ރެޑްބުލްއިން އިންތިޒާމު ކޮށްގެން ކޮންމެ އަހަރަކު ބާއްވަމުން އަންނަ "ނޭމާ ޖޫނިއަރސް ފައިވް" ފުޓްސަލް މުބާރާތުގެ ލ.ގަމުގެ ޗެމްޕިއަންކަން އަނދިރި އަނދިރިން ހޯދައިފިއެވެ.

މި ބުރުގައި ޖުމްލަ ނުވަ ޓީމެއް ބައިވެރިވިއިރު މި ބުރުގެ ކުޅުން ވެސް ކުރިޔަށް ގެންގޮސްފައިވަނީ ދެ ގްރޫޕަކަށް ޓީމުތައް ބަހާލައިގެންނެވެ. ލ.ފޮނަދޫއަށް ނިސްބަތްވާ ދެ ޓީމު ފައިނަލުގައި ވާދަކުރިއިރު ފައިނަލްގައި އަނދިރި އަނދިރިންނާއި ދެކޮޅަށް ކުޅެފައިވަނީ ބަރާސީލް އެފްސީއެވެ. މި މުބާރާތުގެ ޗެމްޕިއަންކަން އަނދިރި އަނދިރިން ހޯދީ ފައިނަލުގައި ބަރާސީލް 5-0 ގެ ނަތީޖާއަކުން ބަލިކޮށްގެންނެވެ. އަނދިރި އަނދިރި ފައިނަލް އިން ޖާގަ ހޯދީ ސެމީގައި ފޮއެމަތި އާއި ވާދަކޮށް 4-0 އިން ކާމިޔާބު ހޯދައިގެންނެވެ. ހަމައެހެންމެ ބަރާސީލް ފައިނަލްއަށް ދަތުރު ކުރީ ގުޗީ ގޭންގްގެ މައްޗަށް 4-1 އިން ކުރި ހޯދައިގެންނެވެ.

ގަމު ކޮލިފައިން ބުރުގެ ޗެމްޕިއަންކަން އަނދިރި އަނދިރިން ހޯދުމާއެކު އެ ޓީމަށް ވަނީ ގައުމީ ކޮލިފައިން ބުރުން ޖާގަ ލިބިފައެވެ. ގައުމީ ކޮލިފައިންއަށް ޓީމުތައް ހޮވުމަށް ރާއްޖޭގެ އެކި ސަރަހައްދުތަކުގައި ކޮލިފައިން ބުރުތައް ރެޑްބުލްއިން ކުރިޔަށް ގެންދާނެއެވެ. ގަމު ކޮލިފައިންގެ އިތުރުން ކުޅުދުއްފުށި، ގދ.ތިނަދޫ އަދި ފުވައްމަލަކުގެ އިތުރުން އައްޑޫ ސިޓީ ކޮލިފައިން ބުރުތައް ވަނީ ކާމިޔާބު ކަމާއެކު ނިންމާލާފައެވެ. ހަމައެހެންމެ ގއ ވިލިނގިލި އަދި މާލޭގައި ވެސް ރެޑްބުލްއިން ކޮލިފައިން ބުރުތައް ކުރިޔަށްގެންދާނެއެވެ. އަދި މި ޓީމުތަކުގެ މެދުގައި ކުޅޭ ގައުމީ ކޮލިފައިން ބުރުން އެއްވަނަ ހޯދާ ޓީމަށް ރާއްޖެ ތަމްސީލުކުރުމަށް ބްރެޒިލްއަށް ދިޔުމަށް ފުރުސަތު ލިބޭނެއެވެ.

ގައުމީ ކޮލިފައިންއިން އެއްވަނަ ހޯދާ ޓީމަކަށް ދުނިޔޭގެ 60 އަށް ވުރެ ގިނަ ގައުމުތަކާއެކު ކުރިޔަށް ގެންދާ ފައިނަލް ބުރުގައި ވާދަކުރުމުގެ ފުރުސަތު ލިބިގެންދާނެއެވެ. މިއަހަރުގެ ފައިނަލްވެސް އޮންނަނީ ބްރެޒިލްގައެވެ. މިދިޔަ އަހަރު މި މުބާރާތުގައި ރާއްޖެ ތަމްސީލުކުރީ ކްލަބް ޓީނޭޖްއިންނެވެ.

މި މުބާރާތުގެ ގަވާއިދު އޮންނަ ގޮތުން ކޮންމެ ޓީމެއްގައި ވެސް ކީޕަރާއެކު ހިމެނޭނީ ފަސް ކުޅުންތެރިންނެވެ. އަދި 10 މިނެޓަށް ކޮންމެ މެޗެއް ވެސް ކުޅެވިގެންދާއިރު އިދިކޮޅު ޓީމުން ޖަހާ ކޮންމެ ލަނޑަކަށް، ލަނޑު ވަން ޓީމުގެ ކުޅުންތެރިޔަކު ދަނޑުން ފައިބަންޖެހޭނެއެވެ.