ސިޔާސީ ހައްޔަރީންގެ އާއިލާތަކުގެ ޝުއޫރު ބަންޑުންކޮށްލައިފި
6 އެޕްރީލު 2018 | ހުކުރު 15:07ސަނާ ވިދާޅުވީ ސިޔާދުގެ ކުށަކީ ގާސިމްގެ ދަރިއަކަށްވުން ކަމަށް
ގާސިމް ދަރިކަނބަލުން ސަނާ މިއަދުގެ އެއްވުމުގައި ވާހަކަ ދައްކަވަނީ:-ފޮޓޯ ރާއްޖެއެމްވީ
ރައީސް އަބްދުﷲ ޔާމީންގެ ބާރުވެރިކަން އިތުރުކުރަން އިއުލާނުކުރި ކުއްލި ނުރައްކަލުގެ ހާލަތުގައި ހައްޔަރުކޮށް، ޝަރީއަތް ނިމެންދެން ބަންދުކޮށްފައިވާ ސިޔާސީ ހައްޔަރީންގެ އާއިލާތަކުގެ ޝުއޫރުތައް ބަންޑުކޮށްލައިފި އެވެ.
އިދިކޮޅު ފަރާތްތަކުން ހުކުރު ދުވަހުގެ ހަވީރު އެމްޑީޕީ ހަރުގެ ކުރިމަތީ ބޭއްވި އެއްވުން މި ފަހަރު ހާއްސަކޮށްފައި އޮތީ ހައްޔަރުކޮށްފައިވާ ތިބި ބޭފުޅުންގެ އާއިލާތަކަށެވެ. މި އެއްވުމުގައި ގާސިމް އިބްރާހިމް ދަރިކަނބަލުން ހަދީޖާ ސަނާ ވަނީ ފުރަތަމަ ފަހަރަށް ސިޔާސީ ޕޯޑިއަމްއެއްގައި ވާހަކަ ދައްކަވާފަ އެވެ. ސަނާ ވިދާޅުވީ އޭނާގެ ބައްޕަގެ ކުށަކީ ރައީސް އަބްދުﷲ ޔާމިނަށް ތާއީދު ނުކުރެއްވުން ކަމަށެވެ. މިހާރުވެސް ދޫނިދޫގައި ހައްޔަރުކޮށްފައި ހުރި އޭނާގެ ކޮއްކޮ އިބްރާހިމް ސިޔާދު ގާސިމްގެ ކުށަކީ ގާސިމް އިބްރާހިމްގެ ދަރިކަލަކަށްވުން ކަމަށް ސަނާ ވިދާޅުވި އެވެ. ސިޔާދަކީ ޖިނާއީ ކުށެއް ކުރާނެ މީހެއް ނޫން ކަމަށް ވިދާޅުވެ ތުހްމަތުތަކަށް ސަނާ ވަނީ ރައްދު ދެއްވާފަ އެވެ.
މި އެއްވުމުގައި ވާހަކަ ދެއްކެވި ދަނގެތި ދާއިރާގެ މެމްބަރު އިލްހާމް އަހްމަދުގެ ކޮއްކޮ އާދަމް ޒާލިފް ވިދާޅުވީ އިލްހާމް ހައްޔަރުކުރުމަކީ އޭނާގެ މުޅި އާއިލާއަށް ދެވޭ އަނިޔާއެއް ކަމަށެވެ. އަދި އެހެންމެ އިލްހާމް ހައްޔަރުކުރުމަކުން އިސްލާހީ މަސައްކަތުގައި އެކަކުވެސް ފަހަތަކަށް ނުޖެއްސޭނެ ކަމަށާއި އިލްހާމްގެ ހިތްވަރު ބައްޔެއް ނުކުރެވޭނެ ކަމަށް އޭނާ ވިދާޅުވި އެވެ.
އެމްޑީޕީގެ ޗެއާޕާސަން ހަސަން ލަތީފު ވިދާޅުވީ ހައްޔަރުކޮށްފައިވާ އެންމެންގެ ހައްގުގައި އެމްޑީޕީއާއި އެ ޕާޓީއާއެކު ކޯލިޝަން ހަދައިގެން މަސައްކަތްކުރާ ފަރާތްތައް ތިބޭނެ ކަމަށެވެ. ނުހައްގުން ހައްޔަރުކޮށްފައިވާ މީހުންގެ ތެރެއިން އެންމެ މީހަކު ވެސް ދޫކޮށްނުލަނީސް އެމްޑީޕީގެ މަސައްކަތް ހުއްޓާނުލާނެ ކަމަށް އޭނާ ވިދާޅުވި އެވެ. މި ސަރުކާރު ކުރަމުންދާ ވައްކަމާއި ކޮރަޕްޝަނުގެ ވާހަކަތައް ހުއްޓާނުލާނެ ކަމަށްވެސް އޭނާ ވިދާޅުވި އެވެ.
ހައްޔަރުކޮށްފައިވާ ބައެއް މީހުންގެ ގާނޫނީ ވަކީލެއްގެ ގޮތުގައި މަސައްކަތް ކުރައްވާ ރައްޔިތުންގެ މަޖިލީހުގެ މެމްބަރު މާރިޔާ އަހްމަދު ދީދީ ވަނީ ހައްޔަރުކޮށްފައިވާ ބައެއް މީހުންގެ ހާލަތާ ގުޅޭ ގޮތުން ވާހަކަ ދައްކަވާފަ އެވެ. އަދި އޭގެ ތެރެއިން ހައްޔަރުކޮށްފައި ތިބި މީހުން ތަހައްމަލު ކުރަމުންދާ އަނިޔާއަކީ ބޭއިންސާފުން ދެވޭނެ އަނިޔާއެއް ކަމަށް ވެސް އޭނާ ވިދާޅުވި އެވެ.
މިހާރު ހައްޔަރުކޮށްފައިވާ މީހުންގެ ފޮޓޯ ހިމެނޭ ޕޯސްޓަރެއް އެމްޑީޕީ ހަރުގެ ކުރިމަތީ ހުކުރު ދުވަހު ހަރުކުރި އެވެ. މި އެއްވުން ނިންމާލީ ސަރުކާރާއި ފުލުހުންގެ އަނިޔާވެރިކަމުން ސަލާމަތްކޮށްދޭން އެދި ކުރި ދުއާއަކުންނެވެ. މި ދުއާ އިސްކޮން ހުރެ ކިޔާފައިވަނީ ރައްޔިތުން މަޖިލީހުގެ ގަލޮޅު ދެކުނު ދާއިރާގެ މެމްބަރު އަހްމަދު މަހްލޫފުގެ ބައްޕަ އެވެ.
