އެސެޓް މެގަޒިން އިން ރާއްޖެއަށް ބެސްޓް ބޮންޑް އެވޯޑް ދީފި

އެސެޓް މެގަޒިން އިން ރާއްޖެއަށް ބެސްޓް ބޮންޑްގެ އެވޯޑް ދީފިއެވެ.

ރާއްޖެ އިން ފުރަތަމަ ފަހަރަށް ސޮވެރިން ބޮންޑް ވިއްކާފައި ވަނީ މިދިޔަ އަހަރުގެ މެއި މަހުގެ ތެރޭގައެވެ. ސަރުކާރުން ވިއްކާލި މި ބޮންޑަށް ދި އެސެޓް މެގަޒިން އިން ދޭ ޓްރިޕަލް އޭ ކަންޓްރީ އެވޯޑްތަކުގެ ތެރެއިން ބެސްޓް ބޮންޑް އެވޯޑް ދީފައި ވަނީ މި ޖެނުއަރީ މަހުގެ 17 ވަނަ ދުވަހު ހޮންގ ކޮންގގައި ބޭއްވި ހާއްސަ ރަސްމިއްޔާތެއްގައެވެ. ސަރުކާރުން 200 މިލިއަން ޑޮލަރުގެ ބޮންޑު ވިއްކާފައި ވަނީ ފަސް އަހަރު ދުވަހުގެ ތެރޭގައި އަނބުރާ ދައްކަން ފަށާ ގޮތަށެވެ.

ސަރުކާރުން ވިއްކި ބޮންޑް ބައިނަލްއަގްވާމީ އިދާރާއަކުން އަގު ވަޒަންކޮށްފައިވާ އިރު މި "ބޮންޑް ޑީލް" ހިމެނިފައި ވަނީ މި ސަރަހައްދުގައި އެންމެ ފާހަގަކޮށްލެވޭ އެންމެ ރަގަޅު ބޮންޑްގެ ފިޔަފާރީގެ ގޮތުގައެވެ. ދިވެހި ރާއްޖޭގެ އިތުރުން ސްރީލަންކާ އަށް ވެސް ބެސްޓް ބޮންޑް އެވޯޑް ވަނީ ދީފައެވެ.

މީގެ އިތުރުން މާލީ ދާއިރާގެ ތަފާތު ކަންތައްތަކުން އެންމެ ފާހަގަކޮށްލެވޭ ގައުމުތަކަށް ތަފާތު އެވޯޑްތައް ވަނީ ދީފައެވެ. އެގޮތުން ސްރީލަންކާއަށް ބެސްޓް ބޮންޑްގެ އެވޯޑްގެ އިތުރަށް ބެސްޓް ސްޓްރަކްޗާޑް ފައިނޭންސް އެވޯޑް ވެސް ލިބިފައިވެއެވެ. ޕާކިސްތާނަށް ބެސްޓް އީކުއިޓީ އެވޯޑާއި ބެސްޓް ކޯޕަރޭޭޓް ލޯން އިތުރުން ބެސްޓް މަރޖަރސް އެންޑް އެކުއިސިޝަންސް އެވޯޑް ވަނީ ލިބިފައެވެ. މީގެ އިތުރުން އިންޑިއާއަށް ވަނީ ތަފާތު އެކި ދާއިރާތަކުން 13 އެވޯޑެއް ލިބިފައެވެ. މި އެވޯޑްތަކުގެ ތެރޭގައި ބެސްޓް ގްރީން ބޮންޑް އެވޯޑާއި ބެސްޓް ކޯޕަރޭޓް ބޮންޑާއި ބެސްޓް ޕްރައިވެޓް އީކުއިޓީ ޑީީލް އެވޯޑް ވެސް ހިމެނެއެވެ.