އަށް އަހަރަށްފަހު މަޝަރާނޯ، ބާސެލޯނާގެ ސަޕޯޓަރުންނަށް އަލްވަދާއު ކިޔައިފި

ސްޕެއިންގެ ބާސެލޯނާގައި ހޭދަކުރި 8 ސީޒަނަށްފަހު، އާޖެންޓީނާގެ ތަޖުރިބާކާރު ޑިފެންޑަރ ހާވިއޭ މަޝަރާނޯ އެކްލަބުގެ ސަޕޯޓަރުންނަށް އަލްވަދާއު ކިޔައިފި އެވެ.

ބާސެލޯނާގެ ސަޕޯޓަރުންނަށް މަޝަރާނޯ އަލްވަދާއު ކިޔާފައިވަނީ، ސްޕެނިޝް ކޮޕަ ޑެލް ރޭގެ ކުއާޓަރ ފައިނަލްގައި އެސްޕަނިޔޯލް އާ ދެކޮޅަށް ބުރާސްފަތި ދުވަހުގެރޭ ކުޅުނު މެޗުގައެވެ.

މިމެޗުގެ ކުރިން ބާސެލޯނާގެ ރައީސް ޖޯސެޕް މާރިއޯ ބާޓޯމެއު އާ، އެކްލަބުގެ ބޯޑުގެ މެމްބަރުން ވަނީ މަޝަރާނޯ އަށް އަލްވަދާއު ކިޔުމަށް ހާއްސަ ރަސްމިއްޔާތެއް ބާއްވާފައެވެ. ކޭމްޕް ނޫގެ އޮޑިޓޯރިއަމްގައި ބޭއްވި މިހަފްލާގައި ބާސެލޯނާގެ ރައީސް އަދި ބޯޑުގެ މެމްބަރުންނާއި ސީނިއަރ ޓީމުގެ ކުޅުންތެރިންނާއި ކޯޗިންގ ސްޓާފުން ބައިވެރިވިއެވެ.

މަޝަރާނޯ އޭނާގެ ތިން ކުދިންނާއެކު ދަނޑަށް ނުކުތުމާއެކު، އެކްލަބަށް އޭނާ ކޮށްދިން ޚިދުމަތް ފާހަގަކޮށް، ބާސެލޯނާގެ ސަޕޯޓަރުން އެކަމަށް ޝުކުރު އަދާކުރުމުގެ ޝުއޫރުތައް ފާޅުކުރި އެވެ.

މިހަފްލާގައި ބާސެލޯނާގެ ކެޕްޓަން އަންދްރޭ އިނިއެސްޓާ ވަނީ، އެކްލަބާއެކު މަޝަރާނޯ ހޯދާފައިވާ ކާމިޔާބީތައް ރަމްޒުކޮށްދޭ ހަނދާނީ ފިލައެއް ހަވާލުކޮށްފައެވެ.

އަށް އަހަރަށްފަހު މަޝަރާނޯ ބާސެލޯނާ ދޫކޮށްލަނީ ޗައިނީސް ސުޕަރ ލީގުގެ ކްލަބް ހެބޭއީ ޗައިނާ ފޯޗޫންއަށް ބަދަލުވުމަށެވެ.

2010 ވަނަ އަހަރު ލިވަޕޫލް އިން 17 މިލިއަން އެމެރިކާ ޑޮލަރުގެ އަގަކަށް ބާސެލޯނާ އާ ގުޅުނު އުމުރުން 33 އަހަރުގެ ޑިފެންޑަރު މިހަފްތާގެ ތެރޭގައި ބާސެލޯނާ ދޫކޮށްލާނެ ކަމަށް އެކްލަބުން ބުނެއެވެ.

އާޖެންޓީނާގެ ރިވަރޕްލޭޓުން 2003 ވަނަ އަހަރު ޕްރޮފެޝަނަލް ކެރިއަރު ފެށި މަޝަރާނޯ އެކްލަބު ދޫކޮށް ބްރެޒިލްގެ ކޮރިންތިއަންސްއަށް ބަދަލުވީ 2005 ވަނަ އަހަރުއެވެ. އެކްލަބަށް އެއް އަހަރު ކުޅުމަށްފަހު، އޭނާ ޔޫރަޕަށް ބަދަލުވީ 2006 ވަނަ އަހަރުއެވެ. ޔޫރަޕްގައި އޭނާގެ ފުރަތަމަ ކްލަބަކީ އިނގިރޭސި ޕްރިމިއަރ ލީގުގެ ވެސްޓް ހޭމް ޔުނައިޓެޑެވެ. އެހެންނަމަވެސް ވެސްޓް ހޭމްއަށް އެންމެ ފަސް މެޗު ކުޅެދިނުމަށްފަހު އޭނާ ވަނީ 2007 ވަނަ އަހަރު ލިވަޕޫލްއަށް ބަދަލުވެފައެވެ.

2003 ވަނަ އަހަރުން ފެށިގެން އާޖެންޓީނާގެ ސީނިއަރ ގައުމީ ޓީމަށް ކުޅެމުން އަންނަ މަޝަރާނޯ ވަނީ ގައުމީ ޓީމަށް 141 މެޗު ކުޅެ، ތިން ލަނޑު ޖަހައިދީފައެވެ. އޭނާ އަކީ 2014 ވަނަ އަހަރު ބްރެޒިލްގައި ބޭއްވި ފީފާ ވޯލްޑް ކަޕްގެ ރިހި މެޑަލް ހޯދި އާޖެންޓީނާގެ ގައުމީ ޓީމުގެ މުހިންމު ކުޅުންތެރިޔެކެވެ.

ބާސެލޯނާގައި ހޭދަކުރި 8 ސީޒަނުގައި އޭނާ ވަނީ، އެކްލަބާއެކު 18 މުބާރާތެއް ކާމިޔާބުކޮށްފައެވެ. އޭގެ ތެރޭގައި ސްޕެނިޝް ލީގު 4 ފަހަރު، ސްޕެނިޝް ކޮޕަ ޑެލް ރޭ 4 ފަހަރު، ސްޕެނިޝް ސުޕަރ ކަޕް 3 ފަހަރު، ޔުއޭފާ ޗެމްޕިއަންސް ލީގު 2 ފަހަރު، ޔުއޭފާ ސުޕަރ ކަޕް 2 ފަހަރު އަދި ފީފާ ކްލަބް ވާރލްޑް ކަޕް 2 ފަހަރު ކާމިޔާބު ކޮށްފައެވެ.

ބާސެލޯނާ އަށް 334 މެޗު ކުޅެ، އެއް ލަނޑު ޖަހައިދީފައިވާ މަޝަރާނޯ އެކްލަބުގައި ހޭދަކުރި މުއްދަތުގައި އޭނާ ފާހަގަ ވެފައިވަނީ ދުނިޔޭގެ އެންމެ މޮޅު ޑިފެންޑަރުންގެ ތެރޭގައެވެ. އެގޮތުން ފީފާ އިން ކޮންމެ އަހަރަކު ހޮވާ ފީފާޕްރޯ ވާރލްޑް އިލެވަންގެ 2014، 2015، 2016 އަދި 2017 ގެ ޓީމްގައި އޭނާ ހިމެނެއެވެ.