ކުއްލި ނުރައްކަލުގެ ހާލަތު އުވާލަން 50 މެމްބަރުން ވޯޓު ދެއްވާނެ: މަހުލޫފު
ގޮނޑި ގެއްލުނު ކަމަށް ބުނި 12 މެމްބަރުންނަށް ވަނީ ޖަލްސާގެ ދައުވަތު ދީފައި
މަހުލޫފު ރައްޔިތުންގެ މަޖިލީހަށް ވަދެވަޑައިގަތުމަށް މަސައްކަތްކުރެއްވުމުން އެސްއޯ ފުލުހުން ހުރަސް އަޅަނީ
މާދަމާ ބާއްވާ ރައްޔިތުންގެ މަޖިލީހުގެ ހާއްސަ ޖަލްސާގައި ރާއްޖޭގައި މިހާރު އިއުލާނު ކޮށްފައިވާ ކުއްލި ނުރައްކަލުގެ ހާލަތު އުވާލުމަށް 50 މެމްބަރަކު ވޯޓުދޭނެ ކަމަށް ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފު ވިދާޅުވެއްޖެއެވެ.
މަހުލޫފު ކުރެއްވި ޓްވީޓެއްގައި ވިދާޅުވީ ސުޕްރީމް ކޯޓުގެ އަމުރާއެކު ގޮނޑި ނުގެއްލޭ ކަމަށް ކަނޑައެޅިގެންދިޔަ 12 މެމްބަރުން ހިމެނޭ ގޮތަށް މަޖިލީހުގެ ޖަލްސާ ބާއްވައިފިނަމަ ކުއްލި ނުރައްކަލުގެ ހާލަތުގެ ގަރާރު އުވާލުމަށް މަދުވެގެން 50 މެމްބަރަކު ވޯޓުދޭނެ ކަމަށް ރައީސް ޔާމީންއަށް ސާފުކޮށް ދަންނަވަން ބޭނުންވާ ކަމަށެވެ.
މަހުލޫފު މިހެން ވިދާޅުވެފައިވާއިރު ގޮނޑިގެއްލުނު ކަމަށް އިލެކްޝަންސް ކޮމިޝަނުން ކުރިން ކަނޑައެޅި 12 މެމްބަރުންނަށް ވެސް ވަނީ މާދަމާގެ ޖަލްސާގެ ދައުވަތު ފޮނުވާފައެވެ. މާދަމާގެ ޖަލްސާގެ އެޖެންޑާ އާންމުކޮށްފައިނުވާއިރު ކުއްލި ނުރައްކަލުގެ ހާލަތާމެދު މާދަމާގެ ޖަލްސާގައި ގޮތެއް ނިންމަންޖެހެއެވެ. މި އަހަރުގެ ފުރަތަމަ ދައުރު މިހާރު ފެށިފައިވާއިރު މިހާތަނަށް އެއްވެސް ޖަލްސާއެއް ބާއްވާފައެއް ނުވެއެވެ. މި މަހުގެ ފަސްވަނަ ދުވަހު ދަރުބާރުގޭގައި މަޖިލީހުގެ ޖަލްސާއެއް ބޭއްވުމަށް ތާވަލުކުރި ނަމަވެސް ސަލާމަތީ ސަބަބުތަކަށްޓަކައި އެ ޖަލްސާ ކެންސަލް ކުރެވުނެވެ.
މަޖިލީހުގެ ބައެއް މެމްބަރުން މިވަގުތު ވެސް ތިއްބެވީ ފުލުހުންގެ ހައްޔަރުގައެވެ. އޭގެތެރޭގައި ދިއްގަރު ދާއިރާގެ މެމްބަރު އަހުމަދު ފާރިސް މައުމޫންއާ މައްޗަންގޯޅި ދެކުނު ދާއިރާގެ މެމްބަރު އަހުމަދު ސިނާންގެ އިތުރުން ދަނގެތި ދާއިރާގެ މެމްބަރު އިލްހާމް އަހުމަދު ހިމެނެއެވެ. ހަމައެހެންމެ މާމިގިލީ ދައިރާގެ މެމްބަރު ގާސިމް އިބްރާހިމް ހުންނެވީ ޖަރުމަނުގައެވެ.
މަހުލޫފު ކުރެއްވި އެހެން ޓްވީޓެއްގައި ވަނީ މާދަމާގެ ޖަލްސާ ބޮއިކޮޓްކޮށްފާނެ ކަމުގެ އިޝާރާތެއް ވެސް ދީފައެވެ. އެ ޓްވީޓުގައި މަހުލޫފު ވިދާޅުވީ ކުއްލި ނުރައްކަލުގެ ހާލަތަކީ ރައްޔިތުން އެކަމަކަށް އަމަލުކުރަން ޖެހޭ ކަމެއް ކަމަށާއި މަޖިލީހުން އެކަމަށް ގޮތެއް ނިންމޭނީ 43 މެމްބަރުން ޖަލްސާގައި ބައިވެރިވާނަމަ ކަމަށެވެ. އެގޮތުން އިދިކޮޅު މެމްބަރުން ޖަލްސާ ބޮއިކޮޓްކޮށްފިނަމަ 43 މެމްބަރުން ޖަލްސާއަށް ހާޒިރު ނުވާނެ ކަމަށް މަހުލޫފު ވިދާޅުވެފައިވެއެވެ.
