28 އަހަރަށްފަހު ފުރަތަމަ ފަހަރަށް މިސްރު ވޯލްޑްކަޕަށް

28 އަހަރަށްފަހު ފުރަތަމަ ފަހަރަށް މިސްރުން ދުނިޔޭގެ އެންމެ ބޮޑު ފުޓްބޯޅަ މުބާރާތުގެ ޖާގައެއް ކަށަވަރު ކޮށްފިއެވެ.

އަންނަ އަހަރު ރަޝިއާގައި އޮންނަ ފީފާ ވޯލްޑްކަޕްގެ ޖާގައެއް މިސްރުން ކަށަވަރު ކުރީ އެފްރިކާގެ ކޮލިފައިންގ ބުރުގައި އަމިއްލަ ގައުމުގައި ކޮންގޯ ދެ ލަނޑު އެއް ލަނޑުން ބަލިކޮށްގެންނެވެ. މިއީ 1990 ވަނަ އަހަރު އިޓަލީގައި ބޭއްވި ވޯލްޑް ކަޕަށް ކޮލިފައިވި ފަހުން މިސްރުން ވޯލްޑް ކަޕްގެ ޖާގައެއް ކަށަވަރުކުރި ފުރަތަމަ ފަހަރެވެ.

ފުރަތަމަ ހާފުގައިވެސް މިސްރުގެ ފަރާތުން މޮޅު ކުޅުމެއް ފެނިގެން ދިޔައިރު އެ ޓީމަށް މި ހާފުގައި ލިބުނު ފުރުސަތުތަކުގެ ބޭނުން ހިފިފައެއް ނުވެއެވެ. ފުރަތަމަ ހާފު އެއްވެސް ޓީމަކަށް ލަނޑެއް ނުޖެހި ނިމިފައިވާއިރު ދެވަނަ ހާފުގައި މެޗުގެ ފުރަތަމަ ލަނޑު ޖަހާ ލީޑު ނެގީ މިސްރުންނެވެ. އެގޮތުން މެޗުގެ 63 ވަނަ މިނިޓުގައި އޭރިއާ ބޭރުން މި ލަނޑު އެ ޓީމަށް ކާމިޔާބު ކޮށްދިނީ މުހައްމަދު ސަލާހު އެވެ.

މި ލަނޑަށް ފަހުވެސް މިސްރުން ރަނގަޅަށް ކުޅެމުން ދަނިކޮށް ކޮންގޯއަށް ލިބުނު ހަމައެކަނި ފުރުސަތުގައި ބެންޗުން ކުޅެން އެރި އާނޯލްޑް ބޯކާ ވަނީ ލަނޑެއް ޖަހާ މެޗުގެ ނަތީޖާ ހަމަހަމަކޮށްދީފައެވެ. މި ލަނޑާއެކު މިސްރަށް ވޯލްޑް ކަޕްގެ އުއްމީދު ފަނޑުވެގެން ދިޔަ ނަމަވެސް އެ ޓީމުން ވަނީ ހިތްވަރުކޮށް ރަނގަޅަށް ކުޅެފައެވެ. ނަތީޖާއެއްގެ ގޮތުން ފުރިހަމަ ވަގުތު ހަމަވެގެން ރެފްރީ ކުޅެން ދެއްކި ވަގުތުގެ ވެސް ފަހު މިނިޓުގައި ސަލާހް ވަނީ ލިބުނު ޕެނަލްޓީއެއް ކާމިޔާބުކޮށް މިސްރު ވޯލްޑްކަޕަށް ގެންގޮސްދީފައެވެ.

ސަލާހް މި ލަނޑު ޖެހުމާއެކު މުޅި ސްޓޭޑިއަމް އާއި މިސްރުގެ އެކި ސަރަހައްދުތަކުގައި ވެސް އުފާ ފާޅުކުރުމުގެ އެކި ހަރާކާތްތަށް ފެށިގެން ދިޔައެވެ. އެގޮތުން އެ ގައުމުގެ ދިދަތަށް ހިފައިގެން ރައްޔިތުން މަގުމައްޗަށް ނުކުމެ އިރު އަރަން ދެން އުފާފާޅުކުރުމުގައި ދެމިތިބި ކަމަށް މީޑިއާތަކުން ރިޕޯޓުކުރެއެވެ. މިސްރުގެ ރައީސް އަބްދުލް ފައްތާހް އަލް ސީސީ ވެސް ވަނީ މިސްރުގެ ގައުމީ ޓީމަށާއި ރައްޔިތުންނަށް ތަހުނިޔާގެ މެސެޖެއް ފޮނުވާފައެވެ.

1990 ވަނަ އަހަރުގެ ފަހުން މިސްރުން ވޯލްޑް ކަޕްގައި ވާދަކޮށްފައިނުވި ނަމަވެސް އެ ޓީމުން ވަނީ ފާއިތުވި 28 އަހަރު ތެރޭ ހަތަރު ފަހަރެއްގެ މަތިން އެފްރިކަން ކަޕް އޮފް ނޭޝަންސް ކާމިޔާބު ކޮށްފައެވެ. މިސްރުގެ އިތުރުން އެފްރިކާ ބައްރުން ވޯލްޑްކަޕްގެ ޖާގައެއް ކަށަވަރު ކޮށްފައިވަނީ ހަމައެކަނި ނައިޖީރިއާ އިންނެވެ.