ގުޅިފައިވާ ސިޔާސީ ޕާޓީތަކުގެ ލީގަލް އެޑްވައިޒަރަކަށް އިނގިރޭސިވިލާތުގެ ލޯޔަރެއް ކަމަށްވާ ބެން އެމާސަން ހަމަޖައްސައިފިއެވެ.

ގުޅިފައިވާ ޕާޓީތަކުން ހޯމަ ދުވަހު ނެރުނު ބަޔާނުގައި ވަނީ ޝަރުތުތަކާ އެކު ސަރުކާރާ އެކު ކުރާ މަޝްވަރާތަކާ ގުޅޭ ގޮތުން އދ. އާ ވާހަކަ ދެއްކެމަށް އެ ޕާޓީތަކަށް ލަފާ އެރުވުމަށް ބެން އެމާސަން ހަމަޖައްސާފައިވާ ކަމަށާއި ރާއްޖޭގެ ހާލަތާ ގުޅޭ ގޮތުން ބައިނަލްއަގުވާމީ ފަރާތްތަކާ ހިއްސާ ކުރުމަށް ވެސް އެމާސަންގެ ލަފާ ހޯދުމަށް ނިންމާފައިވާ ކަމަށެވެ.

ބެން އެމާސަންއަކީ އިންސާނީ ހައްގުތަކާއި ކައުންޓާ ޓެރަރިޒަމާ ބެހޭ ގާނޫނީ މާހިރެކެވެ. އަދި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ސަރުކާރާ ސީދާ ކުރާނެ މަޝްވަރާއެއް ނެތް ކަމަށް ގުޅިފައިވާ ޕާޓީތަކުން ވަނީ މީގެ ދެ ހަފްތާ ކުރިން ބުނެފައެވެ.

ޕާޓީތަކުގެ މަޝްވަރާތައް އަލުން ފެށުމަށް ދައުވަތުދީ، ރައީސް އޮފީހުން ޕާޓީތަކަށް ފޮނުވާފައިވާ ސިޓީތަކާ ގުޅިގެން، ނޫސްވެރިންނަށް މައުލޫމާތު ދެއްވަމުން އެމްޑީޕީގެ ޕާލިމެންޓަރީ ގްރޫޕްގެ ލީޑަރު އިބްރާޙިމް މުހައްމަދު ސޯލިހު (އިބޫ) ވިދާޅުވީ، ސަރުކާރުން ސުޕްރީމް ކޯޓުގެ އަމުރު ތަންފީޒު ކުރަން ދެކޮޅު ހަދައި، ޣައިރު ޤާނޫނީ ކުއްލި ނުރައްކަލުގެ ޙާލަތެއް އިޢުލާނުކޮށް، ސިޔާސީ އެތައް ބަޔަކު ހައްޔަރުކޮށްފައިވާ ކަމަށާއި، މިފަދަ ހާލަތެއްގައި ސީދާ ސަރުކާރާ ދައްކާނެ ވާހަކައެއް ނެތް ކަމަށެވެ.

އިބޫ ވިދާޅުވީ، އދ. މެދުވެރިވެގެން ސަރުކާރާއި އެކު ވާހަކަ ދައްކާނީ ސަރުކާރުން ޝަރުތުތަކަކަށް ތަބާވުމުން ކަމަށެވެ. އެގޮތުން، ޤާނޫނު އަސާސީގެ އިމުގެ ތެރެއަށް ސަރުކާރު ވަދެ، ސުޕްރީމް ކޯޓުން ފެބްރުއަރީ މަހުގެ ފުރަތަމަ ދުވަހު ކޮށްފައިވާ ޙުކުމް މިޙާރުން މިހާރަށް ތަންފީޒުކޮށް، ކުއްލި ނުރައްކަލުގެ ހާލަތު އިޢުލާނުކޮށްގެން ހައްޔަރުކޮށްފައިވާ ފަރާތްތައް ދޫކޮށްލުމަށް އިދިކޮޅު ފަރާތްތައް ވަނީ ޝަރުތު ކޮށްފައެވެ.

ގުޅިފައިވާ ޕާޓީތަކުން ބުނީ ސަރުކާރުން މި ޝަރުތުތައް ޤަބޫލު ކޮށްފި ނަމަ، މެދުވެރިއެއްގެ ގޮތުގައި އދ. ހަރަކާތްތެރިވާ މަޝްވަރާތަކަކަށް ސަރުކާރާ އެކު ދާން ތައްޔާރު ކަމަށެވެ.