ކުރިމަގާ މެދު ގޮތެއް ނިންމާފައިވާ ކަމަށް އެވަޓަން އަށް ކުޅެމުން އަންނަ ބެލްޖިއަމްގެ ފޯވާޑް ރޮމެލޫ ލުކާކޫ ބުނެފި އެވެ.

ސްކައި ސްޕޯޓްސް އަށް ދިން އިންޓަވިއުއެއްގައި މެންޗެސްޓާ ޔުނައިޓެޑް އަދި ޗެލްސީން ހޯދުމަށް މަސައްކަތްކުރަމުން އަންނަ ލުކާކޫ ބުނީ އޭނާ އާއި އޭނާގެ އެޖެންޓަށް ދެން ވާން އޮތް ގޮތް އެނގޭ ކަމަށާއި، މާގިނަ ދުވަސްތަކެއް ނުވެ އެކަން އެންމެންނަށް އެނގިގެންދާނެ ކަމަށެވެ.

ލުކާކޫ ވަނީ އެކިފަހަރުގެ މަތިން އެވަޓަންއާއެކު އޭނާގެ އެއްބަސްވުން އިތުރުކުރުމަށް މަޝްވަރާކޮށްފައެވެ. އެހެންނަމަވެސް ރިޕޯޓްތައް ބުނާގޮތުން ލުކާކޫ ބޭނުންވާގޮތަށް އަދިވެސް އެވަޓަންއަށް އެއްބަސްވުން ނެހެދެއެވެ.

ލުކާކޫ ބުނީ ކްލަބާއެކު އޭނާ ހަދާފައިވާ އެއްބަސްވުންވެސް އެބަ އޮތް ކަމަށާއި، މިވަގުތު އޭނާ ބޭނުންވަނީ ކުރިޔަށް އޮތް ސީޒަނަށް ތައްޔާރުވުމުގެ ގޮތުން ޗުއްޓީއެއް ނެގުމަށް ކަމަށެވެ. އެގޮތުން މިދިޔަ ސީޒަނަށްވުރެ ވަރުގަދަޔަށް ކުރިޔަށް އޮތް ސީޒަނަށް ތައްޔާރުވުމަކީވެސް ބޭނުންވާކަމެއްކަމަށް އޭނާ ވަނީ ބުނެފައެވެ.

އެންމެ މުހިންމީ ޓްރޮފީސްތައް ހޯދުންކަމަށް ފާހަގަކުރަމުން ލުކާކޫ ބުނީ އޭނާ ބޭނުންވަނީ ޕްރިމިއާ ލީގު ކާމިޔާބުކޮށް ޗެމްޕިއަންސް ލީގުގައި ކުޅުމަށް ކަމަށާއި، އެއީ ކުޅުންތެރިޔެއްގެ ހައިސިއްޔަތުން ބޭނުންވާނެ ކަމެއް ކަމަށެވެ.

ރިޕޯޓްތައް ބުނާގޮތުން އުމުރުން 23 އަހަރުގެ ލުކާކޫ ޗެމްޕިއަންސް ލީގު ކުޅުމުގެ ފުރުސަތު ހޯދުމަށް އޭނާ ކުރިޔަށް އޮތް ސީޒަނަށް އެހެން ކްލަބަކަށް ބަދަލުވާނެ ކަމަށް ވަނީ ބެލެވިފައެވެ.

ޗެލްސީން 2014 ވަނަ އަހަރު އެވަޓަންއަށް ބަދަލުވި ލުކާކޫ ވަނީ ވެސްޓްބްރޮމް އަށް ވެސް ކުޅެފައެވެ. ޗެލްސީއާއެކު ދެ ސީޒަން ހޭދަކޮށްފައިވާ ލުކާކޫ ވަނީ އެ ޓީމަށް 15 މެޗު ކުޅެދީފައެވެ.

މީގެއިތުރުން އޭނާ ވަނީ މިވީތަނަށް އެވަޓަން އަށް ކުޅުނު 166 މެޗުގައި 87 ލަނޑު ކާމިޔާބުކޮށްފައެވެ. މީގެއިތުރުން އޭނާ ވަނީ ބެލްޖިއަމް ޓީމަށް ކުޅުނު 56 މެޗުގައި 20 ލަނޑު ކާމިޔާބުކޮށްފައެވެ.