އިރުމަތީ ޣޫތާގެ ކުރިމަތިލުންތަކުގައި މަރުވި މީހުންގެ އަދަދު 400 އަށް އަރައިފި

ސީރިއާގެ އިރުމަތީ ޣޫތާގައި ހަރަކާތްތެރިވާ ހަނގުރާމަވެރި ގްރޫޕްތަކާއި ސީރިއާ ސަރުކާރުގެ ސިފައިންނާއި ދެމެދު ހިނގަމުންދާ ކުރިމަތިލުންތަކުގައި މަރުވި މީހުންގެ އަދަދު 400 އަށް އަރައިފި އެވެ.

ހަނގުރާމަވެރި ގްރޫޕްތަކުގެ ބާރުގެ ދަށުގައިވާ އިރުމަތީ ޣޫތާ ހިފުމަށް ސީރިއާގެ ރައީސް ބައްޝާރުލް އަސަދުގެ ސިފައިންނާއި ބައްޝާރަށް ވާގިވެރިވާ ރަޝިއާގެ އަސްކަރިއްޔާ އިން ވައިގެ މަގުން ހަމަލާ ދޭން ފެށިތާ ފަސް ދުވަސް ފާއިތުވެފައިވާއިރު، މި ކުރިމަތިލުންތަކުގައި މަރުވި މީހުންގެ އަދަދު 403 އަށް އަރާފައިވާ ކަމަށް ސީރިއަން އޮބްޒަވޭޓަރީ ފޯ ހިއުމަން ރައިޓްސް އިން ހާމަކުރެއެވެ.

ސީރިއާ އަދި ރަޝިއާގެ ގުޅިފައިވާ ފައުޖުތަކުން އާދީއްތަ ދުވަހުން ފެށިގެން އިރުމަތީ ޣޫތާ އަށް ހަމަލާ ދެމުންދާއިރު، މިހަމަލާތަކުގައި ދެހާހަށްވުރެ ގިނަ މީހުން ޒަޚަމްވެފައިވާ ކަމަށް ސީރިއަން އޮބްޒަވޭޓަރީ އިން ބުނެއެވެ.

ސީރިއާގެ މައްސަލާގައި ބުރާސްފަތި ދުވަހު ބޭއްވި އދ.ގެ ސަލާމަތީ މަޖިލީހުގެ ބައްދަލުވުމުގެ ކުރިން ވާހަކަ ދައްކަވަމުން އދ. އިން ސީރިއާ އަށް ކަނޑައަޅުއްވާފައި ހުންނަވާ ހާއްސަ މަންދޫބު ސްޓެފަން ޑި މިސްތޫރާ ވަނީ، އިރުމަތީ ޣޫތާގެ ހާލަތު ހަމައަކަށް އެޅުވުމަށް ވީހާވެސް އަވަހަކަށް ހަމަލާ ބަދަލު ކުރުން ހުއްޓާލުމުގެ އެއްބަސްވުމަކަށް އައުމަށް ގޮވާލާފައެވެ.

ސްޓެފަން ޑި މިސްތޫރާ ވިދާޅުވީ، އިރުމަތީ ޣޫތާގެ އިންސާނީ ހާލަތު ހުރީ ސިއްސައިގެންދާފަދަ ދަރަޖައެއްގައި ކަމަށާއި، އެސަހަރަށް އެއްވެސް ހުރަހެއް ނެތި އިންސާނީ އެހީތެރިކަން ފޯރުކޮށްދިނުމުގެ ފުރުޞަތާއި، ޒަޚަމްވެފައިވާ މީހުންނަށް ފަރުވާ ދިނުމަށް އެ ސަރަހައްދުން ނެރެވޭނެ އިންތިޒާމް ވީހާވެސް އަވަހަކަށް ހަމަޖައްސަން ޖެހިފައިވާ ކަމަށެވެ.

އަދި ސީރިއާގެ ޙަލަބްގައި މީގެ ކުރިން ކުރިއަށް ގެންދިޔަ ކުރިމަތިލުންތަކަށްފަހު، ޙަލަބްގައި އޮތް ހާލަތު އިރުމަތީ ޣޫތާގައި ތަކުރާރުވެދާނެ ކަމުގެ އިންޒާރު މިސްތޫރާ ދެއްވާފައިވެއެވެ.

އިރުމަތީ ޣޫތާގައި ދިރިއުޅޭ އާއްމުން ވަނީ އެމީހުންގެ ރައްކާތެރިކަމަށް ކުރެވޭނެ އެއްވެސް ކަމެއް ނެތް ކަމަށާއި، ސަލާމަތްވުމަށް އެސަރަހައްދު ދޫކޮށް ދެވޭނެ މަގެއް ނުވަތަ ހަމަލާތަކަށް ފިލޭނެ ގޮތެއްވެސް ނެތް ކަމަށް ބުނެފައެވެ. އިރުމަތީ ޣޫތާގެ އާބާދީގެ ބޮޑު ބަޔަކީ ސީރިއާގެ ދާޚިލީ ހަނގުރާމައިގެ ސަބަބުން އެހެން ސަރަހައްދުތައް ދޫކޮށް އެސަހަރަށް ހިޖުރަކޮށްފައިވާ ފަރާތްތަކެވެ.

ސީރިއާގެ ރައީސް ބައްޝާރުލް އަސަދުގެ ސަރުކާރާއި ދެކޮޅު ހަނގުރާމަވެރި ގްރޫޕްތަކުން ކޮންޓްރޯލް ކުރާ އިރުމަތީ ޣޫތާ އަކީ ވެރިރަށް ދިމިޝްޤުގެ ރަށް ބޭރުގައި އޮންނަ ސަހަރެކެވެ.

ގާތްގަނޑަކަށް ހަތަރު ލައްކައެއްހާ މީހުން ދިރިއުޅޭ އިރުމަތީ ޣޫތާ އިދިކޮޅު ހަނގުރާމަވެރިންގެ ބާރުގެ ދަށަށް ދިޔުމާއެކު، ސީރިއާގެ ސިފައިން ވަނީ 2013 ވަނަ އަހަރުން ފެށިގެން އެސަހަރު ވަށާލައި، ހިސާރުކޮށްފައެވެ. ބައްޝާރުގެ ފައުޖުތަކުގެ ހަނގުރާމަވެރިން އިރުމަތީ ޣޫތާ އަށް ވަދެވެން އޮންނަ މަގުތައް ބަންދުކުރުމާއި ގުޅިގެން އެސަހަރުގެ ތެރެއަށް ކާބޯތަކެތި ފޯރުކޮށްދިނުމުގައި ދަތިތަކާއި ކުރިމަތިލާން ޖެހިފައިވާއިރު، އެކަމާއި ގުޅިގެން އެސަރަހައްދުގެ ތަކެތީގެ އަގު ބޮޑުވެ، އިންފްލޭޝަން ރޭޓް ވަނީ އިންތިހާއަށް މައްޗަށް ގޮސްފައެވެ.