ސަރުކާރުގެ ކޮރަޕްޝަނާއި ފަސާދައިގެ ތެރެއިން ކަޅުވަކަރު މިސްކިތް ވިއްކާލާފައިވާ ކަމަށް ގުޅިފައިވާ ސިޔާސީ ޕާޓީތަކުން ތުހުމަތުކޮށްފިއެވެ.
ގުޅިފައިވާ ސިޔާސީ ޕާޓީތަކުން މ. ކުނޫޒްގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޖުމްހޫރީ ޕާޓީގެ ސެކްރެޓަރީ ޖެނެރަލް އަހުމަދު ސަމީރު ވިދާޅުވީ ރައީސް ޔާމީންގެ ސަރުކާރު އައުމަށް ފަހު ފެނިގެންދަނީ އިސްލާމްދީނާ ދުރު ސިޔާސަތުތަކެއް ގެންގުޅުއްވާ ތަން ކަމަށާއި އެކަމުގެ އެއް މިސާލަކީ ކަޅުވަކަރުގެ މިސްކިތްގެ މައްސަލަ ކަމަށެވެ. އެގޮތުން ކަޅުވަކަރު މިސްކިތައް ވީނުވީއެއް ނޭނގޭ ކަމަށާއި ރައްޔިތުން މިސްކިތް ހޯދަން ނިކުންނަން ވެއްޖެ ކަމަށް އޭނާ ވިދާޅުވިއެވެ.
"މިއަދު ހިތާމައާ އެކު ދަންނަވަން ޖެހެނީ މި ފުރަ މާލެއިން މި ދެންނެވި ކަޅުވަކަރު މިސްކިތް ބެހެއްޓުމަށްޓަކައި މާލޭގެ ބިމުން ތަން ކޮޅެއް ނުދެވުނުކަމަކީ މި ސަރުކާރުން އިސްލާމްދީނާ ދިވެހި ރައްޔިތުންގެ ދީނީ އެއްބައިވަންތަ ކަމަށް ސަމާލުކަން ނުދޭކަން އަދި އިސްލާމްދީނަށް ސަރުކާރުން ގެންގުޅޭ ހަރުދަނާ ކަމެއް ނެތް ސިޔާސަތުގެ ފެށުންކަން އަޅުގަނޑުމެންނަށް ފާހަގަކުރެވޭ. މިދެންނެވި ކަންތައްތަކަށް ބަލާއިރު މިއަދު އެއްގޮތަކަށް ވެސް އަޅުގަނޑުމެންނަށް އެއްގޮތަކަށް ވެސް ނޭނގެ ކަޅުވަކަރު މިސްކިތުގައި ހުރި ތަކެތި ނުވަތަ އެ މިސްކިތުގެ ވަކަރުތަކާއި ނުވަތަ ސާމާނުތައް މިހާރުވީ ކޮންތަނެއްގައި ކަމެއް ވެސް ނޭނގެ އަދި މި ސަރުކާރުން ކޮރަޕްޝަނާއި ފަސާދައިގެ ތެރެއިން މިސްކިތް ވިއްކާލާ ނާޖައިޒު ފައިދާ ނެގީ ނޫން ކަމެއް ވެސް ނޭނގެ" ސަމީރު ވިދާޅުވިއެވެ.
ކަޅުވަކަރު މިސްކިތް 2016 ވަނަ އަހަރުގެ އޮގަސްޓް މަހު ރޫޅާލައިގެން ނެގީ ގދ. ތިނަދޫ ހުކުރު މިސްކިތް ހުރި ބިމުގައި އެ މިސްކިތް އަލުން ރާވައި ހުޅުވާނެ ކަމަށް ބުނެއެވެ. އެހެން ނަމަވެސް މިހާރު އަހަރަކަށް ވުރެ ގިނަ ދުވަސްވެފައިވާ އިރު އެ މިސްކިތް އަލުން ތިނަދޫގައި އަދި ބަހައްޓާފައެއް ނުވެއެވެ. އަދި އެ މިސްކިތް އެ ރަށުގައި ރޭވުމުގެ މަސައްކަތް ގޮސްފައިވާ ހިސާބެއް ވެސް އިނގޭ މީހަކު ނެތެވެ.
ކަޅުވަކަރު މިސްކިތަކީ މި ފަހުގެ ތާރީހެއްގައި އެ ތަނަކާ ގުޅޭ ގޮތުން އެންމެ ގިނަ އިން ވާހަކަ ދެކެވުނު އެއް މިސްކިތެވެ.
