އިރުމަތީ ޣޫތާގައި ދޭ ހަމަލާތަކުގައި މަރުވި މީހުންގެ އަދަދު ހާހަކަށްވުރެ މައްޗަށް!

ސީރިއާގެ އިރުމަތީ ޣޫތާގައި ދެމުންދާ ހަމަލާތަކުގައި މަރުވި މީހުންގެ އަދަދު ހާހަކަށްވުރެ މައްޗަށް ގޮސްފައިވާ ކަމަށް ސީރިއަން އޮބްޒަވޭޓްރީ ފޯ ހިއުމަން ރައިޓްސް އިން ބުނެފި އެވެ.

ސީރިއާގެ މަޝްރަޚަށް ފާރަވެރިވާ އިނގިރޭސިވިލާތުގެ ޖަމިއްޔާ އެއް ކަމަށްވާ ސީރިއަން އޮބްޒަވޭޓްރީ ފޯ ހިއުމަން ރައިޓްސް އިން ބުނީ، ސީރިއާގެ ރައީސް ބައްޝާރުލް އަސަދުގެ ސަރުކާރަށް ވާގިވެރިވާ ފައުޖުތަކާއި އިދިކޮޅު ހަނގުރާމަވެރިންނާއި ދެމެދު ބަދަލުކުރަމުންދާ ހަމަލާތަކުގައި ފާއިތުވި 21 ދުވަހުގެ ތެރޭގައި 1099 މީހަކު މަރުވެފައިވާ ކަމަށެވެ.

ސީރިއަން އޮބްޒަވޭޓްރީގެ ތަފާސްހިސާބުތައް ދައްކާ ގޮތުން މި ކުރިމަތިލުންތަކުގައި މަރުވި އާއްމުންގެ ތެރޭގައި 227 ކުޑަކުދިންނާއި 154 އަންހެނަކު ހިމެނެއެވެ.

މީގެ އިތުރުން ޣޫތާގެ ކުރިމަތިލުންތަކުގައި 4378 މީހަކު ޒަޚަމްވެފައިވާ ކަމަށް ސީރިއަން އޮބްޒަވޭޓްރީ އިން ބުނެއެވެ.

އާދީއްތަ ދުވަހު އަލްޖަޒީރާ އަށް ދިން އިންޓަވިއުއެއްގައި އިރުމަތީ ޣޫތާގެ ދޫމާ އަވަށުގެ އެކްޓިވިސްޓެއް ކަމަށްވާ އަބްދުލްމާލިކް އަބޫދު ބުނީ، ހޮނިހިރު ދުވަހު އިރުމަތީ ޣޫތާގެ ވައިގެ ސަރަހައްދު އޮތީ ހަނގުރާމަމަތީ ބޯޓުތަކުން ފުރިފައި ކަމަށެވެ.

އަދި ހަމަލާތައް އަމާޒުކޮށްފައިވަނީ ބިމުއަޑީގައި ހަދާފައިވާ ބިންގަރާސްތަކާއި މިސްކިތްތަކުގެ އިތުރުން ބޮމުގެ ހަމަލާތަކުން ސަލާމަތްވުމަށް އާއްމުން ރައްކާތެރިކަން ހޯދުމަށްޓަކައި ފިލުމަށް ބޭނުންކުރާ އިމާރާތްތަކަށް ކަމަށެވެ.

އިރުމަތީ ޣޫތާގެ ކުރިމަތިލުންތަކުގައި މަރުވި މީހުންގެ އަދަދު އިތުރުވެފައިވާއިރު، ސީރިއާގެ ވެރިރަށް ދިމިޝްގުގެ ރަށްބޭރުގައިވާ އިރުމަތީ ޣޫތާގެ އަރްބިން އަވަށުގައި ރޭގަނޑުގެ ވަގުތެއްގައި ކެމިކަލް ހަމަލާއެއް ދިން ކަމުގެ ރިޕޯޓްތަކެއް ވަނީ ފެންމަތިވެފައެވެ.

އިރުމަތީ ޣޫތާގެ ކުރިމަތިލުންތަކުގައި ހާލުގައި ޖެހޭ އާއްމުންނަށް އެހީތެރިކަން ފޯރުކޮށްދިނުމަށް ހިލޭސާބަހަށް މަސައްކަތް ކުރާ ޖަމިއްޔާ އެއް ކަމަށްވާ ސީރިއަން ސިވިލް ޑިފެންސް ނުވަތަ އާއްމު ނަމުންނަމަ ވައިޓް ހެލްމެޓްސް އިން ބުނީ، ސީރިއާ ސަރުކާރުގެ ފައުޖުތަކުން އިރްބިންގައި ކްލޮރިން ގޭހާއި، ފޮސްފޮރަސް ބޮމާއި ނެޕާމް ބޭނުންކޮށްފައިވާ ކަމަށެވެ.

މިއީ ގާތްގާތުގައި އިރުމަތީ ޣޫތާގައި ދިން ކަމަށް ތުހުމަތު ކުރެވޭ ދެވަނަ ކެމިކަލް ހަމަލާއެވެ.

ޣޫތާގެ ހަމޫރިޔާ އަވަށުގެ އާއްމުން ވަނީ ބުދަ ދުވަހުގެރޭ ފޮސްފޮރަސް ބޮމުގެ ހަމަލާތަކެއް ދިން ކަމަށް ބުނެ، އެކަމާއި ގުޅުންހުރި ވީޑީއޯ އެއް އާއްމުކޮށްފައެވެ. ބޮމުގެ ހަމަލާ ދިނުމާއެކު އެސަރަހައްދުގެ އާއްމުންނަށް ނޭވާލުމަށް އުނދަގޫވެގެން އުޅޭ މަންޒަރު އެވީޑިއޯ އިން ފެންނަ ކަމަށް ރިޕޯޓްތައް ބުނެއެވެ.

އެހެންނަމަވެސް ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ސީރިއާގެ ޚާރިޖީވަޒީރުގެ ނާއިބު ފައިސަލް މިކްދާދް ވަނީ، ކެމިކަލް ހަމަލާއެއް ދިން ކަމުގެ ރިޕޯޓްތައް ދޮގުކޮށްފައެވެ.