ފާރިސްގެ ޖަލު ގޮޅިތެރޭގައި ކެމެރާ އަޅާފައި ހުރުމަކީ އިންސާނިއްޔަތާ ޚިލާފް ކަމެއް: އެޗްއާރްސީއެމް
15 މާރިޗު 2018 | ބުރާސްފަތި 20:42ގޮޅިތަކަކީ އިންސާނުން ބޭތިއްބުމަށް ފުރިހަމަ ވާންޖެހޭ އެންމެ އަސާސީ މިންގަނޑުތަކަށް ނުފެތޭ ގޮޅިތަކެއް
ފާރިސް މައުމޫން
ކުއްލި ނުރައްކަލުގެ ޙާލަތުގެ ދަށުން ހައްޔަރުކޮށްފައިވާ މީހުން ބައިތިއްބާފައި ތިބި ޖަލު ގޮޅިތަކުގެ އެތެރެ އަބަދު ފެންނަ ގޮތައް ކެމެރާ ހަރުކޮށްފައި ހުރުމަކީ ޓޯޗަރގެ ޢަމަލެއް ކަމަށް ރާއްޖޭގެ ހިއުމަން ރައިޓްސް ކޮމިޝަނުން ބުނެފިއެވެ.
އެކޮމިޝަނުން މިހެން ބުނެފައިވަނީ މިހާރު ޖަލުގައި ހައްޔަރުކޮށްފައިވާ ދިއްގަރު ދާއިރާގެ މެންބަރު އަހުމަދު ފާރިސް މައުމޫނާއި، އެކޮމިޝަނުން ބައްދަލުކޮށް ދެއްކެވި ވާހަކައިގައެވެ.
އެޗްއާރްސީއެމުން ފާރިސްއާ ބައްދަލުކުރި ކުރުމާ ގުޅޭގޮތުން ފާރިސްގެ ޤާނޫނީ ވަކީލުން ނެރުއްވި ބަޔާނުގައި ބުނެފައިވާ ގޮތުގައި މި ބައްދަލުވުމުގައި އަޙްމަދު ފާރިސް މައުމޫންވަނީ ކުރިން ފެށިގެން ކޮމިޝަންއާ ޙިއްސާ ކުރަމުންއައި ކަންބޮޑުވުންތަކަށް އެދެވޭ ޙައްލެއް ލިބިފައިނުވާތީ އެކަމުގެ ކަންބޮޑުވުން ފާޅުކުރައްވާފައެވެ. އަދި ފާރިސް ހައްޔަރުކޮށްފައި ހުރީ ޤާނޫނާ ޚިލާފަށް އިޢުލާނުކުރެވިފައިވާ ކުއްލި ނުރައްކަލެއްގެ ޙާލަތެއްގެ ދަށުން، ކަނޑައެޅިގެން ޤާނޫނުތަކާ ޚިލާފަށްކަމަށްވާއިރު އެކަމުގައި ހިއުމަން ރައިޓްސް ކޮމިޝަންއިން ދެކެވަޑައިގަންނަވާ ގޮތެއް ސާފުކޮށްދެއްވުމަށް އެދިވަޑައިގަތުމުން ރާއްޖޭގައި ކުއްލި ނުރައްކަލުގެ ޙާލަތު އިޢުލާނުކުރެވިފައިވަނީ ރަނގަޅަށްތޯ ނުވަތަ ނޫންތޯ ހިއުމަންރައިޓްސް ކޮމިޝަންއިން ދިރާސާކުރައްވަމުން ގެންދަވާކަމަށާއި، އެ ދިރާސާ ނިމުމުން އެކަމަށް ޖަވާބު ދެއްވާނޭ ކަމަށް ވިދާޅުވެފައިވާ ކަމަށެވެ.
އަދި ކުއްލި ނުރައްކަލުގެ ޙާލަތު އިޢުލާނުކުރެވިގެން ބަންދުކުރެވުނުތާ މިހާރު 38 ދުވަސް ވަނީ ކަމަށާއި، އަޙްމަދު ފާރިސް މައުމޫން ޒިންމާވާންޖެހޭ އާޢިލާއެއް އެބަ އޮތްކަމާއި، އެފަދަ ޒިންމާތައް އަދާނުކުރެވޭނޭ ޙާލަތެއް އުފެދިފައި އޮތްއިރު، ގެއްލިގެންދަނީ ހަމައެކަނި ބަންދުކުރެވިފައި ހުންނަ މީހާގެ ޙައްޤު ނޫންކަމާއި، މުޅި އާޢިލާއަށްވެސް އޭގެ ނޭދެވޭ އަސަރު އަބަދަށް ކުރާނެތީ، ހިއުމަން ރައިޓްސް ކޮމިޝަންއިން އެކަން އެހާ ލުއިކޮށް ނުނެންގެވުމަށް ފާރިސް މައުމޫން ކޮމިޝަންގެ މެންބަރުން އަރިހުން އެދިވަޑައިގަތްކަމަށެވެ.
އެކޮމިޝަނުން ބުނިގޮތުގައި ފާރިސް ދޫނިދޫގައި ބާއްވާފައި އޮންނަ ގޮޅީގެ ޙާލަތު ވިދާޅުވުމުން ހިއުމަންރައިޓްސް ކޮމިޝަންގެ މެންބަރުން ވިދާޅުވެފައިވަނީ އެ ގޮޅި ތަކަކީ އިންސާނުން ބޭތިއްބުމަށް ފުރިހަމަވާންޖެހޭ އެންމެ އަސާސީ މިންގަނޑުތަކަށް ނުފެތޭ ގޮޅިތަކެއްކަމަށް އެކޮމިޝަންއިން ކަނޑައަޅުއްވައި، އެވާހަކަ ހޯމް މިނިސްޓްރީއާއި، މޯލްޑިވްސް ޕޮލިސް ސަރވިސްއާއި، ރައީސުލްޖުމްހޫރިއްޔާގެ އޮފީހުގައިވެސް ދަންނަވާފައިވާނޭކަމަށް ވިދާޅުވެފައިވާ ކަމަށެވެ. އަދި ފާރިސް ބަހައްޓާފައި ހުންނަ ގޮޅީގައި ކެމެރާ ހަރުކޮށްގެން 24 ގަޑިއިރު ހަރަކާތްތައް ބަލަމުން ގެންދިއުމަކީ ޓޯޗަރގެ ޢަމަލެއްކަމަށް ހިއުމަންރައިޓްސް ކޮމިޝަންއިން ދެކެވަޑައިގަންނަވާކަމަށާއި، ކެމެރާތައް ހަރުނުކުރުމަށް މޯލްޑިވްސް ޕޮލިސް ސަރވިސްއަށްވެސް ދަންނަވާފައިވާނޭކަމަށް އެ ކޮމިޝަންގެ މެންބަރުން ވިދާޅުވެފައިވާ ކަމަށް އެބަޔާނުގައި ބުނެފައިވެއެވެ.
މީގެ އިތުރުން، ދޫނިދޫގައި 3 ބުރިއަށް ހަދާފައިވާ ޢިމާރާތުގައި ހުންނަ ގޮޅިތަކަކީ އިރުގެ އަލިކަން ނުވަންނަ ގޮޅިތަކެއްކަމަށްވާއިރު، އެ ގޮޅިތަކުގައި މީހުން ބޭތިއްބުމަކީ ހަމުގެ ބަލިތަކަށް ހުށަހެޅިގެން ހިނގައިދާނޭ ކަމެއްކަމަށްވާތީ އެކަންވެސް މޯލްޑިވްސް ޕޮލިސް ސަރވިސްއާއި، ކަމާ ގުޅުންހުރި އެންމެހައި އިދާރާތަކަށް ދަންނަވާފައިވާނޭކަމަށް އެޗްއާރްސީއެމްގެ މެންބަރުން ވިދާޅުވެފައިވެއެވެ. ދޫނިދޫގައި ބަންދުކޮށްފައިތިބޭ މީހުން ގޮޅީގެ ފާހާނާ ތެރޭގައި ހުންނަ އިސްކުރަކުން ފެން ނަގައިގެން ބޯންޖެހުމަކީ ޤަބޫލުކުރެވޭނޭ ކަމެއް ނޫންކަމަށާއި، އޭގެ ބަދަލުގައި، ސިއްޙީ ގޮތުން ރައްކާތެރި، ސާފުތާހިރު ފެން ފުޅިފުޅީގައި ފޯރުކޮށްދެވޭނެ އިންތިޒާމު ހަމަޖައްސައިދިނުމަށް މޯލްޑިވްސް ޕޮލިސް ސަރވިސްއަށް އަންގަވާފައިވާނޭކަމަށް ހިއުމަންރައިޓްސް ކޮމިޝަންގެ މެންބަރުން ވިދާޅުވިކަމަށްވެސް ވަކީލުންގެ ބަޔާނުގައި ވެއެވެ.
އެބަޔާނުގައި ބުނެފައިވާ ގޮތުގައި ފާރިސް މައްޗަށް ހިންގި ޝަރީޢަތަކީވެސް ފުލުހުން ރާވައިގެން ހިންގި ޖަރީމާއެއްކަން މިހާތަނަށް ޝަރީޢަތުގައި ކަންހިނގާފައިވާ ގޮތަށް ބެލުމުން ސާފުވާއިރު، ފުލުހުންނަށް އިތުރަށް އިތުބާރުނުކުރެވޭނޭކަމަށް ފާރިސް ވިދާޅުވެފައިވާ ކަމަށާއި ކޮންމެ ގޮތަކުންވެސް އަޙްމަދު ފާރިސް މައުމޫންގެ މައްޗަށް ކުށް ސާބިތުކުރުމަށާއި، ޖަލުގައި ބޭއްވުމަށް ރޭވުންތައް ރާވަމުންދާކަން ކަންހިނގަމުންދާ ގޮތަށް ބެލުމުން ސާފުވާކަމަށާއި، އެކަން ހުއްޓުވައިދިނުމަށް މިހާރަށްވުރެ ބޮޑަށް މަސައްކަތްކޮށްދެއްވުމަށް މެންބަރުންގެ ކިބައިން ފާރިސް އެދިވަޑައިގެންނެވި ކަމަށެވެ.
ވަކީލުން ވިދާޅުވީ ބަންދުކޮށްފައި އޮންނައިރު، ލިޔާނޭ ކަރުދާހާއި ގަލަން ލިބޭނޭ އިންތިޒާމު ހަމަޖައްސައި ދެއްވުމަށް ތަކުރާރުކޮށް އެދިވަޑައިގެންނެވި ނަމަވެސް އެއްވެސް ސަބަބެއް އެންގެވުމެއްނެތި އެތަކެތި ފޯރުކޮށްނުދޭކަމަށާއި، ކާން ގެންނަ ތަކެތި ބާލިދީތަކަށް ލައިގެން އުފުލާހަދާއިރު، ކާން ގެނެސްދޭ މީހުންނާއި، ކެއުން އަޅައިދިނުމުގައިވެސް އެއްވެސް ސާފުތާހިރުކަމެއް ނުހުންނަކަމަށްވެސް ފާރިސް މައުމޫން ވިދާޅުވިކަމަށެވެ. އެކަހަލަ އެތައް މައްސަލަތަކަކާ ގުޅިގެން މިހާރު ފާރިސް ހުންނެވީ ބަނޑުހައިހޫނުކަމުގެ ހަޅުތާލެއްގައިކަމަށާއި، މިދިމާވަމުންދާ ކަންކަމުގެ ބޮޑުކަން، މިފަދަ ފިޔަވަޅެއް އަޅުއްވައިގެން މެނުވީ ކަމާގުޅޭ މުއައްސަސާތަކަށް އިޙްސާސް ނުވާނޭކަމަށް ފެނިވަޑައިގަތީކަމަށް ފާރިސް ވިދާޅުވިކަމަށް އެބަޔާނުގައި ބުނެފައިވެއެވެ.
މީގެ އިތުރުން ދޫނިދޫގައި ތިބޭ ފުލުހުންގެ އިސްވެރިންނަށް އިތުބާރު ނުކުރެވޭތީ ހިއުމަން ރައިޓްސް ކޮމިޝަންގެ މުވައްޒަފުން އަބަދުވެސް ދޫނިދޫގައި ތިބޭކަހަލަ އިންތިޒާމެއް ހަމަޖައްސަވައި ދެއްވުމަށްވެސް ފާރިސް ވަނީ ކޮމިޝަންގެ މެންބަރުން އަރިހުން އެދިވަޑައިގެންފައެވެ.
މިހާރު ރާއްޖޭގެ ޙާލަތު އޮތްގޮތުން ހިއުމަން ރައިޓްސް ކޮމިޝަންގެ މެންބަރުން ބައެއް ފަހަރަށް ހަނު ތިއްބަވާ ސަބަބު ވިސްނިވަޑައިގަންނަވާކަމަށް ވިދާޅުވަމުން ސަރުކާރުން ހިންގަވަމުން ގެންދަވާ ލާއިންސާނީ އަނިޔާތަކާއި، ބޭއިންސާފު ޢަމަލުތަކުގެ މައްސަލަތަކުގައި ހަނު ހުންނެވުމަކީ ފާރިސްއަށްވެސް އޮތް އިޚްތިޔާރެއްކަމަށާއި، އެހެން އެކަން ކުރައްވައިގެން ހުންނެވިނަމަ މިއަދު ހުންނަވާނީ އާޢިލާއާއެކު ސަލާމަތުންކަމަށް ފާރިސް ވަނީ ވިދާޅުވެފައެވެ. އެހެންނަމަވެސް އިޚްތިޔާރު ކުރެއްވީ، ގޯހަކީ ގޯހޭ ވިދާޅުވުމުގެ ހިތްވަރު ދެއްކެވުމަށް ކަމަށް ފާރިސް ވިދާޅުވެފައިވާކަމަށް ބަޔާނުގައި ވަނީ ބުނެފައެވެ.
ދިވެހިރާއްޖޭގައި އިންސާނީ ޙައްޤުތަކަށް އަރައިގަތުން ހައްދުފަހަނައަޅައި ގޮސްފައިވާކަމަށާއި، އެފަދަ ކަންކަމުގައި ހިއުމަން ރައިޓްސް ކޮމިޝަންއިން ސަރުކާރުގެ ފަރާތްތަކާ ބައްދަލުކުރައްވައި ޙައްލު ހޯއްދެވުމަށް ސިއްރިޔާތުގައި މަސައްކަތްކުރެއްވުމުގެ ބަދަލުގައި ކެރިވަޑައިގެން ހަރުކޮށް ބަސް ވިދާޅުވެ، ސީދާ ރައްޔިތުންނާ މަޢުލޫމާތު ހިއްސާކުރެއްވުމަށް އަޙްމަދު ފާރިސް މައުމޫން ވަނީ ހިއުމަން ރައިޓްސް ކޮމިޝަންގެ މެންބަރުންނަށް އިލްތިމާސް ކުރައްވައި ހިތްވަރު ދެއްވާފައި ކަމަށްވެސް ފާރިސްގެ ވަކީލުންގެ ބަޔާނުގައި ވަނީ ބުނެފައެވެ.
