ފަލަސްތީނަށް އެހީވާ އދ.ގެ އިދާރާއަށް ފަންޑު ދިނުން ހުއްޓާލުމަށް ނަތަންޔާހޫ ތާޢީދު!

ފަލަސްތީނަށް އެހީވާ އދ.ގެ އިދާރާ ކަމަށްވާ ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީއަށް ފަންޑުކުރުން ހުއްޓާލުމަށް އެމެރިކާގެ ރައީސް ޑޮނަލްޑް ޓްރަމްޕް ނިންމެވި ނިންމެވުމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ތާޢީދުކުރައްވައިފިއެވެ.

އިސްރާއީލުގެ އޮފިޝަލަކާއި ޙަވާލާދީ ޖެރޫސަލަމް ޕޯސްޓުން ބުނީ އެކަމަށް ތާޢީދުކުރެއްވިޔަސް ނަތަންޔާހޫ ބޭނުންފުޅުވަނީ ކުއްލިއަކަށް އެހީ ހުއްޓާލުމުގެ ބަދަލުގައި، މަޑުމަޑުން ޔޫއެން ރިލީފް އެންޑް ވޯކްސް އެޖެންސީއަށްދޭ އެހީ ހުއްޓާލުމަށެވެ.

ފަލަސްތީނަށް އެހީވާ އދގެ އެޖެންސީއަށް ދޭ އެހީތައް ހުއްޓާލާނެކަމުގެ އިންޒާރު ޓްރަމްޕް ދެއްވީ މެދުއިރުމަތީގެ ސުލްހައިގެ މައްސަލައިގައި ވާހަކަ ދެއްކުމަށް ފަލަސްތީނުން ދެކޮޅު ހެދުމުންނެވެ. އިސްރާއީލުގެ ވެރިރަށަކީ ޤުދުސްކަމަށް ބަލައިގަތުމަށް އެމެރިކާގެ ރައީސް ޓްރަމްޕް ނިންމެވި މައްސަލައިގައި ފަލަސްތީނުގެ ރައީސް މަޙްމޫދު ޢައްބާސް ވިދާޅުވީ މެދުއިރުމަތީގެ ސުލްހައިގެ ވާހަކަތަކުގެ މެދުވެރިއެއްގެ ދައުރު އަދާކުރުމުގެ ހައިސިއްޔަތު އެމެރިކާއަށް ގެއްލިއްޖެކަމަށެވެ. އަދި އެހެން ކަމުން މީގެ ފަހުން މެދުވެރިއެއްގެ ގޮތުގައި އެމެރިކާ ބަލައިނުގަންނާނެކަމަށް ޢައްބާސް ވަނީ ވިދާޅުވެފައެވެ.

އެގްޒިއޯސް ނިއުސް ބުނާ ގޮތުގައި އެމެރިކާއިން މިހާރުވެސް ޔޫއެން ރިލީފް އެޖެންސީއަށް ދޭން ހަމަޖެހިފައިވާ ފައިސާގެ ތެެރެއިން 125 މިލިއަން ޑޮލަރު ވަނީ ހިފަހައްޓާފައެވެ. އެހެން ނަމަވެސް އެމެރިކާގެ ޚާރިޖީ ވުޒާރާގެ އޮފިޝަލަކު ވަނީ އެކަން ދޮގުކުރައްވާފައެވެ. ސްޓޭޓް ޑިޕާޓްމަންޓުން ބުނާ ގޮތުގައި މިމައްސަލައިގައި އަދި ވަކި ގޮތެއް ނުނިންމައެވެ.

ޔޫއެން ރިލީފް އެޖެންސީއަކީ ފަލަސްތީނުގެ ޣައްޒާއަށް އެންމެ ގިނައިން އެހީ ފޯރުކޮށްދޭ އެއް ޖަމާޢަތެވެ. އަދި އެއެޖެންސީއަށް ދޭން ޖެހޭ އެހީ ހިފަހައްޓަން އެމެރިކާއިން ނިންމި ނިންމުމަށް އިސްރާއީލުގެ ބައެއް ފަރާތްތަކުންވެސް ދަނީ ނުރުހުން ފާޅުކުރަމުންނެވެ.