ރެއާލްއަށް ބަދަލެއް ނުވާނަން، ޕީއެސްޖީގައި ހުރީ ހިތްހަމަޖެހިގެން: ނޭމާ

ސްޕެއިންގެ ރެއާލް މެޑްރިޑްއަށް ބަދަލުނުވާނެ ކަމަށާއި ޕީއެސްޖީގައި ހުރީ ވަރަށް ހިތްހަމަޖެހިގެން ކަމަށް އެ ޓީމަށް ކުޅެމުން އަންނަ ބްރެޒިލްގެ ތަރި ނޭމާ ބުނެފިއެވެ.

ނޭމާ މިހެން ބުނެފައިވަނީ އޭނާ ހޯދުމަށް ރެއާލްއިން މަސައްކަތްކުރަމުން އަންނަ ކަމަށް ބުނެ މީޑިއާތަކުގައި އަޑު ފެތުރިފައިވާ ދަނޑިވަޅެއްގައެވެ. މިދިޔަ ހޫނު މޫސުމުގެ ޓްރާންސްފާ މާކެޓުގައި ރެއާލްގެ ވާދަވެރި ބާސާ ދޫކޮށް ދުނިޔޭގެ ރެކޯޑު ޓްރާންސްފާ ފީއެއް ކަމަށްވާ 222 މިލިއަން ޔޫރޯއަށް ނޭމާ ބަދަލުވީ ފްރާންސްގެ ގަދަ ބާރު ޕީއެސްޖީއަށެވެ. ބައެއް މީޑިއާތަކުން ރިޕޯޓުކޮށްފައިވާ ގޮތުގައި މި ސީޒަނުގެ ޔުއެފާ ޗެމްޕިއަންސް ލީގު ޕީއެސްޖީއިން ކާމިޔާބުކޮށްފިނަމަ ރެއާލްއަށް އޭނާ ވިއްކާލުމަށް އެ ޓީމުން އެއްބަސްވާނެއެވެ.

އުމުރުން 25 އަހަރުގެ ފޯވާޑު ހޯދުމަށް ރެއާލް އިން މަސައްކަތްކުރަމުން އަންނަނީ އެ ޓީމުގެ ފޯވާޑް ލައިނުގައި މިވަގުތު ތިބި ކުޅުންތެރިންނަށް އެންމެ އެދެވޭ ކުޅުން ނުދެއްކުމާ ގުޅިގެންނެވެ. މިދިޔަ ޑިސެމްބަރު މަހުގެ ތެރޭގައި ރެއާލްގެ ރައީސް ވެސް ވަނީ ނޭމާ އެ ޓީމަށް ގެންނަން ބޭނުންވާ ކަމަށް ބުނެ ވާހަކަ ދައްކާފައެވެ. އޭނާ ބުނީ ކޮންމެވެސް އެއް ހިސާބަކުން ރެއާލްއަށް ނޭމާ ގެންނަން ބޭނުންވާ ކަމަށާއި ރެއާލްއަށް ކުޅުމުގެ ހުރިހާ ސިފައެއް ނޭމާގެ ކިބައިގައި އެބަހުރި ކަމަށެވެ.

މި ވާހަކަތަކާއި ގުޅިގެން ނޫސްވެރިން ކުރި ސުވާލުތަކަށް ޖަވާބުދެމުން ނޭމާ ބުނީ އޭނާ ޕީއެސްޖީގައި ހުރީ ވަރަށް ހިތްހަމަޖެހިގެން ކަމަށާއި ޓީމުގައި ތިބި ކުޅުންތެރިންނާއި މެދު ވެސް އެއްވެސް މައްސަލައެއް ނެތް ކަމަށެވެ. އޭނާ ބުނީ ޕީއެސްޖީގައި އޭނާއަށް ރަނގަޅު ކުޅުމެއް ދެއްކޭ ކަމަށް ގަބޫލުކުރާ ކަމަށާއި އޭނާގެ އަމާޒަކީ ޕީއެސްޖީއާއެކު ތާރީހުން ޖާގަ ހޯދުން ކަމަށެވެ. ނޭމާ ބުނީ އޭނާ ސަންޓޯސްގައި ކުޅުނު ދުވަސްވަރު ވެސް އޭނާ ޓީމަކަށް ބަދަލުވާން އުޅޭ ކަމުގެ އަޑުތައް ޓްރާންސްފާ މާކެޓުގައި ފެތުރޭ ކަމަށާއި އެފަދަ އަޑުތަކުން ދުރުވުމަކީ ނުކުރެވޭނެ ކަމެއް ކަމަށެވެ.

މީޑިއާތަކުން ބުނާ ގޮތުގައި ނޭމާ ޕީއެސްޖީ ދޫކޮށްލަން ބޭނުންވަނީ އެޑިންސަން ކަވާނީ އާއި އޭނާއާ ދެމެދު މައްސަލަ ޖެހުމާއި ގުޅިގެންނެވެ. ނޭމާއާ ދެކޮޅަށް ޕީއެސްޖީގެ ސަޕޯޓަރުން ސްޓޭޑިއަމްގައި އަޑުގަދަކުރުމާއި ގުޅިގެން ނޭމާ ބުނީ އޭނާއަކީ ތަރުހީބު ވެސް ލިބޭ ކުޅުންތެރިޔެއް ކަމަށާއި ހުރިހާ ސަޕޯޓަރުން ހިތްހަމަޖެހޭ ގޮތަށް ކަންކަން ނުކުރެވޭނެ ކަމަށެވެ. އޭނާ ބުނީ ޓީމުގައި ޕެނަލްޓީ ޖެހުމުގެ ޒިންމާ ހަވާލުކޮށްފައިވަނީ އޭނާއާ ކަމަށާއި އެ ޒިންމާ އަދާކުރުމަކީ އޭނާ ކޮންމެހެން ކުރަންޖެހޭ ކަމެއް ކަމަށެވެ.

ނޭމާ ބުނީ ކަވާނީއަށް އެއްބާރުލުން ދޭން ބޭނުންވާ ކަމަށާއި އޭނާ ރެކޯޑު މުގުރާލުމާއެކު ވަރަށް އުފާވާ ކަމަށެވެ. އަދިވެސް ސީޒަނުގައި ގިނަ މެޗުތަކެއް ކުރިޔަށްހުރިކަން ފާހަގަކުރަމުން ނޭމާ ބުނީ އޭނާ ޓީމަށް ކޮށްދޭންޖެހޭ ހުރިހާ ކަމެއް އެނގޭ ކަމަށާއި އެކަންކަން ކުރުމުގައި ދެމިހުންނާނެ ކަމަށެވެ.

ބާސެލޯނާގައި ކާމިޔާބު ސީޒަންތަކެއް ހޭދަކުރުމަށްފަހު އޭނާ އަންނަނީ ޕީއެސްޖީއަށް ބަދަލުވެ އެ ޓީމުގައި ތަފާތު މޮޅު ކުޅުމެއް ދައްކަމުންނެވެ. އޭނާވަނީ މިހާތަނަށް އެ ޓީމަށް ކުޅުނު 24 މެޗުގައި 36 ލަނޑު ޖަހައިދީފައެވެ.