ކާބުލްގެ އަސްކަރީ އެކަޑަމީ އަކަށް ހަނގުރާމަވެރިން ހަމަލާދީފި

އަފްޣާނިސްތާނުގެ ވެރިރަށް ކާބުލްގެ އަސްކަރީ އެކަޑަމީ އަށް ހަނގުރާމަވެރިން ހަމަލާދީފި އެވެ.

އަފްޣާނިސްތާނުގެ ސަލާމަތީ އޮފިޝަލުންނާއި ހަވާލާދީ އޭއެފްޕީ އިން ބުނީ، ހަތިޔާރާއެކު ހަނގުރާމަވެރިންގެ ބަޔަކު އަސްކަރީ އެކަޑަމީ އަށް ވަދެގަނެފައިވާ ކަމަށެވެ.

ކާބުލްގައި ހުންނަ މާޝަލް ފާހިމް ނޭޝަނަލް ޑިފެންސް ޔުނިވަރސިޓީ އަށް ހަނގުރާމަވެރިން ވަދެގަނެފައިވަނީ ހޯމަ ދުވަހުގެ ހެނދުނުގެ ވަގުތެއްގައި ކަމަށް ރިޕޯޓްތައް ބުނެއެވެ.

މިހަމަލާ ދީފައިވަނީ ގޮވާތަކެތިން ފުރިބާރުކޮށްފައިވާ އެމްބިއުލާންސެއް ބޭނުންކޮށްގެން ކާބުލްގެ އަސްކަރިއްޔާގެ އިމާރާތަކަށް ހަމަލާދީ 100 އެއްހާ މީހުން މަރާލިތާ ދެ ދުވަސް ވެސް ނުވަނީހެވެ.

އަފްޣާނިސްތާނުގައި ހަރަކާތްތެރިވާ ތާލިބާން ޖަމާއަތުގެ ހަނގުރާމަވެރިންނާއި އިސްލާމިކް ސްޓޭޓްގެ ހަނގުރާމަވެރިން ފާއިތުވި މަސްތަކުގައި އެގައުމުގައި ގިނަ ހަމަލާތަކެއް ދީފައިވެއެވެ.

ހޮނިހިރު ދުވަހު އެމްބިއުލާންސް ބޭނުން ކޮށްގެން ދިން ހަމަލާގެ ހަފްތާއެއް ކުރިން ކާބުލްގައި ހުންނަ އިންޓަރކޮންޓިނެންޓަލް ހޮޓަލަށް ދިން ހަމަލާއެއްގައި 22 މީހަކު މަރުވެފައިވެއެވެ. މިހަމަލާގައި މަރުވި މީހުންގެ ތެރޭގައި ގިނައީ ބިދޭސީންނެވެ. މި ދެ ހަމަލާގެ ޒިންމާވެސް ނަގާފައިވަނީ އަފްޣާނިސްތާނުގެ ތާލިބާން ޖަމާއަތުންނެވެ.

ކާބުލްގައި ހުންނަ އަސްކަރީ އެކަޑަމީ އަށް ހޯމަ ދުވަހު ހަމަލާ ދޭން ފަށާފައިވަނީ އަފްޣާނިސްތާން ގަޑިން ފަތިހު 5 ޖަހަން ކައިރިވެފައިވަނިކޮށެވެ.

ކާބުލްގައި ހުންނަ ބީބީސީގެ ރިޕޯޓަރު މަހްފޫޒް ޒުބައިދު ވަނީ، ފަތިހުގެ ވަގުތުގައިގައި އަސްކަރީ އެކަޑަމީން ބަޑީގެ އަޑުފަށްގަނޑު އިވިގެންދިޔަ ކަމަށް ރިޕޯޓްކޮށްފައެވެ.

މިހަމަލާ ދިން ސަރަހައްދުގެ ހުރިހާ މަގެއް އަފްޣާނިސްތާނުގެ ސަލާމަތީ ބާރުތަކުން ބަންދުކޮށްފައިވާ ކަމަށް އެގައުމުގެ ތޯލޯ ނިއުސް އޭޖެންސީން ބުނެއެވެ.

މިހާދިސާގައި މަރުވި މީހުންގެ އަދަދު މިހާތަނަށް ކަށަވަރުވެފައެއްނުވެއެވެ.

އަފްޣާނިސްތާނުގައި ހަރަކާތްތެރިވާ ތާލިބާން ހަނގުރާމަވެރިންގެ ހަމަލާތައް އެގައުމުގެ ސަލާމަތީ ބާރުތަކަށް އަމާޒުކުރުން ވަނީ އާއްމުވެފައެވެ.

މިދިޔަ އަހަރުގެ އޮކްޓޯބަރު މަހު، ކާބުލްގެ ސިޓީ ސެންޓަރުގެ ހުޅަނގުގައި ހުންނަ މާޝަލް ފާހިމް މިލިޓަރީ އެކަޑަމީގެ ބޭރުގައި ދިން މިފަދަ ހަމަލާއެއްގައި އަސްކަރީ ކެޑޭޓުންގެ 15 މީހަކު މަރާލާފައިވެއެވެ.