ސިޔާސީ ގޮތުން ވަކިއަތަކަށް ބުރަވެފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ތަކުރާރުކޮށް ތުހުމަތު ކުރައްވާފައިވާ އެ ގައުމުގެ ފެޑެރަލް އިންވެސްޓިގޭޝަންގެ ޑިރެކްޓަރ އެންޑްރޫ މެކަބީ މަގާމުން އިސްތިއުފާ ދެއްވައިފިއެވެ.

ސީބީއެސް ނިއުސްއިން ރިޕޯޓް ކޮށްފައިވާ ގޮތުގައި ރަސްމީކޮށް މާޗް މަހު މެކަބީ ރިޓަޔަރ ކުރެއްވުމަށް ނިންމަވާފައިވަނިކޮށް އޭނާ އިސްތިއުފާދެއްވީ މަޖުބޫރުންނެވެ.

އެ ގައުމުގެ ގާނޫނު ތަންފީޒުކުރުމުގެ އެންމެ އިސް މުއައްސަސާއިން އޭނާ ވަކިވެ ވަޑައިގެންފައިވަނީ ރައީސް ޓްރަމްޕް އޭނާ މަގާމުން ވަކިކުރުމަށް ބޭނުންފުޅުވެފައި ހުންނަވަނިކޮށް ކަމަށް ބުނާ ރިޕޯޓްތަކެއް އައިތާ ހަފްތާއެއްގެ ތެރޭގައެވެ.

މީގެ އިތުރުން މިދިޔަ ހަފްތާގައި އޯވަލް އޮފީހުގައި ބޭއްވި ބައްދަލުވުމެއްގައި މެކަބީ އިސްތިއުފާ ދެއްވުމަށް ރައީސް ޓްރަމްޕް އެދިވަދަޑައިގެންފައިވާކަމުގެ ޚަބަރުތަކެއް ވެސް ފެންމަތިވެފައިވަނިކޮށެވެ.

ވައިޓް ހައުސްގެ ޕްރެސް ސެކެރެޓަރީ ސާރާ ހަކަބީ ސޭންޑަރސް ހޯމަ ދުވަހުގެ ނޫސް ކޮންފަރެންސްގައި ވިދާޅުވީ " މި ނިންމުމަކީ ވައިޓް ހައުސްއިން ނިންމި ނިންމުމެއް ނޫންކަމަށެވެ.

"މި ނިންމުން ނިންމުގައި ރައީސްގެ ބައިވެރިވެވަޑައިގަތުމެއް ނެތް" އެކަމަނާ ވިދާޅުވިއެވެ.

އެފްބީއައިގެ ކުރީގެ ޑިރެކްޓަރ ޖޭމްސް ކޯމޭ މަގާމުން ވަކިކުރުމުން މިދިޔަ އަހަރުގެ މެއި މަހު މެކަބީ ވަނީ އެކްޓިންގ ޑިރެކްޓަރގެ މަގާމް ފުރުއްވަން ފައްޓަވާފައެވެ.

އެމެރިކާގައި 2016 ވަނަ އަހަރު ބޭއްވި ރިޔާސީ އިންތިޚާބަށް ރަޝިއާގެ  ނުފޫޒު ފޯރުވި ކަމަށް ބުނާ މައްސަލަ ބައްލަވަމުން ގެންދެވީ ކޯމޭއެވެ.

ރައީސް ޓްރަމްޕް ވަނީ އެފްބީއައިގެ ޑިރެކްޓަރގެ މަގާމަށް ކްރިސްޓޮފަރ ރޭ ހޮއްވަވާފައެވެ. އަދި މިދިޔަ އޯގަސްޓް މަހު ސެނޭޓުން ވަނީ އޭނާއަށް ރުހުން ދީފައެވެ.