ތުރުކީގެ ސިފައިން ސީރިޔާގެ އުތުރުގައި އުޅޭ ކުރުދީންނަށް ވައިގެމަގުން ހަމަލާދީފި

ތުރުކީގެ ހަނގުރާމަމަތީ މަތިންދާ ބޯޓުތަކުން ސީރިޔާގެ އުތުރުގައި އުޅޭ ކުރުދީންނަށް އަމާޒުކޮށް ވައިގެ މަގުން ހަމަލާދޭންފަށައިފިއެވެ.

އެ ސަރަހައްދުގެ ކުރުދީންނަކީ އެމެރިކާއިން މަދަދުދޭ ބަޔަކަށްވާއިރު ތުރުކީގެ މި ފިޔަވަޅަކީ އެމެރިކާއާއި މެދު ނުތަނަވަސްކަން އުފެދިގެންދާނެކަމެއްކަމަށްވަނީ ބެލެވިފައެވެ.

ތުރުކީއިން ސިފަ ކުރާ ގޮތުގައި ވައިޕީޖީ ހަނގުރާމަވެރިންނަކީ ޓެރެރިސްޓުންނެވެ. އަދި ތުރުކީގެ ދެކުނު ބޯޑަރުކައިރީގައި އުޅޭ އެ ކުރުދީން ނައްތާލަން ތުރުކީއިން ބޭނުންވެއެވެ.

ވައިޕީޖީއިން ބުނިގޮތުގައި ތުރުކީއިން ދިން ހަމަލާތަކުގައި ކުރުދީންގެ މަދުވެގެން ނުވަ މީހުން މަރުވިއެވެ.

ރަޝިއާއިންވަނީ އަފްރިންގައި ތިބި އެ ގައުމުގެ ފައުޖުތައް ދުރަށް ޖައްސާފައެވެ. އެ ގައުމުން ބުނެފައިވަނީ އެ ހަމަލާތަކާ ގުޅިގެން އެ ގައުމުން ކަންބޮޑުވާ ކަމަށާއި ނަމަވެސް އެކަމުގެ ތެރެއަށް ވަންނަން ބޭނުން ނުވާކަމަށެވެ.

އަފްރިންގައި ތުރުކީއިން ހޮނިހިރު ދުވަހު އޮޕަރޭޝަނެއް ފަށާފައިވާއިރު ތުރުކީއިން އެ ސަރަހައްދަށް ހަމަލާދެމުންދާތާ ދެ ދުވަސްވެއްޖެއެވެ.

ތުރުކީގެ ފޮރިން މިނިސްޓަރ މެވްލުތު ކަވުސޮގްލޫ ވިދާޅުވީ އެގައުމުން ހަމަލާ ދިނުމުގެ ކުރިން، ސީރިޔާގެ ސަރުކާރު ވެސް ހިމެނޭގޮތުން ހަނގުރާމައިގައި ބައިވެރިވާ ހުރިހާ ޕާޓީތަކަށް އަންގާފައިވާނެ ކަމަށެވެ.