ނިއުޒިލޭންޑްގެ ބޮޑުވަޒީރު އާލާސްވެ އިންނެވިކަން އިއުލާންކުރައްވައިފި

ނިއުޒިލޭންޑްގެ ބޮޑުވަޒީރު ޖަސިންޑާ އާޑެން އާލާސްވެ އިންނެވިކަން އިއުލާންކުރައްވައިފިއެވެ.

އުމުރުން 37 އަހަރުގެ ޖަސިންޑާ އާޑެން ނިއުޒިލެންޑްގެ ބޮޑުވަޒީރުކަމާއި ހަވާލުވެވަޑައިގަތީ މިދިޔަ އަހަރުގެ އޮކްޓޯބަރު މަހުއެވެ. އެކަމަނާއަކީ 1856 ވަނަ އަހަރުގެ ފަހުން އެޤައުމުގެ ބޮޑުވަޒީރުކަމާ ހަވާލުވެވަޑައިގެންނެވި އެންމެ ޒުވާން ބޭފުޅާއެވެ.

ފުރަތަމަ ދަރިފުޅަށް އާލާސްވެ އިންނެވިކަން އާޑެން އިއުލާންކުރެއްވީ ހުކުރު ދުވަހުއެވެ. ސޯޝަލް މީޑިއާގައި އެކަމަނާ އެކަން އިއުލާންކުރެއްވުމާ އެކު ގިނަ އަދަދެއްގެ ބަޔަކު މަރުހަބާ ކިޔާފައިވެއެވެ.

އާޑެން ވިދާޅުވީ ޖޫން މަހު ދަރިފުޅު ލިބުމުން ހަ ހަފްތާގެ ޗުއްޓީއެއް ނަންގަވާނެ ކަމަށެވެ. އަދި އެމުއްދަތުގައި ސަރުކާރު ހިންގަވާނީ އެކަމަނާގެ ލޭބަރ ޕާޓީއާ އެކު ކޯލިޝަން ހަދާފައިވާ ނިއުޒިލޭންޑް ފަސްޓް ޕާޓީގެ ލީޑަރު ވިންސްޓަން ޕީޓަރސްއެވެ. އާޑެން ވިދާޅުވީ ޗުއްޓީގައި ހުންނެވި ނަމަވެސް ސަރުކާރުގެ އިސްވެރިންނަށް ބަރާބަރަށް އެކަމަނާއާ ގުޅުއްވޭނެ ކަމަށެވެ. އަދި ހަ ހަފްތާގެ ޗުއްޓީއަކަށް ފަހު އަނބުރާ ބޮޑުވަޒީރުގެ އޮފީހަށް އާޑެން ނިކުމެވަޑައިގަތުމުން ދަރިފުޅުގެ ކަންކަން ބަލަހައްޓާނީ ފިރިކަލުން ކްލާކް ގޭފޯޑެވެ. އަދި ގޭފޯޑް ހުންނަވާނީ ދަރިފުޅުގެ ކަންކަން ބަލަހައްޓަން ގޭގައި ކަމަށް ބޮޑުވަޒީރުގެ އޮފީހުން ބުނެއެވެ.

އާޑެން ވިދާޅުވީ އެކަމަނާއަކީ މަލްޓި ޓާސްކްކުރައްވާ ހަމައެކަނި އަންހެނާ ނޫން ކަމަށާއި، އަދި ވަޒީފާއަށް ދަމުން ދަރިއަކު ހޯދާ ފުރަތަމަ އަންހެނާ ވެސް ނޫން ކަމަށެވެ.

ނިއުޒިލޭންޑްގެ ބޮޑުވަޒީރު އާލާސްވެ އިންނެވިކަން އިއުލާންކުރެއްވުމާ އެކު އެޤައުމުގެ ކުރީގެ ދެ ބޮޑުވަޒީރު ކަމަށްވާ ހެލެން ކްލާކް އާއި ބިލް އިންގްލިޝްގެ އިތުރުން އަވަށްޓެރި އޮސްޓްރޭލިއާގެ ބޮޑުވަޒީރު މެލްކަމް ޓަރންބުލް ވަނީ މަރުހަބާ ދަންނަވާފައެވެ.

ޤައުމެއްގެ ވެރިކަމުގައި ހުންނަވާ އަންހެން ބޭފުޅަކު އާލާސްވެ އިންނެވުމަކީ ފަހުގެ ތާރީޚުގައި ވަރަށް މަދުން ނޫނީ ނުވާ ކަމެކެވެ.

ޕާކިސްތާނުގެ ކުރީގެ ބޮޑުވަޒީރު ބޭނަޒީރު ބުއްޓޫ ވެސް 1990 ވަނަ އަހަރު އާލާސްވެ އިންނެވިކަން އިއުލާންކުރެއްވިއެވެ. އެއީ އިންތިޚާބު ވެފައިވާ ވެރިޔަކު އެފަދަ އިއުލާނެއް ކުރެއްވި ފުރަތަމަ ފަހަަރެވެ.