ބަޔާންގައި މަޑުކޮށް އަހަރެންގެ ރެކޯޑު ލެވަންޑޯސީ މުގުރާލާނެ: ހެއިންކޭސް

ބަޔާން މިއުނިކަށް ކުޅެމުން އަންނަ ޕޮލެންޑްގެ ފޯވާޑް ރޮބަޓް ރެވަންޑޯސްކީ އެ ޓީމުގައި މަޑުކުރާނެ ކަމަށާއި އަދި އެ ޓީމުގެ ކޯޗު ޖުޕް ހެއިންކޭސް ގާއިމުކޮށްފައިވާ ލަނޑު ރެކޯޑު މުގުރާލާނެ ކަމަށް ހެއިންކޭސް ބުނެފިއެވެ.

ބަޔާންގެ ވާދަވެރި ބޮރޫޝިއާ ޑޯޓްމަންޑް ދޫކޮށް 2014 ވަނަ އަހަރު ބަޔާންއަށް ބަދަލުވުމަށް ފަހު ލެވަންޑޯސްކީ އަންނަނީ އެ ޓީމުގައި މޮޅު ކުޅުމެއް ދައްކަމުންނެވެ. އެގޮތުން ބަޔާންއަށް ކުޅުނު 184 މެޗުގައި 142 ލަނޑު އޭނާ ޖަހާފައިވާއިރު އޭނާއަކީ ދުނިޔޭގެ އެންމެ މޮޅު ފޯވާޑުންގެ ތެރޭގައި ގުނާލެވޭ ކުޅުންތެރިޔެކެވެ. މި ސީޒަނުގައި ވެސް އުމުރުން 29 އަހަރުގެ ފޯވާޑްގެ ފަރާތުން ފެންނަމުންދާ މޮޅު ކުޅުމާއެކު އޭނާ ހޯދުމަށް ސްޕެއިންގެ ރެއާލް މެޑްރިޑްއިން މަސައްކަތް ކުރަމުންދާ ކަމަށް ރިޕޯޓުތައް ބުނެއެވެ.

ނޫސްވެރިންނާއި ވާހަކަ ދައްކަމުން ބަޔާންގެ ކޯޗު ހެއިންކޭސް ބުނީ ސްޕެއިންގެ މީޑިއާގައި ވަރަށް ވާހަކަ ދެކެވޭ ކަމަށާއި އެއީ އެ ގައުމުގައި ކަން ހިނގާ ގޮތް ކަމަށެވެ. ހަމައެހެންމެ އޭނާ އެ ޓީމުގެ މަޑުކުރާނެ ކަމަށާއި އަދި ކުރިޔަށް އޮތް ދެ ސީޒަނުގައި އެނާ ގާއިމުކޮށްފައިވާ ލަނޑު ރެކޯޑު ލެވަންޑޯސްކީ މުގުރާލާނެ ކަމަށް ހެއިންކޭސް ބުނެފައިވެއެވެ. ހެއިންކޭސް ވަނީ ޖަރުމަނުގެ ފުރަތަމަ ޑިވިޝަނުގައި 220 ލަނޑު ޖަހާފައެވެ.

ހެއިންކޭސްގެ އިތުރުން ބަޔާންގެ ޗެއާމަން ކާލް ހެއިންޒް ރުމެނިގާ ވެސް ވަނީ ލެވަންޑޯސްކީ އެ ޓީމުގައި މަޑުކުރާނެ ކަމަށް ބުނެފައެވެ. ރުމެނިގާ ނޫސްވެރިންނާއި ވާހަކަ ދައްކަމުން ބުނެފައިވަނީ އަންނަ ސީޒަނުގައި ވެސް ބަޔާންގެ ޖާޒީއިން ލެވަންޑޯސްކީ ފެންނާނެ ކަމުގެ ފުރިހަމަ ޔަގީންކަން އެބައޮތް ކަމަށާއި އިތުރު ގޮތެއް ހޯދަންވީ އެއްވެސް ސަބަބެއް އޭނާއަށް ނުފެންނަ ކަމަށެވެ. ބަޔާންއިން ކުޅުންތެރިން ވިއްކާނީ އެ ކްލަބްއިން ބޭނުންވެގެން ކަން ހުރިހާ ޓީމަކުން ވެސް ދަންނަން ޖެހޭ ކަމަށާއި ލެވަންޑޯސްކީއަކީ އެއްވެސް ހާލެއްގައި ވިއްކާނެ ކުޅުންތެރިޔެއް ނޫންކަން ސާފުކޮށްދޭން ބޭނުންވާ ކަމަށް ރުމެނިގާ ބުނެފައިވެއެވެ.

ބަޔާން މިއުނިކްގެ ފޯވާޑް ލައިނުގައި އެންމެ މުހިންމު ދައުރު އަދާކުރަމުން އަންނަ ލެވަންޑޯސްކީ ވަނީ އެ ޓީމާއެކު ތިން ފަހަރެއްގެ މަތިން ބުންޑެސްލީގާ ކާމިޔާބު ކޮށްފައެވެ. ހަމައެހެންމެ އޭނާ ވަނީ އެ ޓީމާއެކު ޖަރުމަނު ކަޕް އަދި ޖަރުމަނު ސުޕާ ކަޕް ވެސް ކާމިޔާބު ކޮށްފައެވެ. އޭނާއަކީ ބަޔާންއަށް އެންމެ ގިނަ ލަނޑު ޖަހައިދިން ޖަރުމަނަށް ނިސްބަތްނުވާ ކުޅުންތެރިޔާ ވެސްމެއެވެ.