މެންޗެސްޓާ ޔުނައިޓެޑް ދޫކޮށް އެމެރިކާގެ އެލްއޭ ގެލެކްސީއަށް ބަދަލުވި ސްވިޑެންގެ ފޯވާޑް އިބްރަހިމޮވިޗްގެ ބަދަލުގައި އެ ޓީމަށް އާ ފޯވާޑެއް ނުގެންނާނެ ކަމަށް އެ ޓީމުގެ ކޯޗު ހޯސޭ މޮރީނިއޯ ބުނެފިއެވެ.
ޔުނައިޓެޑާއެކު ހަދާފައިވާ ކޮންޓްރެކްޓް އުވާލުމަށްފަހު އިބްރަހިމޮވިޗް އެލްއޭ ގެލެކްސީއަށް ބަދަލުވެފައިވާއިރު އެ ޓީމަށް އޭނާ މި ސީޒަނުގައި ކުޅެފައިވަނީ އެންމެ ހަތް މެޗެވެ. އިބްރަހިމޮވިޗް ޔުނައިޓެޑަށް ކުޅުނު 53 މެޗުގައި 29 ލަނޑު ކާމިޔާބުކުރިއިރު އެ ޓީމަށް ޔުއެފާ ޔުރޮޕާ ލީގު ކާމިޔާބުކޮށްދިނުމުގައި އޭނާ މުހިންމު ދައުރެއް އަދާކުރިއެވެ. މި ސީޒަނުގައި ޔުނައިޓެޑްގެ ފޯވާޑް ލައިން ބަލަހައްޓަމުން އަންނަނީ ބެލްޖިއަމްގެ ފޯވާޑް ރޮމެލޫ ލުކާކޫ ކަމަށްވާއިރު އޭނާއަށް އަނިޔާއެއް ވެއްޖެނަމަ އޭނާގެ ބަދަލުގައި ކުޅޭނެ ކުޅުންތެރިޔަކު އިބްރަހިމޮވިޗް ދިޔުމާއެކު އެ ޓީމުގައި ނެތެވެ.
ނޫސްވެރިންނާއި ވާހަކަ ދައްކަމުން މޮރީނިއޯ ބުނީ ފޯވާޑުންގެ ގޮތުގައި ލުކާކޫ އަދި މާކަސް ރަޝްފޯޑަށް ކުޅެވޭނެ ކަމަށާއި އަދި ރަޝްފޯޑަކީ ދެ ފަޅިޔަށްވެސް ކުޅުމުގެ ގާބިލުކަން ލިބިފައިވާ ކުޅުންތެރިޔެއް ކަމަށެވެ. އޭނާ ބުނީ އާސެނަލް ދޫކޮށް އެ ޓީމާއި ގުޅުނު އެލެކްސިސް ސަންޗޭޒްއަށް ވެސް އެ މަގާމަށް ކުޅެވޭނެ ކަމަށާއި ހަމައެހެންމ މާޝިއާލްއަކީ ވެސް އެ ތަނަށް ކުޅެވޭނެ ކުޅުންތެރިޔެއް ކަމަށެވެ. އޭނާ ބުނީ ލުކާކޫ ނެތަސް އެ މަގާމުގެ ޒިންމާ އަދާކުރެވޭނެ ތިން ކުޅުންތެރިން ސްކޮޑުގައި ތިބުމަކީ ލިބޭ ހިތްހަމަޖެހުމެއް ކަމަށެވެ.
މި ސީޒަނުގައި ޔުނައިޓެޑަށް އެންމެ ގިނަ ލަނޑު ޖަހައިދިނީ ލުކާކޫ ކަމަށްވާއިރު އޭނާ ނެތް ހާލަތެއްގައި ޓީމުގެ ކުޅުމުގެ ވައްޓަފާޅި ބަދަލުކުރަން ވެސް ތައްޔާރު ކަމަށް ވެސް މޮރީނިއޯ ބުނެފައިވެއެވެ. އޭނާ ބުނީ އިތުރު ކުޅުންތެރިޔެއް ޓީމަށް ބޭނުންވާ ކަމަށް ގަބޫލުނުކުރާ ކަމަށާއި ޓީމުގައި މިހާރު ތިބި ކުޅުންތެރިންނާއެކު ލަނޑު ޖެހޭނެ ކަމުގެ ޔަގީންކަން އެބައޮތް ކަމަށެވެ. އަދި ވަކި ހާއްސަ ހާލަތުތަކުގައި ކުޅޭ ސިސްޓަމް ނުވަތަ ފޯމޭޝަން ބަދަލުކުރަން ޖެހިދާނެ ކަމަށް ވެސް މޮރީނިއޯ ބުނެފައިވެއެވެ.
ޔުނައިޓެޑާ އިބްރަހިމޮވިޗް ގުޅިފައި ވަނީ 2016 ވަނަ އަހަރު ފްރާންސްގެ ޕީއެސްޖީގައި ބޮޑެތި ކާމިޔާބުތަކެއް ހޯދުމަށް ފަހުއެވެ. މިދިޔަ ހޫނު މޫސުމުގެ ޓްރާންސްފާ މާކެޓުގައި އިބްރަހިމޮވިޗް ހޯދުމަށް ގިނަ ކްލަބްތަކުން މަސައްކަތްކުރިއެވެ. އެހެންނަމަވެސް ޔުނައިޓެޑުން ވަނީ އިބްރާހިމޮވިޗް ދޫކޮށްލުމަށް ފަހު، އަލުން އަނބުރާ އޭނާއާ އެކު އެއްބަސްވުމަކަށް އައިސް ސޮއި ހޯދާފައެވެ. އޭނާ ވަނީ އެ ޓީމާއެކު އިނގިރޭސި ލީގު ކަޕާއި އެފްއޭ ކޮމިއުނިޓީ ޝީލްޑް އަދި ޔުއެފާ ޔުރޮޕާ ލީގު ކާމިޔާބުކޮށްފައެވެ. އޭނާއަކީ އަބަދުވެސް މޮރީނިއޯ ވަރަށް ގަޔާވާ ކުޅުންތެރިޔެކެވެ.
