އެކު މޮނާކޯ އަށް ކުޅެމުން އަންނަ ފްރާންސްގެ ސްޓްރައިކަރު ކީލިއަން އެމްބަޕޭ ހޯދުމަށް ރެކޯޑު ފީއަކާ ރެއާލް މެޑްރިޑުން އެއްބަސްވެއްޖެ ކަމަށް ރިޕޯޓްތައް ބުނެފި އެވެ.

ސްޕެއިންގެ މަޝްހޫރު ކުޅިވަރު ނޫހެއް ކަމަށްވާ  މާސާ އިން ބުނީ ހަ އަހަރު ދުވަހުގެ އެއްބަސްވުމެއްގެ ދަށުން 180 މިލިއަން ޔޫރޯ އަށް އެމްބަޕޭ ގަންނަން ރެއާލް އިން އެއްބަސްވެފައިވާ ކަމަށެވެ.

މި ޓްރާންސްފާއާ އެކު ދުނިޔޭގެ އެންމެ އަގުބޮޑު ޓްރާންސްފާ ރެކޯޑު މުގުރިގެންދާއިރު، އެމްބަޕޭގެ ޓްރާންސްފާއާ ގުޅިގެން މޮނާކޯ އަދި ރެއާލް ވެސް އެއްބަސްވުމަކަށް އައިސްފައިވާ ކަމަށް މާސާ އިން ބުނެއެވެ.

އެމްބަޕޭ ހޯދުމަށް ދުނިޔޭގެ ބޮޑެތި ގިނަ ކްލަބްތަކުން މަސައްކަތްކުރަމުން އަންނައިރު، މޮނާކޯ އިން އަންނަނީ ތަކުރާރުކޮށް ހުށަހެޅުންތައް ރިޖެކްޓްކުރަމުންނެވެ. މީގެއިތުރުން އެ ކްލަބުން ބުނީ އެމްބަޕޭ އަކީ ވިއްކާ ކުޅުންތެރިޔެއް ނޫން ކަމަށެވެ.

މިދިޔަ އަހަރު މޮނާކޯއާ އެކު ތިން އަހަރު ދުވަހުގެ އެއްބަސްވުމެއް ހަދާފައިވާ އެމްބަޕޭ ޓްރާންސްފާ ބާޒާރުގައި ކްލަބް ބަދަލުކުރާނެ ކަމަށް ވަނީ ބެލެވިފައެވެ. އެހެން ނަމަވެސް އޭނާ ބަދަލުވާނީ ކޮން ކްލަބަކަށް ކަން އަދި ކަށަވަރެއް ނުވެއެވެ.

އުމުރުން 18 އަހަރުގެ އެމްބަޕޭ މޮނާކޯއާ އެކު އޭނާގެ ސީނިއާ ކެރިޔަރު ފަށާފައިވާއިރު، މިހާތަނަށް އޭނާ ވަނީ އެޓީމާއެކު ހޭދަކުރި ދެ ސީޒަނުގައި ކުޅުނު 58 މެޗުގައި 27 ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ އެޓީމާއެކު މި ސީޒަނުގައި ލީގު ވެސް ކާމިޔާބުކޮށްފައެވެ.

ފްރާންސްގެ ސީނިއާ ޓީމަށް ހަތަރު މެޗު ކުޅެފައިވާ އެމްބަޕޭ ވަނީ ފްރާންސްގެ 19 އަހަރުން ދަށުގެ ޓީމާއެކު މިދިޔަ އަހަރު 19 އަހަރުން ދަށުގެ ޔޫރޯ ފުޓުބޯޅަ މުބާރާތް ވެސް ކާމިޔާބުކޮށްފައެވެ. އޭނާ ވަނީ މިދިޔަ ސީޒަނުގެ ފްރާންސްގެ އެންމެ މޮޅު ޒުވާން ކުޅުންތެރިޔާގެ މަގާމު ވެސް ހޯދާފައެވެ.