އޯޕްރާ ވިންފްރީގެ ތަގުރީރަށް އިވަންކާ ޓްރަމްޕް ތައުރީފް ކުރައްވައިފި

ގޯލްޑަން ގްލޯބް ހަފްލާގައި، މަޝްހޫރު ޓީވީ ޕްރެޒެންޓަރ އޯޕްރާ ވިންފްރީ ދިން ތަގުރީރަށް އެމެރިކާގެ ރައީސް ޑޮނަލްޑް ޓްރަމްޕްގެ ދޮށީ އަންހެން ދަރިކަނބަލުން އަދި އެޑްވައިޒަރ އިވަންކާ ޓްރަމްޕް ތައުރީފް ކުރައްވައިފިއެވެ.

އޯޕްރާގެ އެ ތަގުރީރާއެކު އެމެރިކާގައި ދެން އޮންނަ ރިޔާސީ އިންތިޚާބެއްގައި ވާދަކުރައްވަފާނެ ކަމުގެ އަޑުތައްވަނީ ފެތުރިގެން ގޮސްފައެވެ.

އިވަންކާ ވިދާޅުވީ ގޯލްޑެން ގްލޯބް އެވޯޑްސް ގައި ދިން ތަގުރީރަކީ " ބާރުވެރި ކުރުވައި އަދި ހިތްވަރު ދެނިވި ތަގގުރީރެއް" ކަމަށެވެ.

އޯޕްރާ ވާހަކަދައްކާފައި ވަނީ ނަސްލީ ތަފާތުކުރުމާއި ޖިންސީ ފުރައްސާރައާއި، އަދި ތަފާތުކުރުންތަކާ ދެކޮޅަށް މަސައްކަތް ކުރުމުގެ މުހިއްމުކަމާ ބެހޭގޮތުންނެވެ.

އެ ތަގުރީރާއިއެކު 2020 ވަނަ އަހަރު އޮންނަ އިންތިޚާބުގައި އޯޕްރާ ވާދަކުރުމަށް ގޮވާލުން އިތުރުވެފައިވާއިރު އިވަންކާގެ ބައްޕާފުޅު، ރައީސް ޓްރަމްޕްވަނީ އެ އިންތިޚާބުގައި ވާދަކުރައްވާނެ ކަމަށް ވިދާޅުވެފައެވެ.

"ހިނގާ އަންހެނުންނާއި ފިރެހެނުން އެކުވެ ބުނަމާ #ޓައިމްސްއަޕް!" އިވަންކާގެ ޓްވީޓްގައިވެއެވެ.

ޓައިިމްސް އަޕް އަކީ ފިލްމީ ދާއިރާ އަދި އެހެނިހެން މަސައްކަތުގެ މާހައުލުގައި ދިމާވާ ޖިންސީ ފުރައްސާރައާއި ދެކޮޅަށް މަސައްކަތް ކުުރުމަށް އެހީވުމަށް ކުރިޔަށްގެންދާ ކެމްްޕެއިނެކެވެ.

އޯޕްރާގެ ތަގުރީރަށް އިވަންކާ ތާއީދު ކުރެއްވުމުން ސޯޝަލް މީޑިއާގައި އެއްބަޔަކު އެކަމާނާއަށް ފާޑުކިޔާފައިވެސްވެއެވެ. އެތައް ބަޔަކު ގަބޫލުކުރާ ގޮތުގައި 2020 ގެ ރިޔާސީ އިންތިޚާބުގައި އޯޕްރާ ނުކުތުމަށް ތާއީދު ކުރުމުގެ މާނައަކީ ރައީސް ޓްރަމްޕްއާއި ދެކޮަޅަށް ކުރެއްވި ކެމްޕޭނެކެވެ.

އެއްބަޔަކު ވަނީ އިވަންކާ ރައީސް ޓްރަމްޕްއަށާއި ޓައިމްސްއަޕް ކެމްޕެއިނަށް ތާއީދުކުރެެއްވުމުން ފާޑުކިޔާފައެވެ. ރައީސް ޓްރަމްޕްއަކީ އެތައް އަންހެނަކަށް ޖިންސީ ފުރައްސާރަކޮށް ގޯނާ ކޮށްފައިވާކަމުގެ ތުހުމަތު ކުރެވިފައިވާ ބޭފުޅެކެވެ. އެ ތުހުމަތުތައް ރައީސް ޓްރަމްޕް ދޮގު ކުރައްވައެވެ.