ވިސްނުން ބަހައްޓަންވީ ވަގުތީ ކާމިޔާބަކަށް ނޫން، ކުރިމަގު ބިނާކުރުމަށް: ބައްސާމް
ސީދާ ސާފް ޗެމްޕިއަންޝިޕް ކާމިޔާބުކުރުމުގެ ވިސްނުން ބައްސާމް ނުގެންގުޅުއްވާ
އެފްއޭއެމްގެ ރައީސް ބައްސާމް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަނީ
މިވަގުތު ވިސްނުން ބަހައްޓަންވީ ވަގުތީ ކާމިޔާބަކަށް ނޫން ކަމަށާއި ކުރިމަގުގައި ކާމިޔާބު ހޯދުމަށް ކަމަށް އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.
ގައުމީ ޓީމުގެ ކޯޗުގެ މަގާމަށް ކްރޮއޭޝިއާގެ ޕީޓަރ ސެގެޓް އައްޔަނުކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ބައްސާމް ވިދާޅުވީ އާ ކޯޗަށް ދެވިފައިވާ ޓާގެޓަކީ ކުރިމަގަށް ގައުމީ ޓީމު ބިނާކުރުން ކަމަށެވެ. އެގޮތުން މިވަގުތު ވިސްނުން ބަހައްޓަންވީ ވަގުތީ ކާމިޔާބު ހޯދުމަށް ނޫން ކަމަށާއި ވިސްނުން ބަހައްޓަންވީ ކުރިމަގުގައި ކާމިޔާބު ހޯދުމަށް ކަމަށް ވެސް ބައްސާމް ވިދާޅުވިއެވެ. ބައްސާމް ވިދާޅުވީ އެކި އުމުރުފުރައިގެ ޓީމުތައް ބިނާކުރުމަށް ސެގެޓްގެ އެހީތެރިކަން ލިބިގެންދާނެ ކަމަށެވެ. ބައްސާމް ވިދާޅުވީ މިހާރުން މިހާރަށް ސާފް ޗެމްޕިއަންޝިޕް ކާމިޔާބުކުރުމުގެ ވިސްނުން ނުގެންގުޅުއްވާ ކަމަށާއި މިހާރު ކުރައްވަމުން ގެންދަވާ މަސައްކަތަކީ ޒުވާން ޖީލެއް ބިނާކުރުން ކަމަށެވެ.
ބައްސާމް ވިދާޅުވީ އާ ގައުމީ ޓީމުތަކެއް ބިނާކުރުމުގެ މަސައްކަތް ފެށިފައިވާ ދަނޑިވަޅެއްގައި ސީދާ ސާފް ޗެމްޕިއަންޝިޕް ކާމިޔާބުކުރުމުގެ ވިސްނުން ގެންގުޅުމަކީ އެންމެ ރަނގަޅު ގޮތް ކަމުގައި ދެކިވަޑައިނުގަންނަވާ ކަމަށެވެ. ބައްސާމް ވިދާޅުވީ އެފަދަ ވާހަކައެއް ބަލައިގަތުމަށް ފުޓްބޯޅައަށް ލޯބިކުރާ ރައްޔިތުންނަށް އުނދަގޫވާނެ ކަމަށާއި އެހެން ނަމަވެސް ހިތާމަޔަކީ 2008 ވަނަ އަހަރުގެ ސާފް ޗެމްޕިއަންޝިޕަށް ފަހު ފުޓްބޯޅަ އަޑި އަޅާލައިގެން ދިޔުން ކަމަށް ވެސް ބައްސާމް ފާހަގަކުރެއްވިއެވެ. ބާރުތަކެއް ލިބިފައި މިވާ ދަނޑިވަޅުގައި މަސައްކަތް ފެށީ ކުރިމަގަށް ޓީމެއް ބިނާކުރުމަށް ކަމަށް ވެސް ބައްސާމް ވިދާޅުވިއެވެ.
ބައްސާމް މި ބީދައިން ވާހަކަ ދައްކަވާފައިވާއިރު މިއަހަރުގެ ސާފް ޗެމްޕިއަންޝިޕް ފެށުމަށް ހަމަޖެހިފައި ވަނީ އަންނަ ސެޕްޓެމްބަރު މަހުގެ ހަތަރުވަނަ ދުވަހުއެވެ.
