ޔޫއޭއީގެ މަދަދާއިއެކު ހަނގުރާމަވެރިން އަދަނުގެ އަސްކަރީ ބޭސްތައް ހިފައިފި

ޔަމަނުގެ ދެކުނުގައި ޙަރަކާތްތެރިވާ ޔޫއޭއީއިން މަދަދުވެރިވާ ހަނގުރާމަވެރިންގެ އައްސޭރިފަށުގައިވާ މައި ރަށެއް ކަމަށްވާ ޢަދަނުގައި ހުރި ސަރުކާރުގެ މައި އިމާރާތްތަކާއި އަސްކަރީ ބޭސްތައް ހިފައިފިއެވެ.

އަންގާރަ ދުވަހު ޔޫއޭއީގެ ވައިގެ ސިފައިންގެ މަދަދާއިއެކު ހަނގުރާމަވެރިން ވަނީ ޔަމަނުގެ އަސްކަރިއްޔާގެ ފޯތު ބްރިގޭޑްގެ ބޭސް އަތުލާފައެވެ. ހަނގުރާމަވެރިން އެ ބޭސް ހިފަން މަސައްކަތްކުރިއިރު ޔޫއޭއީގެ އަސްކަރީ ޖެޓްތަކުން ދިޔައީ އެ ބޭސްއަށް ބޮން އަޅަމުންނެވެ.

އާދިއްތަ ދުވަހުން ފެށިގެން ސަދަން ޓްރާންސިޝަނަލް ކައުންސިލްގެ އަސްކަރީ ގޮފީގެ ސިފައިންނާއި ސަދަން ރެސިސްޓަންސް ފޯސްއިން ގެންދަނީ އަބްދުރައްބު މަންސޫރު ހާދީގެ މައި ސަރުކާރާއި ދެކޮޅަށް ހަނގުރާމަ ފަށާފައެވެ. ސަރުކާރާއި ދެކޮޅުވެ، އެމީހުން ބޭނުންވަނީ ޔަމަނުގެ ދެކުނުގައި ވަކި މިނިވަން ދައުލަތެއް ޤާއިމް ކުރުމަށެވެ. އެޖަމާޢަތްތަކަށް އެހީވަމުން ދަނީ ޔޫއޭއީއިންނެވެ.

ޔަމަނު ހަނގުރާމައަށް ޔޫއޭއީއިން އެންމެ ފުރަތަމަ ވަނީ ހާދީގެ ސަރުކާރަށް ވާގިވެރިވަމުންދާ ސަޢޫދީއާއި އެކުގައެވެ. އެހެން ނަމަވެސް ސަޢޫދީއާއިއެކު އޮވެ، ޔޫއޭއީއިން ހާދީގެ ސަރުކާރާއި ދެކޮޅަށް ހަނގުރާމަކުރާ ހަނގުރާމަވެރިންނަށް މަދަދުވެރިވަމުންދާތީ ޔަމަނުގެ ސަރުކާރުން ދަނީ ކަންބޮޑުވުން ފާޅުކުރަމުންނެވެ.

ހަނގުރާމަވެރިން ހާދީގެ ސަރުކާރާއި ދެކޮޅަށް ތެދުވީ އާދިއްތަ ދުވަހު ބޮޑުވަޒީރު އަހުމަދު ބިން ދަޣަރު އާއި ހާދީގެ ކެބިނެޓްގެ ބައެއް ބޭފުޅުން ބޭރު ކުރުމަށް ސަދަން ޓްރާންސިޝަނަލް ކައުންސިލުން އެދުނު އެދުމަށް ހާދީ އިޖާބަ ދެއްވާފައިނުވާތީއެވެ.

އާދިއްތަ ދުވަހުން ފެށިގެން އަންގާރަ ދުވަހާއި ހަމަޔަށް ޢަދަނުގައި ހިނގަމުންދާ ހަމަނުޖެހުންތަކުގައި މިހާތަނަށް 36 މީހަކު މަރުވެ، 185 މީހުން ޒަޚަމްވެފައިވާ ކަމަށް ބައިނަލްއަޤްވާމީ ރެޑް ކްރޮސްއިން ބުނެއެވެ.

ސަޢޫދީއިން މަދަދުވެރިވާ ޙާދީގެ މައި ސަރުކާރާއި ދެކޮޅަށް ޔަމަނުގައި ހަނގުރާމަކުރަމުންދާ ހަނގުރާމަވެރިންނަށް ޔޫއޭއީއިން މަދަދުވެރިވާން ފަށާފައި މިވަނީ ޔަމަނު ހަނގުރާމައިގެ ޚަރަދު ބޮޑުކަމުންނާއި މައްސަލަ ހޫނުވުމުގެ ސަބަބުން ހަނގުރާމައިން ބޯދަމައިގަންނަން ސަޢޫދީއިން ބޭނުންވެފައިވާ ދަނޑިވަޅެއްގައެވެ. ސަޢޫދީއަށް މަދަދުވެރިވަމުން ޔަމަނު ހަނގުރާމަތެރެއަށް ވަން ޔޫއޭއީ، އެންމެ ފަހުން ޔަމަނުގެ ދެކުނުގައި މިހާރު ވަނީ ބާރުގަދަ ކޮށްފައެވެ.

ޔަމަނުގެ ދެކުނުގައި ހަރަކާތްތެރިވާ ހަނގުރާމަވެރިންނަށް ޔޫއޭއީއިން ޚަރަދުކޮށް، ތަމްރީނު ފޯރުކޮށްދެމުންދާއިރު، އެ ހަނގުރާމަވެރިން ޖަވާބުދާރީ ވަނީ ޔޫއޭއީއަށް ކަމަށް އަލްޖަޒީރާއިން ބުނެއެވެ.

ސަދަން ޓްރާންސިޝަނަލް ކައުންސިލުން ބުނާ ގޮތުގައި ދެކުނު ޔަމަނުގައި ވަކި ދައުލަތެއް ޤާއިމްކުރުމުގެ މަސައްކަތް މިހަފްތާތެރޭ ފަށާނެ ކަމަށް އެޖަމާޢަތުން ބުނެއެވެ.