަނޑައަޅަނީ ސަބަބެއް އޮވެގެން ކަމަށް އަހުމަދު އަބްދުﷲ ވިދާޅުވިއެވެ. އެއީ ގާނޫނު އަސާސީ އާއި ހިލާފަތް ކޮންރަޕްޝަން އިންތިހާއަށް ސަރުކާރުން ހިންގާފައިވާތީ ކަމަށް ފާހަގަކުރިއެވެ.
"ވަގުތު މިދަނީ ކުޑަ ތަންވެގެން، އެ ވަގުތަކީ ދެން އަނބުރާ ހޯދޭނެ ވަގުތެއް ނޫން، މި ވެރިކަމުގެ ނިމުމުގެ ސިއްކަ މިވަނީ ޖެހިފައި، އަޅުގަނޑުމެންނަން އެ މަންޒަރު މި މަގު ތޮއްޖެހިފައިވާ މަންޒަރުން ވެސް މި ދަނީ ފެންނަމުން" ޖަލްސާގައި ބައިވެރިވި ރައްޔިތުންނަން އިޝާރަތް ކުރައްވާ އަހުމަދު އަބްދުﷲ ވިދާޅުވިއެވެ.
