ކުއްލި ނުރައްކަލުގެ ހާލަތުގެ ދަށުން ނައިފަރު ކައުންސިލް ރައީސް މުހައްމަދު ކާރިމްގެ ފޯނު ފުލުހުން އަތުލައިފިއެވެ.
ރާއްޖެއެމްވީއަށް މައުލޫމާތު ދެމުން ނައިފަރު ކައުންސިލް މެމްބަރު ވިދާދު އަބްދުﷲ ވިދާޅުވީ އާދީއްތަ ދުވަހުގެ މެންދުރު ވަގުތެއްގައި ނައިފަރު ކައުންސިލްގެ ރައީސް މުހައްމަދު ކާރިމް ފުލުހަށް ހާޒިރުކުރުމަށް ފަހު ފޯނު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ. ތަހްގީގް ކުރަމުންދާ މައްސަލައަކާއި ގުޅިގެން ފުލުހަށް ހާޒިރުކޮށް ކާރިމާއި ސުވާލުކުރުމަށް ފަހު ފޯނު ފުލުހުން އަތުލީ އެސްއޯއީގެ ދަށުން ކަމަށް ފުލުހުން ބުނެފައިވާ ކަމަށް ވިދާދު ވިދާޅުވި އެވެ.
ފުލުހުން ވަނީ ކާރިމްގެ މޯބައިލް ފޯނުގެ އިތުރުން ސިމް ކާޑު އަދި މެމޮރީ ކާޑް ވެސް އަތުލާފައެވެ.
ކުއްލި ނުރައްކަލުގެ ހާލަތުގެ ގަރާރުގެ ދަށުން އެމްޑީޕީ ގައުމީ މަޖިލީހުގެ ތިން މެމްބަރުން ކަމަށްވާ އިލްޔާސް ލަބީބާއި، ހަސަން މުހައްމަދު (ހަސަންޓޭ)، ހަސަން ޝިޔާން އަދި ގަލޮޅު އުތުރު ދާއިރާގެ ރައްޔިތުންގެ މަޖިލީހުގެ މެމްބަރު އިވާ އަބްދުﷲގެ ފިރިކަލުން އަހުމަދު ޝާހިދު (ސާބެ) ގެ އިތުރުން އަބްދުލް މާޖިދު (ލެކިއުޓް މާޖިދު) ވެސް ވަނީ ހައްޔަރުކޮށްފައެވެ.
