ޓްރަމްޕް ބޭނުންވާ ގޮތް ނުވުމުން ސެނެޓްގެ ޤަވާޢިދުތައް ބަދަލުކުރަން އަންގަވައިފި!

ސަރުކާރު ހިންގަން ބޭނުންވާ ބަޖެޓެއް ފާސްނުވެ، އިދިކޮޅު ޑިމޮކްރެޓުން ޓްރަމްޕްގެ ކޮޅަށް ދީލާނުލުމުން، ސެނެޓުގެ ޤަވާޢިދަށް ބަދަލުގެނެސްގެން ބަޖެޓެއް ފާސްކޮށްދިނުމަށް އެމެރިކާގެ ރައީސް ޑޮނަލްޑް ޓްރަމްޕް އެމަނިކުފާނުގެ ރިޕަބްލިކަން ޕާޓީއަށް އަންގަވައިފިއެވެ.

މިދިޔަ ހުކުރު ދުވަހުގެ ރޭ މެންދަމު 12:00 އާއި ހަމަޔަށް ބަޖެޓެއް ފާސްނުވުމުން އެމެރިކާގެ ސަރުކާރު ވަނީ ރަސްމީކޮށް ބަންދުވެފައެވެ. ހަފްތާ ބަންދުގައި ސެނެޓުގައި ގިނަ މަޝްވަރާތަކެއް ޑިމޮކްރެޓުންނާއި ރިޕަބްލިކަން ޕާޓީއިން ކޮށްފައިވެއެވެ. އެހެން ނަމަވެސް އެމެރިކާގެ އިމިގްރޭޝަން ޤާނޫނުތަކަށް ކުރީގެ ރައީސް ބަރަކް އޮބާމާ ގެންނެވި އިސްލާހުތަކަށް ގެންނެވި ބަދަލުތައް ދެމެހެއްޓުމަށް ޑިމޮކްޓިކް ޕާޓީއިން އެދޭ އެދުމަށް އިޖާބަ ދިނުމަށް ޓްރަމްޕް އެއްބަސްވެވަޑައިނުގަތުމުން، ވައިޓް ހައުސްއިން ހުށަހެޅި ބަޖެޓަށް ޑިމޮކްރެޓިކް ޕާޓީއިން ވޯޓު ދީފައެއް ނުވެއެވެ.

ވަގުތީ ގޮތުން ސަރުކާރު ހިންގަން ބޭނުންވާ ބަޖެޓް ފާސްކުރުމަށް ސެނެޓްގެ 100 މެމްބަރުންގެ ތެރެއިން 60 މެމްބަރުންގެ ވޯޓު ބޭނުންވާއިރު، ލިބިފައިވަނީ 51 ވޯޓެވެ. ސެނެޓުގައި ވެރިކަންކުރާ ރިޕަބްލިކަން ޕާޓީއަށް މެޖޯރިޓީ ލިބިފައި އޮތަސް، އެޕާޓީއަށް ލިބިފައިވަނީ 51 ގޮނޑިކަމުން ޑިމޮކްރެޓުންގެ ތާޢިދު މިފަދަ ކަންކަމަށް ބޭނުންވެއެވެ.

ސެނެޓްގެ މެޖޯރިޓީ ލީޑަރު މިޗް މެކޮނަލް އާއި މައިނޯރިޓީ ލީޑަރު ޗަކް ޝޫމަރ ވަނީ ހަފްތާ ބަންދު ތެރޭގައިވެސް ކުރިއަށް އޮތް 3 ހަފްތާއަށް ސަރުކާރު ހިންގޭނެ ބަޖެޓެއް ފާސްވޭތޯ މަޝްވަރާކުރައްވާފައެވެ. އެހެންނަމަވެސް އާދިއްތަ ދުވަހުގެ ރޭވެސް އަލިމަގެއް ފެނިފައެއް ނުވެއެވެ. ބަޖެޓެއް ފާސްވޭތޯ އަނެއްކާވެސް ހޯމަ ދުވަހުގެ ހެނދުނު ވޯޓެއް ނަގާނެއެވެ. ހޯމަ ދުވަހު ހަފްތާ ފެށޭއިރު އެމެރިކާ ސަރުކާރުގެ ގިނަ މުވައްޒަފުންތަކެއް ވަޒީފާއަށް ނުނިކުންނާނެއެވެ. އަދި އެމުވައްޒަފުން ވަޒީފާއަށް ނިކުންނާނީ ބަޖެޓެއް ފާސްވުމުންނެވެ.

އަނެއްކޮޅުން ރައީސް ޑޮނަލްޑް ޓްރަމްޕްވެސް ހުންނެވީ ބަޖެޓް ފާސްކުރަން ޑިމޮކްރެޓިކް ޕާޓީއިން ކުރާ ޑިމާންޑްތަކަށް ދީލާލައްވާ ގޮތަކަށް ނޫނެވެ. އަދި އިދިކޮޅުން ދުލެއް ނުދިނުމުން، ބަޖެޓް ފާސްކުރުމަށް ސެނެޓްގެ ސިމްޕަލް މެޖޯރިޓީއިން އެކަން ކުރެވޭ ގޮތަށް ބަދަލުކުރުމަށް ޓްރަމްޕްވަނީ ރިޕަބްލިކަން ޕާޓީއަށް އަންގަވާފައެވެ. އެހެން ނަމަވެސް އެފަދަ ނިންމެވުމެއް މެޖޯރިޓީ ލީޑަރ މެކޮނަލް ނިންމަވާފާނެކަމަށް ނުބެލެވެއެވެ. ސިމްޕަލް މެޖޯރިޓީއިން ބަޖެޓްގެ ކަންކަން ފާސްކުރެވޭ ގޮތަށް ހަދައިފިނަމަ މައިނޯރިޓީ ޕާޓީއަށް ސެނެޓްގައި އޮންނަ ބާރުތައް ހަނިވެގެން ދާއިރު، މެޖޯރިޓީގައި އޮންނަ ޕާޓީ ފަހުން މައިނޯރިޓީއަށް ގޮސްފިނަމަ އެޕާޓީއަކަށް އެކަމުގެ ގެއްލުން ދައްކާނެތީ ބޮޑު ދެޕާޓީއިންވެސް ބޭނުންވަނީ މިހާރު އޮތް ގޮތަށް 60 ވޯޓުން ފާސްވާ ގޮތަށް ބާއްވާށެވެ.

ބަޖެޓެއް ފާސްކޮށްނުދީގެން ޓްރަމްޕް ކޯފާ އިސްކުރައްވާ ޑިމޮކްރެޓިކް ޕާޓީއަށް ރައްދުކޮށް ޓްވީޓްކުރައްވަމުން ގެންދަވާއިރު، ރިޕަބްލިކަން ޕާޓީގެ ސެނެޓަރުން ގެންދަވަނީ ޓްރަމްޕްގެ އަރިހުގައި މަސައްކަތްކުރާ މުވައްޒަފުންނާއި އަރިސް ބޭފުޅުންނަށް ފާޑު ވިދާޅުވަމުންނެވެ. އެގޮތުން މިމައްސަލައަށް ހައްލެއް ހޯދުމަށް ސެނެޓަރުން މަސައްކަތްކުރައްވާއިރު، ވައިޓް ހައުސްއިން މިމައްސަލަ ގޯސްކުރަން މަސައްކަތްކުރާކަމަށް ރިޕަބްލިކަން ޕާޓީގެ ސެނެޓަރުން ތުހުމަތުކުރައްވައެވެ.