މިސްރުގައި ހިނގި ރޭލު އެކްސިޑެންޓެއްގައި 15 މަރު
28 ފެބުރުއަރީ 2018 | ބުދަ 15:49މިހާދިސާގައި 40 މީހުން ޒަޚަމްވި
ހާދިސާ އަށް ފަހު އާންމުން އެ ސަރަހައްދުގައި
މިސްރުގެ އުތުރު ޕްރޮވިންސެއް ކަމަށްވާ ބެހެއިރާގައި ބުދަ ދުވަހު ހިނގި ރޭލު އެކްސިޑެންޓެއްގައި 15 މީހަކު މަރުވެ 40 މީހުން ޒަޚަމްވެއްޖެއެވެ.
ރިޕޯޓުތައް ބުނާ ގޮތުން އެކްސިޑެންޓް ހިނގަން މެދުވެރިވީ މީހުން ގޮވައިގެން ދަތުރުކުރަމުން ދިޔަ ރޭލެއްގެ ކެރިޖެއް އެހެން ކެރީޖަކާ ވަކިވެގެންގޮސް ކާގޯ ރޭލަކާ އެކްސިޑެންޓް ވުމުގެ ސަބަބުން ކަމަށެވެ.
އެކްސިޑެންޓާ ގުޅިގެން މިސްރުގެ ސަރުކާރުގެ ކެބިނެޓުން ނެރުނު ބަޔާނެއްގައި ބުނީ އެކްސިޑެންޓާ ގުޅިގެން ބޮޑުވަޒީރު ޝަރީފް އިސްމާއިލް އެގައުމުގެ ޓްރާންސްޕޯޓް މިނިސްޓަރަށް، ހާދިސާ ހިނގި ސަރަހައްދަށް ގޮސް ކަންވެގެން ދިޔަ ގޮތް ސާފުކުރުމަށް އަންގަވާފައިވާ ކަމަށެވެ.
މިސްރުގެ ރޭލުގެ ނިޒާމުގެ ރައްކާތެރި ކަމަށް މިސްރުގައި އޭރަކު އޮންނަ ސަރުކާރުން މަސައްކަތް ނުކުރާ ކަމަށް އާންމުން އަބަދު ވެސް ޝަކުވާ ކުރެއެވެ. މިސްރުގައި އާންމުކޮށް ރޭލުގެ އެކްސިޑެންޓްތައް ހިނގާއިރު، މިދިޔަ އޯގަސްޓްގައި އެގައުމުގައި ހިނގި ނުރައްކާތެރި އެކްސިޑެންޓެއްގައި 42 މީހުން މަރުވެ 100 އަށް ވުރެ ގިނަ މީހުން ޒަޚަމްވެފައިވެއެވެ.
