މެންޗެސްޓަރ ޔުނައިޓެޑްގެ ޑިފެންޑަރ ލޫކް ޝޯ ކްލަބަށް ދޭ ކޮމިޓްމެންޓާ މެދު އެކުލަބުގެ ކޯޗު ހޯސޭ މޮރީނިއޯ ސުވާލު އުފައްދައިފިއެވެ.

ލޫކް ޝޯ މި ސީޒަނުގައި މިހާތަނަށް ޔުނައިޓެޑަށް ކުޅެފައިވަނީ އެންމެ 15 މެޗެވެ. އަދި މިދިޔަ މަހު ބޯންމައުތްއާ ދެކޮޅަށް ކުޅެ 1-1 އެއްވަރު މެޗަށް ފަހު އޭނާ އެއްވެސް މެޗަކުން ފެނިފައެއް ނުވެއެވެ.

މޮރީނިއޯ ބުނެފައި ވަނީ ޔުނައިޓެޑްގެ އެހެން ޑިފެންޑަރުން ކަމަށްވާ އޭޝްލީ ޔަންގގެ އިތުރުން ޑަރމައިން އަދި ބްލިންޑާ އަޅާބަލާއިރު ލޫކް ޝޯގެ ޚާއްސަ ގޮތެއް ބަހައްޓަންޖެހޭ ވަރަށް އޭނާ މަސައްކަތް ރަނގަޅު ނޫން ކަމަށެވެ.

"އަހަންނަކަށް އޭނާ ޓްރެއިނިންތަކުގައި އެދައްކާ ކުޅުމާއި ކޮމިޓްމެންޓަށް ބަލާފައި ނެތް ބުނެވޭކަށް ރަނގަޅަކޭ. އެހެން ކުޅުންތެރިންނަށްވުރެ މާ ބޮޑަށް ފަހަތުގައި މިހާރު ޝޯ ހުރީ،" މޮރީނިއޯ ބުނެފައި ވެއެވެ.

އިނގިރޭސި ކުޅުންތެރިންގެ ފަރާތުން އިތުރަށް މަސައްކަތްތައް ފެންނަން އެދޭ ތޯ ނޫސްވެރިއަކު ސުވާލު ކުރުމުން މޮރީނިއޯ ބުނީ މެންސިޓީގެ ކުރީގެ ކީޕަރު ހާޓްއަކީ ވެސް އިނގިރޭސި ކުޅުންތެރިއެއް ކަމަށާއި އެކަމަކު އޭނާ ކުޅެނީ ލޯން އެއްބަސްވުމެއްގެ ދަށުން އިޓަލީގައި ކަމަށެވެ.

މޮރީނިއޯގެ މިވާހަކަތަކުން ކައިރި މުސްތަގްބަލެއްގައި ލޫކްޝޯ އެހެން ކުލަބަކަށް ލޯނުގެ އުސޫލުން ދޫކޮށްލަފާނެ ކަމަށް ބެލެވެއެވެ.

ލޫކްޝޯ ޔުނައިޓެޑަށް ސޮއިކުރީ 27 މިލިއަން ޕައުންޑަށް 2014 ވަނަ އަހަރުއެވެ. ނަމަވެސް 2015 ވަނަ އަހަރުގެ ޗެމްޕިއަންސްލީގުގައި ކުޅެނިކޮށް އޭނާގެ ފައިގެ ދެތަނަކުން ބިންދައިގެން ދިޔުމުގެ ސަބަބުން ދިގުމުއްދަތަކަށް ކުޅުމާ ދުރަށްދާން ޖެހުނެވެ.