އިރާގު މޫސަލް، އިސްލާމިކް ސްޓޭޓް (އައިއެސް) ގެ އަތް ދަށުން މިނިވަން ކުރުމަށް އެމެރިކާ އާއި ގުޅިފައިވާ ކޯލިޝަނުން ހިންގާ އޮޕަރޭޝަނުގައި ދިިން ވައިގެ ހަމަލާތަކުގައި ބުރާސްފަތި ދުވަހު 230 މީހުން މަރުވެފައިވާ ކަމަށް ރިޕޯޓުތައް ބުނެފިއެވެ.

މޫސަލްގެ ހުޅަނގު ސަރަހައްދުގެ އިމާރަތަކަށް ދިން ވައިގެ ހަމަލާއެއްގައި 137 މީހުން މަރުވެފައި ވާއިރު، އޭގެތެރެއިން ގިނަ މީހުންނަކީ އާންމުން ކަމަށް ރިޕޯޓުތައް ބުނެއެވެ. އަދި އެ އިމާރާތާ ކައިރި ސަރަހައްދަކަށް ދިން ހަމަލާއެއްގައި އިތުރު 100 މީހުން މަރުވެފައިވެއެވެ.

މޫސަލް މިނިވަން ކުރުމަށް އެމެރިކާ އާއި ގުޅިފައިވާ ކޯލިޝަނުން ހިންގާ އޮޕަރޭޝަނުގައި އާންމުންނަށް ހަމަލާތައް އަމާޒުވަނީ އައިއެސް އިން އިންސާނީ އައްޑަނައިގެ ގޮތުގައި އާންމުން ބޭނުންްކުރާތީ ކަމަށް އިރާގު ސަރުކާރާއި އެމެރިކާ ސަރުކާރުން ތުހްމަތު ކުރެއެވެ.

އެމެރިކާގެ އަސްކަރިއްޔާގެ ހަމަލާތައް އިރާގުގައި ކޯޑިނޭޓް ކުރަމުންދާ ސެންޓްރަލް ކޮމާންޑުގެ ތަރުޖަމާނު އިނގިރޭސި ވިލާތުގެ "ދަ އިންޑިޕެންޑެންޓް" ނޫހަށް ވިދާޅުވެފައި ވަނީ އެމެރިކާ އާއި ގުޅފައިވާ ކޯލިޝަނުން އައިއެސްއާ ދެކޮޅަށް ދިން ހަމަލާއެއްގައި އާންމުން މަރުވި ކަން އެނގިފައިވާ ކަމަށާއި އެކަން ތަހުގީގު ކުރާނެ ކަމަށެވެ.

މޫސަލް މިނިވަން ކުރުމަށް ހިންގާ އޮޕަރޭޝަންގައި ގުޅިފައިވާ ކޯލިޝަނުން ކާމިޔާބީތަކެއް ހޯދަމުންދާއިރު އިރާގުގެ މޫސަލްގައި ހުރި އިސްލާމިކް ސްޓޭޓް (އައިއެސް) ގެ ލީޑަރު އަބޫ ބަކުރު އަލް ބަޣްދާދީ މޫސަލް އިން "ފިލައިފައިވާ" ކަމަށް އެމެރިކާގެ އޮފިޝަލުން ދާދިފަހުން ވަނީ ބުނެފައެެވެ. އެމެރިކާގެ ޑިފެންސް އޮފިޝަލުންނާ ހަވާލާދީ މީޑިއާ ރިޕޯޓުތައް ބުނެފައިވަނީ ބަޣްދާދީ "ފިލާފައިވާ" ކަމަށް ބެެލެވެނީ އޭނާގެ ބާރުތައް މޫސަލްގައި ތިބޭ އައިއެސް ކޮމާންޑަރުންނާ ހަވާލުކޮށްފައި ކަމަށެވެ.

އެމެރިކާ އޮފިޝަލުންނާ ހަވާލާދީ މީޑިއާ ރިޕޯޓުތައް ބުނާގޮތުން ބަޣްދާދީ މޫސަލްއިން ފިލާފައިވަނީ އިރާގު ސިފައިން މިމަހުގެ ކުރީކޮޅު މޫސަލްގެ މައި މަގު ހިފުމުގެ ކުރިންނެވެ. ސީރިޔާގެ ބިންތަކާއި، އިރާގުގެ ބިންތައް ހިމެނޭގޮތުން އިސްލާމިކް ސްޓޭޓްގެ ނަމުގައި "ޚިލާފަތެއް" އުފެއްދިކަން ބަޣްދާދީ އިއުލާން ކުރީ 2014 ވަނަ އަހަރު މޫސަލްގެ މިސްކިތެއްގައެވެ.