ތުރުކީގެ ޖެޓެއް ވެއްޓި11 މީހަކު މަރުވެއްޖެ
11 މާރިޗު 2018 | އާދީއްތަ 18:46ޖެޓު ވެއްޓުނު އިރު އޭގައި ތިބީ ތިން ކުރޫއިންނާއި އަށް ފަސިންޖަރުން
ބޯޓު ވެއްޓުނު ސަރަހައްދު
ޔުނައިޓެޑް އަރަބް އެމިރޭޓްސް އިން އިސްތަންބޫލަށް ދަތުރު ކުރަމުންދިޔަ ތުރުކީގެ ޕްރައިވެޓް ޖެޓެއް ވެއްޓި 11 މީހަކު މަރުވެއްޖެއެވެ.
ޕްރައިވެޓް ޖެޓް ނިސްބަތްވާ އޮގަނައިޒޭޝަންގެ ހެޑް، ރެޒާ ޖަފަރްޒާދް ބުނެފައިވަނީ އެ ޖެޓުން ދަތުރުކުރީ 11 މީހުން ކަމަށާއި އޭގެ ތެރޭގައި ހިމެނެނީ ތިން ކުރޫއިންނާއި އަށް ފަސިންޖަރުންކަމަށެވެ.
މިހާދިސާގައި ބޯޓު ވެއްޓިފައިވަނީ ހުޅަނގު ދެކުނު އިރާން ކައިރިއަށެވެ. އީރާންގެ އިމަޖެންސީ މެނޭޖްމަންޓް އޮގަނައިޒޭޝަންގެ ސްޕޯކްސްޕާސަން ވިދާޅުވީ މި ބޯޓު ވެއްޓުނީ އީރާނުގެ ވެރިރަށް ތެހެރާނުގެ ދެކުނުން 370 ކިލޯމީޓަރު(230 މޭލު) ދުރުގައި އޮންނަ ޝަހްރޭ ކޯޑްގެ ފަރުބަދައެއްގައި ޖެހި ވެއްޓިގެން ކަމަށް ބެލެވޭކަމަށެވެ.
މަންޒަރު ދުށްމީހުންނާއި ހަވާލާދީ ރިޕޯޓްތައް ބުނާގޮތުގައި ބޯޓު ވެއްޓުނުއިރު ބޯޓުގައި ހުރީ އަލިފާން ރޯވެފައެވެ. މިހާދިސާ ހިނގި ސަރަހައްދުގައި މިހާރު ރެސްކިއު ޓީމުން ހަރަކާތްތެރި ވާއިރު މިބޯޓުގެ ބައިތައް ހޯދުމަށް މަސައްކަތް އީރާނުގެ އިމަޖެންސީ ސާވިސެސްއިން ކުރަމުންދާކަމަށް ރޮއިޓާސްއިން ވަނީ ބުނެފައެވެ.
