އަހަރެންގެ އެޖެންޓް ދެއްކި ވާހަކައަށް މައާފަށް އެދެން: ވެރާޓީ

ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ ވެރާޓީއާ ބެހޭ ގޮތުން އެޖެންޓް ޑޮނޭޓޯ ޑި ސަމްޕްލީ ދެއްކި ވާހަކަތަކަށް އޭނާ މައާފަށް އެދިއްޖެއެވެ.

ޕީއެސްޖީގެ ރަސްމީ ވެބްސައިޓަށް ދިން އިންޓަވިއުއެއްގައި ވެރާޓީ ބުނީ އޭނާގެ އެޖެންޓަށް ގޯހެއް ހެދިފައިވާ ކަމަށާއި، މީޑިއާތަކުގައި އޭނާއާ ބެހޭ ގޮތުން ތަފާތު ވާހަކަތަކެއް ފެތުރިފައިވާ ކަމަށެވެ. އެހެން ނަމަވެސް ވެރާޓީ ބުނީ އެޖެންޓް ދެއްކި ވާހަކަތަކަކީ ހަގީގަތެއް އޮތް ވާހަކަތަކެއް ނޫން ކަމަށެވެ.

ކްލަބުގެ ރައީސް، ކުޅުންތެރިން އަދި ސަޕޯޓަރުން ކިބައިން މައާފަށް އެދެމުން ވެރާޓީ ބުނީ އޭނާ މިހާރު ކްލަބުގެ ފަރިތަކުރުންތަކަށް ވެސް ނިކުމެފައިވާ ކަމަށާއި، ކްލަބުގައި އޭނާ ހުރީ ވަރަށް ހިތްހަމަޖެހިގެން ކަމަށެވެ. މީގެ އިތުރުން އޭނާ ބުނީ ކްލަބު ދެކެ ވަރަށް ލޯބިވާ ކަމަށާއި، ކްލަބަށް ވަރަށް އިތުބާރު ވެސް ކުރާ ކަމަށެވެ.

ވެރާޓީގެ އެޖެންޓް ނޫސްވެރިންނަށް މައުލޫމާތު ދެމުން ބުނީ ވެރާޓީއަކީ ޕީއެސްޖީގައި ހުރި ގައިދީއެއް ކަމަށާއި، އޭނާ އެހެން ކްލަބަކަށް ދޫކޮށްލަން އެ ކްލަބުން އެއްބަސްނުވާ ކަމަށެވެ. އެހެންނަމަވެސް މިކަމާ ވެރާޓީ ދެކޮޅު ހަދައެވެ.

ބާސެލޯނާ އަދި މެންޗެސްޓާ ޔުނައިޓެޑުން ވެސް ހޯދުމަށް މަސައްކަތްކުރަމުން އަންނަ ވެރާޓީ ހޯދަން ޖަރުމަން އަދި އިޓަލީގެ ކްލަބްތަކުން ވެސް އަންނަނީ މަސައްކަތްކުރަމުންނެވެ. މީގެ އިތުރުން ވެރާޓީ ހޯދުމަށް މަސައްކަތްކުރަމުން އަންނަކަން ބާސާ އިންވެސް ވަނީ ކަށަވަރުކޮށްދީފައެވެ.

އެހެންނަމަވެސް ޕީވެރާޓީ ވިއްކާލަން ބޭނުން ނުވާ ކަމަށާއި، ދިގު މުއްދަތެއްގައި ކްލަބުގައި ވެރާޓީ ބަހައްޓަން އެސްޖީގެ ކޯޗު ކާލޯ އެންޗޮލޮޓީ ބޭނުންވާ ކަމަށް ރިޕޯޓްތައް ބުނެއެވެ.

ޕީއެސްޖީއާ 2012 ވަނަ އަހަރު ގުޅުނު ވެރާޓީ ވަނީ އެ ކްލަބުގައި 2020 ވަނަ އަހަރުގެ ނިޔަލަށް މަޑުކުރަން ނިންމާފައެވެ. އެގޮތުން ދާދި ފަހުން ނޫސްވެރިންނާ ބައްދަލުކޮށް ވާހަކަ ދައްކަމުން ވެރާޓީ ބުނީ މީގެ ހަތަރު އަހަރު ކުރިން އޭނާ ޕީއެސްޖީއަށް ބަދަލުވީ ދުނިޔޭގެ އެންމެ ޝަރަފުވެރި އެއް މުބާރާތް ކާމިޔާބުކުރުމުގެ އަޒުމުގައި ކަމަށާއި، އަދިވެސް އެ ހުވަފެން ހަގީގަތަކަށް ހަދަން އޭނާ ބޭނުންވާ ކަމަށެވެ.

ވެރާޓީ ވަނީ ޕީއެސްޖީއާއެކު ހޭދަކުރި ފަސް ސީޒަނުގައި 201 މެޗު ކުޅެދީ ހަ ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ އިޓަލީ ގައުމީ ޓީމަށް ކުޅުނު 21 މެޗުގައި އެއް ލަނޑު ކާމިޔާބުކޮށްފައެވެ. ވެރާޓީ ވަނީ ހަތަރު ލީގު ތަށި، ދެ ލީގް ކަޕް، ހަތަރު ފްރެންޗް ސުޕާކަޕް ކާމިޔާބުކޮށްފައެވެ. މީގެ އިތުރުން އޭނާ ވަނީ ސެރީއާ ބީގެ ޕެސްކާރާއާ އެކު ވެސް ގިނަ ކާމިޔާބީތައް ހޯދާފައެވެ.