ޔުވަންޓަސް އަށް ކުޅެމުން އައި ބްރެޒިލްގެ ރައިޓް ބެކް ޑެނީ އަލްވޭޒް އެ ކްލަބާ އަލްވަދާއު ކިޔައިފި އެވެ.

އިންސްޓްގްރާމްގައި އާންމުކުރި ޕޯސްޓެއްގައި އަލްވޭޒް ބުނީ ޔުވަންޓަސްއާ އެކު ވަރަށް ކާމިޔާބު އަހަރެއް ހޭދަކުރެވިއްޖެ ކަމަށާއި، ޓީމުގެ ކުޅުންތެރިން އަދި ސަޕޯޓަރުން ދިން އެއްބާރުލުން ދުވަހަކު ވެސް ހަދާން ނުނެތޭނެ ކަމަށެވެ.

އަލްވޭޒް ބުނީ ޔުވަންޓަސް ދޫކޮށްލަން އޭނާ ނިންމި ނިންމުމަކީ ވަރަށް އުނދަގޫ ނިންމުމެއް ކަމަށާއި، އެ ނިންމުން ދޭހަވާނީ ވަރަށް މަދު ބަޔަކަށް ކަމަށެވެ. އެގޮތުން އޭނާ ބުނީ ފުޓުބޯޅަ ކުޅެނީ ފައިސާއަށް ނޫން ކަމަށާއި، ފައިސާ އަށް އެއްވެސް ތަނަކަށް ބަދަލުނުވާނެ ކަމަށެވެ.

ރިޕޯޓްތައް ބުނާ ގޮތުން ދެ އަހަރު ދުވަހުގެ އެއްބަސްވުމެއްގެ ދަށުން މެންޗެސްޓާ ސިޓީއަށް ބަދަލުވުމަށް ނިންމާފައިވާ ކަމަށާއި، ކުރިޔަށް އޮތް ދުވަސްތަކުގައި އެކަން އިއުލާންކުރެވިގެންދާނެ ކަމަށެވެ. އެގޮތުން އޭނާ ހޯދުމަށް ފަސް މިލިއަން ޕައުންޑު ސިޓީން ހުށަހަޅާފައިވާ ކަމަށް ވެސް ރިޕޯޓްތައް ބުނެއެވެ.

މީގެކުރިން ބާސާއަށް ކުޅެފައިވާ އަލްވޭޒް އަށް ޔުވަންޓަސް އިން ހަފްތާއެއްގެ މައްޗަށް 85،000 ޕައުންޑު ލިބޭއިރު، ބަސާގައި ހުރިއިރު އޭނާ އަށް ހަފްތާއެއްގެ މައްޗަށް 100،000 ޕައުންޑު ލިބެއެވެ.

އަލްވޭޒް ހޯދުމަށް ސިޓީގެ އިތުރުން ޗެލްސީން ވެސް އަންނަނީ މަސައްކަތްކުރަމުންނެވެ. އެގޮތުން އޭނާއަކީ ޗެލްސީގެ ކޯޗު އެންޓޯނިއޯ ކޮންޓޭ އަށް ވަރަށް ކަމުދާ ކުޅުންތެރިއެއް ކަމަށް ރިޕޯޓްތައް ބުނެއެވެ.

އަލްވޭޒް ވަނީ ބާސާ ދޫކޮށްލުމަށް ފަހު ބާސާ އަށް ބަދަލުވެ އެ ކްލަބުގައި މޮޅު ކުޅުމެއް ދައްކާފައެވެ. އެގޮތުން އޭނާ ވަނީ މި ސީޒަނުގައި އެޓީމަށް ލީގު ތަށި އަދި އިޓާލިއަން ކަޕް ކާމިޔާބުކޮށްދިނުމަށް ވެސް މުހިންމު ދައުރެއް އަދާކޮށްފައެވެ. މީގެ އިތުރުން އޭނާ ވަނީ ޗެމްޕިއަންސް ލީގު ފައިނަލަށް ވެސް އެޓީމު ގެންގޮސްދިނުމަށް މުހިންމު ދައުރެއް އަދާކޮށްފައެވެ.

ސެވިއްޔާ އިން 2008 ވަނަ އަހަރު ބާސާ އަށް ބަދަލުވި މިހާރު އުމުރުން 33 އަހަރުގެ ޑެނީ އަލްވޭޒް ވަނީ އެޓީމުގައި ހޭދަކުރި އަށް ސީޒަނުގައި ކުޅުނު 391 މެޗުގައި 21 ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ އެޓީމާއެކު ސްޕެނިޝް ލަލީގާ ހަ ފަހަރު، ހަތަރު ކޮޕާޑެލްރޭ، ތިން ސްޕެނިޝް ސުޕާކަޕް، ތިން ޔުއެފާ ޗެމްޕިއަންސް ލީގު، ތިން ޔުއެފާ ސުޕާ ކަޕް އަދި ތިން ފީފާ ކްލަބް ވޯލްޑްކަޕް ކާމިޔާބުކޮށްފައެވެ.

ބްރެޒިލް ގައުމީ ޓީމާއެކު ފީފާ ކޮންފެޑެރޭޝަންސް ކަޕް ދެފަހަރު ކާމިޔާބުކޮށްފައިވާ އަލްވޭޒް ޔުވަންޓަސް އަށް ބަދަލުވީ މިދިޔަ އަހަރެވެ. އެގޮތުން އޭނާ ވަނީ މިހާތަނަށް އެޓީމަށް ކުޅުނު 32 މެޗުގައި ހަ ލަނޑު ކާމިޔާބުކޮށްފައެވެ.