އަންހެނަކު މަރުވިތާ 10 ދުވަސް ފަހުން ވިހައިފިއެވެ.
ވިހެއި އިރު ކުއްޖާވެސް އޮތީ މަރުވެފައެވެ.
ދެކުނު އެފްރިކާގެ ކޭޕް ޕްރޮވިންސް ގައި ހިނގި މި ހާދިސާގައި، އުމުރުން 33 އަހަރުގެ މި އަންހެން މީހާ މަރުވީ ކުއްލި ގޮތަކަށް ނޭވާލާން އުނގޫވާތީ އުޅުމަށްފަހުގައެވެ.
މަރުވި އިރު ދުނިޔޭގައި 5 ކުދިން ތިބި މި އަންހެންމީހާގެ ޖަނާޒާގެ ކަންކަން ފުރިހަމަ ކުރުމަށް އާއިލާގެ ފަރާތުން ހަވާލު ކުރީ އެކަމުގެ ޚިދުމަތްދޭ ކުންފުންޏަކަށް ކަމަށް ރިޕޯޓުތައް ބުނެއެވެ.
މި އަންހެން މީހާ ވަޅުލުމަށް ހަމަޖެހިފައިވާ ދުވަހުގެ ކުރީ ދުވަހު، އެއީ އޭނާ މަރުވިތާ ދިހަ ވަނަ ދުވަހު، ޖަނާޒާގެ ކަންކަން ބެލެހެއްޓުމަށް ހަވާލުވި ތަނުގެ މުވައްޒަފަކަށް ފާހަގަވީ އޭނާގެ ހަށިގަނޑުން އޭނާގެ ދަރިފުޅު ނިކުމެފައި އޮތް ތަނެވެ.
އުފަންވި އިރު ކުއްޖާ އޮތީ މަރުވެފައި ކަމަށާއި އަދި އެ މަންޒަރު ފެނުނު މީހުންނަށް ކުއްލި ހައިރާން ކަމާއި ބިރުވެރިކަން އިހުސާސު ކުރެވުނު ކަމަށް ބުނެފައިވެއެވެ.
ޖަނާޒާގެ ކަންކަން ބެލެހެއްޓުމަށް ހަވާލުވި ތަނުގެ މުވައްޒަފަކު ބުނެފައިވަނީ އެކަމުގައި އޭނާ އުޅޭތާ 20 އަހަރަށް ވުރެ ގިނަ ދުވަސް ވެއްޖެ ކަމަށާއި ދުވަހަކުވެސް މަރުވެފައި އޮތް މީހަކު ވިހެއި ވާހަކަ އެއް އަޑުވެސް ނާހާ ކަމަށާއި އެފަދަ ކަމެއް ނުވެސް ދެކޭ ކަމަށެވެ.
އަންހެން މީހާގެ އާއިލާ އިން ބުނީ މި ޚަބަރު ލިބުމުން އެމީހުންނަށް ހިތާމައިގެ މައްޗަށް ހިތާމަ ލިބިއްޖެ ކަމަށެވެ.
